ሳኦልን ደቁን ኣብ ውግእ ወደቑ

እቲ ኣብ ጊልቦዓ ዝነበረ ውግእ በርትዐ። ዮናታንን ኣሕዋቱን ተቐትሉ፤ ሳኦል ብቀስተኛታት ተቘሰለ፤ ኣፅዋሩ ዝስከም ከዓ ኽውግኦ ኣበየ እሞ፥ ኣብ ልዕሊ ሰይፉ ባዕሉ ወደቐ። ፍልስጥኤማውያን ንሬሳኡ ብሽንካር ኣብ መንደቕ ሰቐልዎ፤ እቶም ኣብ ኢያቢስ ገለዓድ ዝነብሩ ሰባት ከዓ ኣውረድዎ።

ምዕራፍ 31።

ፍልስጥኤማውያን ምስ እስራኤል ተዋግኡ፤ ሰብ እስራኤል ድማ ካብ ቅድሚኦም ሃዲሞም ኣብ እምባ ጊልቦዓ ሞይቶም ወደቑ። ፍልስጥኤማውያን ንሳኦልን ንደቁን ኣርከብዎም፤ ፍልስጥኤማውያን ድማ ንዮናታንን ነኣሚናዳብን ሜልኪሳን፥ ደቂ ሳኦል፥ ቀተልዎም። እቲ ውግእ ኣብ ልዕሊ ሳኦል ከበዶ። እቶም ቀስተኛታት ድማ ረኸብዎ፤ የመና ድማ ኣቝሰልዎ። ሳኦል ድማ ነቲ ኣፅዋሩ ዝስከም መንእሰይ “ሰይፍኻ መዚዝካ ውግኣኒ፤ እንተ ዘይኮነ እዞም ዘይግሩዛት መፂኦም ይውግኡንን የሳቕዩንን” በሎ። እቲ ኣፅዋሩ ዝስከም ግና ፈሪሑ ኣበየ። ስለዙይ ሳኦል ሰይፉ ወሲዱ ኣብ ልዕሊኡ ወደቐ። እቲ ኣፅዋሩ ዝስከም መንእሰይ ድማ ሳኦል ከም ዝሞተ ምስ ረአየ፥ ንሱውን ኣብ ልዕሊ ሰይፉ ወዲቑ ምስኡ ሞተ። ከምዙይ ድማ ሳኦል በታ መዓልቲ እቲኣ፥ ምስ ሰለስተ ደቁን ኣፅዋሩ ዝስከም መንእሰይን ኵሎም ሰቡን ሞተ።

ሰብ እስራኤል፥ እቶም ብሸነኽ ማዕዶ ለሰን ማዕዶ ዮርዳኖስን ዝነበሩ፥ ሳኦልን ደቁን ከም ዝሞቱ ሰራዊት እስራኤልውን ከም ዝሃደመ ምስ ረአዩ፥ ከተማታቶም ሓዲጎም ሃደሙ። ፍልስጥኤማውያን ድማ መፂኦም ኣብኣተን ተቐመጡ። ንፅባሒቱ ኸዓ ፍልስጥኤማውያን ነቶም ምዉታት ክገፍፉ መፂኦም፥ ንሳኦልን ሰለስተ ደቁን ኣብ እምባ ጊልቦዓ ወዲቖም ረኸብዎም። ርእሱ ቘሪፆም ኣፅዋሩ ገፈፉ፤ ኣብ ቤት ጣዖታቶምን ኣብ ማእኸል ህዝብን ምእንቲ ክንገር ድማ ናብ ኵላ ፍልስጥኤም ልኡኻት ሰደዱ። ኣፅዋሩ ኣብ ቤት ጣዖት ኣስታሮት ኣቐመጥዎ፤ ሬሳኡ ድማ ኣብ መንደቕ ቤትሳን ሰቐልዎ። ^a

እቶም ኣብ ኢያቢስ ገለዓድ ዝነብሩ ድማ ፍልስጥኤማውያን ንሳኦል ዝገበርዎ ምስ ሰምዑ፥ ኵሎም እቶም ጀጋኑ ሰባቶም ምሉእ ለይቲ ተጓዒዞም፥ ሬሳ ሳኦልን ሬሳታት ደቁን ካብ መንደቕ ቤትሳን ወሲዶም፥ ናብ ኢያቢስ ኣምፂኦም ኣብኡ ኣንደድዎም። ኣዕፅምቶም ድማ ወሲዶም ኣብ ኢያቢስ ኣብ ትሕቲ እታ ተምሪ ቐበርዎም፤ ሸውዓተ መዓልቲ ኸዓ ፆሙ።