1 Samuẹli 31

31 ¹Àwọn Filistini bá Israẹli jà; àwọn ọkùnrin Israẹli sì sá fún wọn, wọ́n sì ṣubú kú ní Òkè Gilboa. ²Àwọn Filistini lé Saulu àti àwọn ọmọ rẹ̀ bá, àwọn Filistini sì pa Jonatani, Abinadabu, àti Malikiṣua, àwọn ọmọ Saulu. ³Ogun náà sì le gidigidi lórí Saulu. Àwọn tafàtafà rí i, ó sì gbọgbẹ́ gidigidi lọ́wọ́ wọn. ⁴Saulu sọ fún ẹni tí ń ru ìhámọ́ra rẹ̀ pé, “Fa idà rẹ yọ, kí o sì fi gún mi, bí bẹ́ẹ̀ kọ́, àwọn aláìkọlà wọ̀nyí yóò wá, wọn yóò fi gún mi, wọn yóò sì dá mi lóró.” Ṣùgbọ́n ẹni tí ń ru ìhámọ́ra rẹ̀ kọ̀, nítorí ẹ̀rù bà á gidigidi. Nítorí náà Saulu mú idà ara rẹ̀, ó sì ṣubú lé e. ⁵Nígbà tí ẹni tí ń ru ìhámọ́ra rẹ̀ rí i pé Saulu ti kú, òun náà ṣubú lé idà rẹ̀, ó sì bá a kú. ⁶Bẹ́ẹ̀ ni Saulu kú ní ọjọ́ náà, òun àti àwọn ọmọ rẹ̀ mẹ́tẹ̀ẹ̀ta, ẹni tí ń ru ìhámọ́ra rẹ̀, àti gbogbo àwọn ọkùnrin rẹ̀.

⁷Nígbà tí àwọn ọkùnrin Israẹli tí ń bẹ ní òdìkejì àfonífojì àti ní òdìkejì Jordani rí i pé àwọn ọmọ-ogun Israẹli ti sá, àti pé Saulu àti àwọn ọmọ rẹ̀ ti kú, wọ́n fi àwọn ìlú wọn sílẹ̀, wọ́n sì sá. Àwọn Filistini sì wá, wọ́n sì tẹ̀dó sínú wọn. ⁸Ní ọjọ́ kejì, àwọn Filistini wá láti bọ́ àwọn òkú, wọ́n sì rí Saulu àti àwọn ọmọ rẹ̀ mẹ́tẹ̀ẹ̀ta tí wọ́n ṣubú ní Òkè Gilboa. ⁹Wọ́n gé orí rẹ̀ kúrò, wọ́n bọ́ ìhámọ́ra rẹ̀, wọ́n sì rán àwọn ìránṣẹ́ já gbogbo ilẹ̀ Filistia láti kéde rẹ̀ nínú àwọn tẹ́mpìlì òrìṣà wọn àti láàrin àwọn ènìyàn. ¹⁰Wọ́n fi ìhámọ́ra rẹ̀ sínú tẹ́mpìlì Aṣtoreti, wọ́n sì so òkú rẹ̀ mọ́ ara ògiri Beti-ṣani. ^a a v10 Aṣtoreti jẹ́ abo-òrìṣà ará Kenaani; gbígbé ìhámọ́ra Saulu sínú tẹ́mpìlì rẹ̀ ni ọ̀nà tí àwọn Filistini gbà fi ìṣẹ́gun náà fún àwọn òrìṣà wọn.

¹¹Nígbà tí àwọn olùgbé Jabeṣi-gileadi gbọ́ ohun tí àwọn Filistini ṣe sí Saulu, ¹²gbogbo àwọn akọni ọkùnrin wọn fi gbogbo òru rìn, wọ́n gba òkú Saulu àti òkú àwọn ọmọ rẹ̀ kúrò ní ara ògiri Beti-ṣani, wọ́n gbé wọn wá sí Jabeṣi, wọ́n sì sun wọ́n níbẹ̀. ¹³Wọ́n kó egungun wọn, wọ́n sin wọ́n sábẹ́ igi tamariski ní Jabeṣi, wọ́n sì gbààwẹ̀ fún ọjọ́ méje.