Saul aser par jabasotem tongbang nung lao
Gilboa tenem nung tongbang mejunga aru. Yonathan aser pei adianutem tepset, takartemi Saul yirutet, aser pa nok o nü abensangi pa atsütettsü makok, anungji pai pei nok manung lao. Filistia nungeri pa temang jara nung kojal agi tarak; saka Yabes-gilead nisungtemi aji aben tanaben oa.
31 1Filistia nunger Israel den rara; aser Israel nisungtem Filistia nunger madang jena aser Gilboa tenem nung laoa asü. 2Filistia nungeri Saul aser par jabasotem aria menep, aser Filistia nungeri Saul jabaso Yonathan, Abinadab, aser Malkhiskua tepset. 3Tongbang Saul anema kanga sashia liasü. Takartemi pa angu, aser parnoki pa kanga yiruogo. 4Sauli pa nok o nü abensang dang ashi, “Ne nok atsütetang aser ni tepsetang, masütsü item memejeptokba nisungtem arua, ni atsüngtsü aser ni rishikangshitsü.” Saka pa nok o nü abensang menangzük, kechiaser pa kanga tsübu. Anungji Sauli pei nok bena aru aser iba manung lao. 5Saul süogo ta pa nok o nü abensangi angu, paia pei nok manung laoa pa den asü. 6Anungji iba anogo nung Saul, par jabaso asem den, pa nok o nü abensang den, par nisung ajak den külemi asü.
7Kodang lenten külen aser Yordan külen nung aliba Israel nisungtemi Israel temeranger telok jenogo aser Saul aser par jabasotem süogo ta angu, parnoki pei yimtitem senzüka toktsü aser jena ao. Aser Filistia nungeri arua idak nung ali. 8Tananü Filistia nungeri tetepsetertem oset alatsü arua, Saul aser par jabaso asem Gilboa tenem nung laoa angu. 9Parnoki pa tekolak tangzük aser pa nok o nü sepzük, aser pei süngyanglu tenla ki nung aser nüburtem rongnung osang metetdaktsü asoshi Filistia linük ajak nung osangbenertem yok. 10Parnoki pa nok o nü Ashtarot tenla ki nung ayu, aser pa temang Beth-shan jara nung taksem. a a v10 Ashtarot Kanan nunger tsüngrem tetsür ka liasü; Saul nok o nü la tenla ki nung ayuba, Filistia nungeri pei tsüngremtemi takok agüja ta metetdaktsü leni liasü.
11Kodang Yabesh-gilead nung alirtemi Filistia nungeri Saul dang inyakba angu, 12parnok rara nisung ajak aonung tepiyong oa, Saul temang aser pa jabasotem temang Beth-shan jara nungi bena aru, aser Yabesh-i anir arua yangji rongtoktsü. 13Parnok teretji bena arua, Yabesh nung tamarisk süngdong kübok parnoki arem, anungji anogo tenet lumi.