Ithe witũ Ehereria Daudi Mbaarainĩ
Anene a Afilisiti maarega gũthiĩ na Daudi arĩ thutha wao, magĩĩcirĩria atĩ no amagarũrũkĩre mbaara-inĩ nĩguo acookerie wega wa mwathi wake wa tene. Akishi, ũrĩa ũmwĩhokete biũ, amũcookia mũciĩ akĩmũhooya ũhooreri. Daudi agakaana, nake Ithe witũ akamũgiria kũrũa na Isiraeli.
29 1Na rĩĩrĩ, Afilisti nĩmacookanĩrĩirie mbũtũ ciao ciothe cia ita kũu Afeki, nao andũ a Isiraeli makĩamba hema ciao hakuhĩ na gĩthima kĩrĩa kĩrĩ Jezireeli. 2Na rĩrĩa aathani a Afilisti maathiiaga na mbere marĩ ikundi cia magana na cia ngiri, Daudi na andũ ake magĩthiĩ na thuutha hamwe na Akishi.
3Nao anene a mbũtũ cia Afilisti makĩũria atĩrĩ, “Ahibirania aya marĩĩkĩte atĩa gũkũ?” Nake Akishi akĩmacookeria atĩrĩ, “Ũyũ nĩ Daudi, ndungata ya Saulũ mũthamaki wa Isiraeli. Akoretwo arĩ hamwe na niĩ mĩthenya ĩno—aca, mĩaka ĩno—na kuuma mũthenya ũrĩa aatiganĩire mwathi wake agĩũka kũrĩ niĩ nginya rĩu, ndirĩ ndonire ũndũ mũũru harĩ we.”
4No anene a mbũtũ cia Afilisti makĩmũrakarĩra, makĩmwĩra atĩrĩ, “Cookia mũndũ ũcio kũndũ kũrĩa wamũheire. Ndakanatoonye mbaarainĩ hamwe na ithuĩ, nĩgeetha ndakae gũtũgarũrũka tũkĩrũa. Nĩ kĩĩ kĩngĩmũcookeria ũtugi wa mwathi wake, angĩkorwo ti mĩtwe ya andũ aitũ ene? 5Githĩ ũyũ tiwe Daudi ũrĩa maainaga ũhoro wake magĩĩna, makiuga atĩrĩ: ‘Saulũ nĩooragĩte ngiri ciake, nake Daudi akooraga makũmi ma ngiri ciake’?”
6Nĩ ũndũ ũcio Akishi agĩĩta Daudi, akĩmwĩra atĩrĩ, “Ti-itherũ o ta ũrĩa MWATHANI arĩ muoyo, wee ũrĩ mũndũ mwĩhokeku, na ingĩkena ũkiumagara na ũgĩtoonya hamwe na niĩ kambĩinĩ. Ndirĩ ndakuona na ihĩtia kuuma mũthenya ũrĩa wookire kũrĩ niĩ nginya rĩu. No aathani aya matigwĩtĩkĩrĩte. 7Rĩu-rĩ, cooka na ũthiĩ na thaayũ, nĩgeetha ndũkeeke ũndũ ũngĩrakaria aathani a Afilisti.”
8No Daudi akĩregana, akĩũria atĩrĩ, “Njĩkĩte atĩa? Nĩ ũndũ ũrĩkũ wonete ũũru harĩ ndungata yaku kuuma rĩrĩa ndookire kũrĩ we nginya rĩu, atĩ ndikae gũthiĩ kũhũũrana na thũ cia mwathi wakwa mũthamaki?”
9Nake Akishi agĩcookeria Daudi atĩrĩ, “Nĩnjũũĩ atĩ harĩ niĩ wee ũrĩ mwega o ta mũraika wa Ngai. No o na kũrĩ ũguo, anene a mbũtũ cia Afilisti moigĩte atĩrĩ, ‘Ndakambatane na ithuĩ twathiĩ mbaarainĩ.’ 10Nĩ ũndũ ũcio, ũkĩra tene rũũciinĩ, wee na ndungata cia mwathi waku iria mũũkire nacio; mũũkĩre tene na mũthiĩ kwarĩkia gũkĩa.”
11Nĩ ũndũ ũcio Daudi na andũ ake magĩũkĩra tene nĩguo macooke bũrũri wa Afilisti rũũciinĩ tene gũgĩkĩa, nao Afilisti makĩambata Jezireeli.