撒母耳記上 29

29 ¹非利士人喺亞弗集合佢哋所有軍隊，以色列人就喺耶斯列嘅泉水邊紮營。 ²非利士嘅首領按住百人、千人嘅隊伍出發嗰陣，大衛同佢啲人就跟住亞吉行喺後隊。

³非利士嘅將領問：「呢班希伯來人喺度做乜嘢？」亞吉對佢哋講：「呢個係大衛，以色列王掃羅嘅臣僕。佢同咗我一齊呢排——唔止，係呢幾年——由佢投奔到我嗰日直到而家，我喺佢身上搵唔到乜嘢過錯。」

⁴但係非利士嘅將領向佢發嬲，同佢講：「叫呢個人返去你指定畀佢嘅地方，佢唔可以同我哋一齊出戰，恐怕佢喺打仗嗰陣掉轉頭嚟對付我哋。佢攞乜嘢先至可以重新討返佢主人嘅歡心呢？咪就係攞我哋呢班人嘅頭囉！ ⁵呢個咪就係佢哋跳舞嗰陣歌頌嘅大衛咩：『掃羅殺咗千千，大衛就殺咗萬萬』？」

⁶於是亞吉叫大衛嚟，對佢講：「我指住永活嘅耶和華起誓，你係誠實嘅，你同我一齊喺營裏面出出入入，我都好歡喜。由你嚟到我度嗰日直到而家，我喺你身上搵唔到乜嘢過錯，不過啲首領唔中意你。 ⁷而家你返去啦，平平安安噉走，唔好做啲令非利士首領唔高興嘅嘢。」

⁸大衛就抗議講：「我究竟做過乜嘢啊？由我嚟到你度直到而家，你喺你僕人身上搵到乜嘢，令到我唔可以去同我主我王嘅仇敵打仗呢？」

⁹亞吉對大衛講：「我知道你喺我眼中,好似神嘅使者噉好。不過非利士嘅將領話：『佢唔可以同我哋一齊上去打仗。』 ¹⁰所以你聽日一朝早就要起身，連同你主人嗰啲跟你嚟嘅僕人，一早起身，天光就走。」

¹¹於是大衛同佢啲人一早起身，天一光就返去非利士地，非利士人就上耶斯列去。