Saul Sareng Putra-Putrana Gugur dina Perang

Perang di Gilboa éléh. Yonatan jeung dulur-dulurna tiwas, Saul tatu ku tukang manah, sarta tukang mawa pakarang perangna teu daék ngabérésan anjeunna, ku kituna anjeunna ngajatuhkeun diri kana pedangna sorangan. Urang Filistin mantek layonna kana tembok; urang Yabes-Gilead nurunkeunana.

Pasal 31.

Urang Pelisti merangan Israil; urang Israil kalabur ti maranehna tuluy paraeh di Gunung Gilboa. Urang Pelisti ngudag Saul jeung putra-putrana, tuluy maehan Yonatan, Abinadab, jeung Malkisua, putra-putra Saul. Perangna beuki rongkah narajang ka Saul. Barisan pamanah manggihan anjeunna, tuluy anjeunna cilaka parna kabalangan jamparing. Saul miwarang ka nu mawa pakarangna, pokna, “Cabut pedang maneh, tubles kami, bisi urang-urang nu teu disunat tea daratang, nubles kami, jeung nyiksa kami.” Tapi nu mawa pakarangna embung, lantaran kacida sieunna. Ku sabab kitu Saul nyokot pedangna sorangan tuluy ngaruntagkeun maneh kana pedangna. Barang nu mawa pakarangna nenjo Saul geus pupus, manehna oge ngaruntagkeun maneh kana pedangna tuluy milu maot. Nya kitu Saul pupus poe eta, bareng jeung tilu putrana, nu mawa pakarangna, sarta sakabeh balad-baladna.

Barang urang Israil anu araya di peuntaseun lebak jeung di peuntaseun Walungan Yordan narenjo yen balad Israil geus kalabur sarta Saul katut putra-putrana geus paraeh, maranehna ninggalkeun kota-kotana tuluy kalabur. Tuluy urang Pelisti daratang jeung maratuh di kota-kota eta. Poe isukna, urang Pelisti daratang rek ngarangsadan nu paraeh, tuluy manggihan Saul jeung tilu putrana ngagolepak di Gunung Gilboa. Mastaka Saul dituakan, pakarangna dilaan, tuluy maranehna ngirim utusan ka sakuliah tanah Pelisti pikeun ngabejakeun hal eta di kuil-kuil brahalana jeung ka rahayatna. Pakarang Saul disimpen di kuil Astoret, ari layonna dipaku kana tembok kota Bet-San. ^a

Barang urang Yabes-Gilead ngadarenge naon anu geus dipigawe ku urang Pelisti ka Saul, sakabeh prajuritna anu wani maju peperangan tuluy lalumaku sapeupeuting, nyokot layon Saul jeung layon putra-putrana tina tembok kota Bet-San, dibawa ka Yabes, tuluy dibeuleum di dinya. Tulang-tulangna dicokot, dikubur handapeun tangkal tamariska di Yabes, tuluy maranehna paruasa tujuh poe.