Sọl na Ụmụ Ya Ndị Nwoke Dara nʼAgha

Agha ahụ a lụrụ na Gilboa gara nke ọma. E gburu Jonatan na ụmụnne ya, ndị na-agba ụta merụrụ Sọl ahụ, onye na-ebu ngwa agha ya ajụkwa igbu ya, ya mere ọ dakwasịrị mma agha nke aka ya. Ndị Filistia kpọgidere ozu ya nʼelu mgbidi; ndị ikom Jabesh-Gilead wedatara ya.

Isi 31.

Ndị Filistia buru agha megide Izrel; ndị ikom Izrel gbara ha ọsọ ma daa nwụọ nʼUgwu Gilboa. Ndị Filistia chụkwutere Sọl na ụmụ ya ndị nwoke, ndị Filistia tigbukwara Jonatan, Abinadab, na Malkishua, bụ ụmụ Sọl. Agha ahụ siri ike megide Sọl. Ndị na-agba ụta chọtara ya, ha merụkwara ya ahụ nke ukwuu. Sọl gwara onye na-ebu ngwa agha ya sị, “Mịpụta mma agha gị were ya magbuo m, ma ọ bụ na ndị a na-ebighị ugwu ndị a ga-abịa were ya magbuo m, taakwa m ahụhụ.” Ma onye na-ebu ngwa agha ya jụrụ, nʼihi na ụjọ tụrụ ya nke ukwuu. Ya mere Sọl weere mma agha nke aka ya dakwasị ya. Mgbe onye na-ebu ngwa agha ya hụrụ na Sọl anwụọla, ya onwe ya dakwasịkwara mma agha ya soro ya nwụọ. Ya mere Sọl nwụrụ nʼụbọchị ahụ, ya na ụmụ ya ndị nwoke atọ, na onye na-ebu ngwa agha ya, na ndị ikom ya niile.

Mgbe ndị ikom Izrel ndị nọ nʼofe ndagwurugwu na nʼofe osimiri Jọdan hụrụ na ndị agha Izrel agbaala ọsọ, na Sọl na ụmụ ya anwụọla, ha hapụrụ obodo ha gbaa ọsọ. Ndị Filistia bịara biri nʼime ha. Nʼechi ya, ndị Filistia bịara ịkwakọrọ ndị nwụrụ anwụ ihe, ha chọtara Sọl na ụmụ ya ndị nwoke atọ ka ha dara nʼUgwu Gilboa. Ha bepụrụ isi ya, yipụ ngwa agha ya, zipụkwa ndị ozi gafee ala Filistia niile ka ha gaa kọọ ya nʼụlọ arụsị ha na nʼetiti ndị mmadụ. Ha debere ngwa agha ya nʼụlọ arụsị Ashtọret, kegidekwa ozu ya na mgbidi Bet-shan. ^a

Mgbe ndị bi na Jabesh-Gilead nụrụ ihe ndị Filistia mere Sọl, ndị ikom ha niile bụ ndị dị ike nʼagha jere ije ogologo abalị ahụ niile, bupụ ozu Sọl na ozu ụmụ ya ndị nwoke na mgbidi Bet-shan, buru ha bịa Jabesh, kpọọ ha ọkụ nʼebe ahụ. Ha weere ọkpụkpụ ha, lie ha nʼokpuru osisi tamarisk dị na Jabesh, buokwa ọnụ ụbọchị asaa.