Pooe David theri lüno co voi
Philistinemi krapi kezhokoe David uko salaco züde theri thilü vo keto rüdata, pü theri thi mhüjülü ukoyo müjo de pü niepoo pünüyi ngoyi zita mpeyi. Achishe püo rhü keba bi, kemenü lü vo keto lebi kha tsü süva. David kelasü, mu ha Poe püo Israel züde theri thi celü khava.
29 1Tsühi Philistinemiko uko sopü metü Aphelü kengu, Israelmi süri Jezreellü dzüpra kelü thethi bata. 2Philistinemi kezhoko thükrakra mu nye pühngungu ta kezüce, David mu pü thümako Achish züh usaco ta.
3Philistinemi krapi kezhoko ketso, “Hebrewmi hiko hilü dipü thiba?” Achish ukoce poti, “Hihi Israel kedeo Saul ceta David zo. Pü hitüsozhoko azü ba—mo, hitetseko—mu pü ace khava de tavori tüsozho lüno tsühi ketso I püyo kejo püri ngoyi mozo.”
4Vele Philistinemi krapi kezhoko püla rüdata de poti, “Thüma süo no pütsü keta pülü la süte. Pü ha züh theri lü vo tahi, molize pü theri thilü ha varhü tazo. Pü ha thümako piko-e pü niepoo pünüyi ngoyi sala veku zo mome? 5Hio uko nasü kelü chusü David zo mome: ‘Saul-e pü nye keri vü, David-e pü va nye keri vü’?”
6Süsa Achish-e David cüsü de poti, “Niepoo rhü keba bi, no kejütho zo, mu no azü salaco lü ta mu lü keyilü I anü zo. No ace tavori tüsozho lüno tsühi ketso I nyo kejo püri ngoyi mozo. Vele kezhoko no metha kemo. 7Tsühi no tala rede mu kemenü lü vote, size no Philistinemi kezhoko nümothi keyi nothümao thi tahi.”
8“Vele I dipü thiba?” David poti. “I nce tavori tüsozho lüno tsühi ketso, no a celü dipü ngoyi ba, I a niepoo kedeo ngomuko theri thi vo tamo kesü?”
9Achish-e David ce poti, “I seba, acelü no Jihova tüyochoyimi bi kevethoo zo. Süri, Philistinemi krapi kezhoko poti, ‘Pü ha züh theri lü vo tahi.’ 10Süla no, mu no züh tavori no niepoo cetako, keshu rena metha süte; keshu rena süde keve thi lize vote.”
11Süsa David mu pü thümako keshu rena sü, tüso vori Philistia lü tala vo kütola; Philistinemi süri Jezreellü kita.
