1ይ ሳሙኤል 29 FHB Father's Heart Bible™

29 ¹ፍልስጥኤማውያን ኵሉ ሰራዊቶም ኣብ ኣፌቅ ኣከቡ፤ እስራኤል ከዓ ኣብ ጥቓ እቲ ኣብ ኢይዝራኤል ዘሎ ዓይኒ ማይ ሰፈሩ። ²እቶም ኣሕሉቕ ፍልስጥኤማውያን በብሚእትን በብሽሕን እናወፁ እንተለዉ፥ ዳዊትን ሰቡን ከዓ ምስ ኣንኩስ ኮይኖም ብድሕሪት ወፁ።

³እቶም ኣሕሉቕ ፍልስጥኤማውያን ድማ “እዚኣቶም ዕብራውያን ኣብዙይ እንታይ ይገብሩ ኣለዉ?” በሉ። ኣንኩስ ከዓ “እዙይ ዳዊት፥ ኣገልጋሊ ሳኦል ንጉስ እስራኤል እዩ። እዝ መዓልቲታት እዚኣ፥ ኣይፋሉን እዝ ዓመታት እዚኣ ምሳይ ፀኒሑ፤ ካብታ ናባይ ዝመፀ መዓልቲ ኣትሒዙ ድማ ክሳዕ ሕዚ ሓንቲ በደል ኣይረኸብኩሉን” በሎም።

⁴እቶም ኣሕሉቕ ፍልስጥኤማውያን ግና ተቘጥዕዎ፤ ከምዙይ ድማ በሉ፦ “ነቲ ሰብኣይ ናብታ ዝሃብካዮ ቦታ መልሶ። ምሳና ናብ ውግእ ኣይእቶ፤ ኣብቲ ውግእ እንተለና ከይቃወመና። ብርእሲ እዞም ሰባትናስ ናብ ጐይታኡ ሞገስ ክመልስዶ ኣይሐይሽን? ⁵እዙይ እቲ ‘ሳኦል ሺሕ ቐተለ፥ ዳዊት ድማ እልፊ’ ኢለን እናሳዕስዓ ዝደረፋሉ ዳዊትዶ ኣይኮነን?”

⁶ኣንኩስ ድማ ንዳዊት ፀዊዑ ከምዙይ በሎ፦ “ብህያው እግዚኣብሄር፥ ንስኻ ቅኑዕ ኢኻ፤ ምሳይ ኣብ ሰፈር ክትወፅእን ክትኣቱን ድማ ባህ ምበለኒ። ካብታ ናባይ ዝመፃእካላ መዓልቲ ኣትሒዙ ክሳዕ ሕዚ ሓንቲ በደል ኣይረኸብኩልካን። እቶም ኣሕሉቕ ግና ባህ ኣይበሎምን። ⁷ሕዚ ተመሊስካ ብሰላም ኪድ፤ ነቶም ኣሕሉቕ ፍልስጥኤማውያን ዘቕይም ነገር ከይትገብር።”

⁸ዳዊት ድማ “እንታይ ደኣ ገይረ? ናብ ፀላእቲ ጐይታይ ንጉስ ከይደ ከይዋጋእ፥ ካብታ ናባኻ ዝመፃእኩላ መዓልቲ ኣትሒዝካ ክሳዕ ሕዚ ኣብ ኣገልጋሊኻ እንታይ ረኺብካ?” ኢሉ ተማጎተ።

⁹ኣንኩስ ድማ ንዳዊት “ንስኻ ኣባይ ከም መልኣኽ እግዚኣብሄር ፅቡቕ ምዃንካ እፈልጥ እየ። ኮይኑ ግና እቶም ኣሕሉቕ ፍልስጥኤማውያን ‘ምሳና ናብ ውግእ ኣይደይብ’ ኢሎም። ¹⁰ስለዙይ ንስኻን እቶም ምሳኻ ዝመፁ ኣገልገልቲ ጐይታኻን ንግሆ ኣንጊህኹም ተስኡ፤ ኣንጊህኹም ተሲእኹም ድማ ምስ በርሀ ኪዱ።”

¹¹ዳዊትን ሰቡን ድማ ኣጋ ወጋሕታ ናብ ፍልስጥኤም ክምለሱ ኣንጊሆም ተስኡ፤ እቶም ፍልስጥኤማውያን ግና ናብ ኢይዝራኤል ደየቡ።