ፍልስጥኤማውያን ንውግእ ተኣከቡ

ፍልስጥኤማውያን ተኣከቡ፥ ኣቦና ድማ ንሳኦል ብሕልሚ ኾነ ብኡሪም ኮነ ብነቢያት ኣይመለሰሉን። ስለዙይ እቲ ንፀዋዕቲ መናፍስቲ ዘጥፍአ ንጉስ ተመሲሉ ናብ ሓንቲ ኣብ ኤንዶር ዘላ ኸደ። ሳሙኤል ደየበ፥ መንግስቲ ናይ ዳዊት ምዃኑ ነገሮ፥ ፅባሕ ከዓ ንሱን ደቁን ምስኡ ኸም ዝኾኑ ነገሮ።

ምዕራፍ 28።

በተን መዓልቲታት እቲኣተን ፍልስጥኤማውያን ንእስራኤል ክዋግኡ ንውግእ ሰራዊቶም ኣኽተቱ። ኣንኩስ ድማ ንዳዊት “ንስኻን ሰባትካን ምሳይ ናብ ሰራዊት ከም እትወፁ ትፈልጥ ኢኻ” በሎ።

ዳዊት ድማ ንኣንኩስ “ባርያኻ እንታይ ክገብር ከም ዝኽእል ክትፈልጥ ኢኻ” በሎ። ኣንኩስ ከዓ “ፅቡቕ፥ ንምሉእ ዕድሜኻ ናይ ክብሪ ዘብዐኛይ ክገብረካ እየ” ኢሉ መለሰሉ።

ሳሙኤል ሞይቱ ነበረ፤ ኵሉ እስራኤል ድማ ሓዚኖም ኣብ ራማ ኸተማኡ ቐበርዎ። ሳኦል ከዓ ነቶም ፀዋዕቲ መናፍስትን ጠንቈልትን ካብ ምድሪ ኣርሒቕዎም ነበረ።

ፍልስጥኤማውያን ተኣኪቦም መፂኦም ኣብ ሱነም ሰፈሩ፤ ሳኦል ከዓ ንኵሉ እስራኤል ኣኪቡ ኣብ ጊልቦዓ ሰፈረ። ሳኦል ንሰራዊት ፍልስጥኤማውያን ምስ ረአየ፥ ፈርሐ፤ ልቡ ድማ የመና ራዓደ። ሳኦል ንኣቦና ሓተተ፥ ኣቦና ግና ብሕልሚ ኾነ ብኡሪም ኮነ ብነቢያት ኣይመለሰሉን።

ሳኦል ንሹመኛታቱ “ከይደ ክሓታ ፀዋዒት መንፈስ ሰበይቲ ድለዩለይ” በሎም። ንሳቶም ከዓ “እንሆ፥ ኣብ ኤንዶር ሓንቲ ኣላ” በልዎ።

ሳኦል ትርኢቱ ለዊጡ ካልእ ክዳን ተኸዲኑ፥ ምስ ክልተ ሰባት ብለይቲ ናብታ ሰበይቲ ከደ፤ “በጃኺ ብመንፈስ ጠንቍልለይ፥ ነቲ ዝሰመኽዎ ድማ ኣደይብለይ” ድማ በላ።

እታ ሰበይቲ ድማ “ሳኦል ነቶም ፀዋዕቲ መናፍስትን ጠንቈልትን ካብ ምድሪ ከም ዘጥፍአ ባዕልኻ ትፈልጥ ኢኻ፤ ስለ ምንታይ ደኣ ንነፍሰይ ክትቐትለኒ መፈንጠር ተጻወደለይ?” በለቶ።

ሳኦል ድማ “ብህይወት ኣቦና፥ በዝ ነገር እዙይ በደል ኣይበፅሐክን” ኢሉ ብኣቦና መሓለላ።

እታ ሰበይቲ ድማ “ንመን ከደይበልካ?” በለቶ። ንሱ ኸዓ “ንሳሙኤል ኣደይብለይ” በላ።

እታ ሰበይቲ ንሳሙኤል ምስ ረአየቶ፥ ዓው ኢላ ጨደረት፤ ንሳኦል ድማ “ስለ ምንታይ ኣታሊልካኒ? ንስኻ ሳኦል ኢኻ!” በለቶ።

እቲ ንጉስ ድማ “ኣይትፍርሒ፤ እንታይ ትሪኢ ኣለኺ?” በላ። እታ ሰበይቲ ኸዓ ንሳኦል “ካብ ምድሪ ዝድይብ ኣምላኽ ዝመስል እርኢ ኣለኹ” በለቶ።

ንሱ ድማ “መልክዑ ኸመይ እዩ?” በላ። ንሳ ኸዓ “ብቐሚሽ ዝተጎልበበ ሽማግለ ሰብኣይ ይድይብ ኣሎ” በለት። ሳኦል ከዓ ሳሙኤል ምዃኑ ፈሊጡ፥ ብገፁ ናብ ምድሪ ተደፊኡ ሰገደ።

ሳሙኤል ድማ ንሳኦል “ስለ ምንታይ ኣደይብካ ኣሸገርካኒ?” በሎ። ሳኦል ከዓ “ኣብ ብርቱዕ ፀበባ ኣለኹ፤ ፍልስጥኤማውያን ይዋግኡኒ ኣለዉ፥ ኣቦና ድማ ካባይ ኣግሊሱ፥ ብነቢያት ኮነ ብሕልሚ ኣይመልሰለይን እዩ። ስለዙይ እንታይ ክገብር ከም ዘለኒ ክፈልጥ ፀዋዕኹኻ” በለ።

ሳሙኤል ድማ “ኣቦና ራሒቑካ ፀላኢኻ ኾይኑ ኸሎ፥ ስለ ምንታይ ንኣይ ትሓተኒ? ^a ኣቦና ኸምቲ ብኣይ ገይሩ ዝበሎ ገበረ፤ ነታ መንግስቲ ካብ ኢድካ ቐዲዱ ንብፃይካ ንዳዊት ሃቦ። ድምፂ ኣቦና ስለ ዘይሰማዕኻ፥ እቲ ነዳዲ ቝጥዓኡ ኣብ ልዕሊ ኣማሌቅ ስለ ዘየፈፀምካ፥ ሎሚ እዙይ ገበረልካ። ኣቦና ንኣኻን ንእስራኤልን ኣብ ኢድ ፍልስጥኤማውያን ኣሕሊፉ ክህብ እዩ፤ ፅባሕ ንስኻን ደቅኻን ምሳይ ክትኮኑ ኢኹም፤ ኣቦና ድማ ንሰራዊት እስራኤል ኣብ ኢድ ፍልስጥኤማውያን ኣሕሊፉ ክህብ እዩ።”

ሳኦል ብዘረባ ሳሙኤል ተሸቢሩ፥ ብኡብኡ ምሉእ ቁመቱ ኣብ ምድሪ ወደቐ። ምሉእ መዓልትን ለይትን ምግቢ ስለ ዘይበልዐ፥ ሓይሊ ኣይነበሮን።

እታ ሰበይቲ ናብ ሳኦል መፂኣ፥ ኣዝዩ ኸም ዝሰንበደ ምስ ረአየት፥ “እንሆ፥ ባርያኻ ሰሚዓትካ እያ፤ ነፍሰይ ኣብ ኢደይ ኣሲረ፥ ነቲ ዝበልካኒ ገበርኩ። ሕዚ ድማ በጃኻ፥ ንስኻውን ንባርያኻ ስምዐኒ፤ ቍራስ እንጀራ ከቕርበልካ ሕደገኒ፤ በሊዕኻ ኸዓ ንመንገዲ ሓይሊ ርኸብ።”

ንሱ ግና “ኣይበልዕን እየ” ኢሉ ኣበየ። ሹመኛታቱን እታ ሰበይትን ግና ክሳዕ ዝሰምዖም ኣገደድዎ፤ ሽዑ ካብ ምድሪ ተሲኡ ኣብ ዓራት ኮፍ በለ። እታ ሰበይቲ ድማ ኣብ ቤት ስቡሕ ዝራብዕ ነበራ፤ ቀልጢፋ ኸዓ ሓረደቶ፤ ሕሩጭ ወሲዳ ለዊሳ፥ ዘይበዅዐ እንጀራ ሰንከተት። ናብ ሳኦልን ሹመኛታቱን ድማ ኣቕረበትሎም፤ ንሳቶም ከዓ በሊዖም ተሲኦም በታ ለይቲ እቲኣ ኸዱ።