Sawule na bana ya yandi ke kufwa na mvita
Mvita na Ngilebowa vwandaka mbote ve. Yonatane na bampangi ya yandi kufwaka, bantu ya minani lwalisaka Sawule, mpe kinati-binwanunu ya yandi mangaka kufwa yandi, na yina yandi bwaka na zulu ya mbele ya yandi mosi ya mvita. Ba-Filiseti kangisaka nzutu ya yandi na kibaka; babakala ya Yabesi-Ngalaade katulaka yawu.
31 1Ba-Filiseti nwanaka Isayeli; babakala ya Isayeli kimaka bawu mpe bawu kufwaka na zulu ya mongo ya Ngilebowa. 2Ba-Filiseti zwaka Sawule na bana ya yandi, mpe ba-Filiseti kufwaka Yonatane, Abinadabe, na Malekiswa, bana ya Sawule. 3Mvita kumaka ngolo mingi na Sawule. Bantu yina ke bulaka minani zwaka yandi, mpe bawu lwalisaka yandi ngolo mingi. 4Sawule tubaka na kinati-binwanunu ya yandi: «Benda mbele ya nge ya mvita mpe tobola munu, samu ti kana ve bantu yayi yina ba me zenga bubakala ve ke kwiza, bawu ke tobola munu, mpe bawu ke nyokola munu.» Kasi kinati-binwanunu ya yandi mangaka, samu ti yandi tekitaka. Na yina, Sawule bakaka mbele ya yandi mosi ya mvita mpe yandi bwaka na zulu ya yawu. 5Kinati-binwanunu ya yandi monaka ti Sawule me kufwa; na yina, yandi mpe kudilosaka na zulu ya mbele na yandi ya mvita, ebuna yandi kufwaka kintwadi na Sawule. 6Na yina, Sawule kufwaka na kilumbu yina, kintwadi na bana ya yandi tatu, kinati-binwanunu ya yandi, mpe bantu nyonso ya yandi.
7Ntangu babakala ya Isayeli yina vwandaka na lweka ya mudimba mpe na lweka ya esete ya Yolodani talaka ti binwani ya Isayeli kimaka mpe Sawule na bana ya yandi me kufwa, bawu bikaka bambanza ya bawu mpe bawu kimaka. Ba-Filiseti kwizaka mpe bawu kwendaka vwanda na yawu. 8Kilumbu yina landaka, ba-Filiseti kumaka samu na kukatula bima ya bantu yina kufwaka, mpe bawu talaka Sawule na bana ya yandi tatu ya kubwa na zulu ya mongo ya Ngilebowa. 9Bawu zengaka ntu ya yandi, bawu katulaka binwanunu ya yandi ya mvita, mpe bawu fidisaka bantumwa na yinsi nyonso ya ba-Filiseti samu na kuzabisa yawu na bayinzo ya banzambi ya bawu ya biteki mpe na kati ya bantu. 10Bawu tulaka binwanunu ya yandi ya mvita na yinzo ya nzambi Asetalete mpe bawu kangaka nzutu ya yandi na kibaka ya mbanza Bete-Seyane. a a v10 Asetalete vwandaka nzambi ya nkento ya ba-Kaana; kutula binwanunu ya Sawule ya mvita na yinzo ya yandi vwandaka mutindu ya ba-Filiseti ya kupesa banzambi ya bawu nkembo ya kununga.
11Ntangu bantu yina ke zinga na Yabese ya Ngalaade kuwaka mutindu ba-Filiseti salaka Sawule, 12binwani nyonso ya bawu ya ngolo tambulaka mpimpa nyonso, bawu bakaka nzutu ya Sawule mpe banzutu ya bana ya yandi na kibaka ya mbanza Bete-Seyane, bawu nataka yawu na Yabese, mpe bawu yokaka yawu na tiya kuna. 13Bawu bakaka mikwa ya bawu, bawu tulaka yawu na ndyamu na yisi ya tamale na Yabese, mpe bawu minaka nsoki bilumbu nsambwadi.