Bouei Dawid lason ka leian satkei
Filistiabü leiyeibü shuongei Dawid haoen kaijembo la hauwapyola aküm, hao lason maanga haoen khulimbo dangbou yei louan jembü bunyu maangshikbü nyibou hapsi loulabü dogo khittikei. Akishei, hao pendou maialembü, hao chem to sepeinyu ngaan olinkhoubei. Dawidei khauangan laukei, lausikei seneibü Bouei hao Israel yoa wapyobü ka khümenkei.
29 1Tou Filistiabüei jembü sepai tan pendou Afek to yoshaikei, lausikei Israelbü Jezreela kibü deikhün nyangko shaikei. 2Filistiabü songdakbü shuongei saongao hoba hajar hajar satjinei, Dawid hoba haoeibü mütshuong Akish yoa phainei haukei.
3Hobaje Filistiabü leiyeibü shuongei laukei, “Ho Ibribü shuong hanei ai kümda?” Akishei haoen to laukei, “Ho kho Israel Choba Sauleibü khangenbü Dawid ki. Hao hibü chalou shuong, aying, hibü po shuong, kü yoa kikei, hoba hao kü jungto loubü chalou ka tat sühko ngei hao to ai shedbü ahapen.”
4Lausikei Filistiabü leiyeibü shuongei hao to khauangkei, hobaje haoen laukei, “Müt kho nyi hao la kubü kishang to sepeinyu hautiashi. Hao sen yoa lason to ahaujan, aishanga lason sünga hao sen khulimbo dangbou yeilabü. Sen jembü müt shuongeibü khu kuan, hao haoeibü bunyu thedanga maangshikbü nyibou hapsi loulabü aying lo? 5Ho kho hao shanga haoenei tombo lakbü ka, ‘Saulei hajar shijo, Dawidei hajar an shijo,’ dogo atkukei Dawid aying lo?”
6Kheijinei Akishei Dawid ngaan laukei, “Bunyubou lang ki shongko, no honei ki, hoba no kü yoa shaishanga satan loubü shanga ngo olinkhoulabü. No kü jungto loubü chalou ka tat sühko ngei no to ai shedbü ahapen. Lausikei songdakbü shuongei no to amaikuen. 7Nyi Filistiabü songdakbü shuong to maang ashatla shanga, tou sepeinyu sangmaia hauashi.”
8Lausikei Dawidei laukei, “Ngei ai kümbei? Ngo ka jungto loubü chalou ka tat sühko, ngei kü bunyu Choba dangbou shuong khulimbo wapyola ahaula shanga, nyi kaibü khangenbü to ai shedbü hapbei?”
9Akishei Dawid to laukei, “Ngei ngeda, no kü thedanga Mühghaü hangangbü che tegü maibü ki. Aieilausi Filistiabü leiyeibü shuongei, ‘Hao sen yoa lason to ahaujan,’ dogo laukei. 10Kheijinei no hoba no yoa loubü kaibü bunyuboueibü khangenbü shuong ngeyang enyu piashi; ngeyang enyu pian, lang ngejinei satashi.”
11Kheijinei Dawid hoba haoeibü mütshuong Filistia kaodak to sepeinyu haula shanga ngeyang enyu meimeikei, lausikei Filistiabü Jezreel to angkei.
