Saũlũ na Aariũ ake Makĩgũa Mbaarainĩ
Mbaara ya Giliboa ĩthũkĩire Isiraeli. Jonathani na ariũ a nyina makooragwo, Saũlũ agatihio nĩ arathi a mĩguĩ, nake mũkuui wa indo ciake cia mbaara akarega kũmũũraga, nĩ ũndũ ũcio akĩĩgũithia rũhiũ-inĩ rwake. Afilisti makũrĩra mwĩrĩ wake rũthingo-inĩ; nao andũ a Jabeshi-Gileadi makaũrutũra.
31 1Afilisti magĩrũa na Isiraeli; nao andũ a Isiraeli makĩmoora, magĩgũa makua kĩrĩmainĩ gĩa Giliboa. 2Afilisti magĩkinyĩra Saũlũ na aariũ ake, nao Afilisti makĩũraga Jonathani, na Abinadabu, na Malikishua, aariũ a Saũlũ. 3Mbaara ĩkĩritũhĩra Saũlũ mũno. Nao aikia a mĩguĩ makĩmũkora, nake agĩtihio mũno nĩo. 4Naake Saũlũ akĩĩra mũkuĩ wa indo ciake cia mbaara atĩrĩ, “Comora rũhiũ rwaku rwa njora ũndheece, kana andũ aya mataruĩte mooke, mandheece, na maanyariire.” No mũkuĩ wa indo ciake cia mbaara akĩrega—nĩgũkorwo nĩetigĩrire mũno. Nĩ ũndũ ũcio Saũlũ akĩoya rũhiũ rwake mwene rwa njora, akĩrĩgwĩra. 5Rĩrĩa mũkuĩ wa indo ciake cia mbaara oonire atĩ Saũlũ nĩakua, o nake akĩrĩgwĩra rũhiũ rwake rwa njora, agĩkua hamwe nake. 6Nĩ ũndũ ũcio Saũlũ agĩkua mũthenya ũcio, hamwe na aariũ ake atatũ, na mũkuĩ wa indo ciake cia mbaara, na andũ ake oothe.
7Rĩrĩa andũ a Isiraeli arĩa maarĩ mũrĩmo wa gĩtuamba na mũrĩmo wa Jorodani moonire atĩ mbũtũ ya ita ya Isiraeli nĩyoorĩte, na atĩ Saũlũ na aariũ ake nĩakua, magĩtiganĩria matũũra mao makĩũra. Nao Afilisti magĩũka magĩtũũra kuo. 8Mũthenya ũyũ ũngĩ, Afilisti magĩũka kũruta andũ arĩa akue indo, magĩkora Saũlũ na aariũ ake atatũ magũĩte kĩrĩmainĩ gĩa Giliboa. 9Magĩtinia mũtwe wake, makĩruta indo ciake cia mbaara, na magĩtũma atũmwo bũrũri wothe wa Filistia nĩguo mahunjie ũhoro ũcio hekarũinĩ cia mĩhianano yao na gatagatĩ ka andũ. 10Nao makĩiga indo ciake cia mbaara thĩinĩ wa hekarũ ya Ashitorethu, na makĩoherera mwĩrĩ wake rũthingoinĩ rwa Bethi-shani. a a v10 Ashitorethu aarĩ ngai ya mũndũ-wa-nja ya Akaanani; kũiga indo cia mbaara cia Saũlũ thĩinĩ wa hekarũ yake kwarĩ njĩra ya Afilisti ya kuonania atĩ ngai ciao nĩcio ciareehire ũhootani.
11Rĩrĩa andũ arĩa maatũũraga Jabeshi-gileadi maiguire ũrĩa Afilisti meekĩte Saũlũ, 12arũme ao oothe a ita magĩthiĩ ũtukũ wothe, makĩruta mwĩrĩ wa Saũlũ na mĩĩrĩ ya aariũ ake rũthingoinĩ rwa Bethi-shani, makĩmĩtwara Jabeshi, na makĩmĩcina kuo. 13Nao makĩoya mahĩndĩ mao, makĩmathika rungu rwa mũtĩ wa mũtamariki kũu Jabeshi, na makĩĩima irio mĩthenya mũgwanja.