ዳዊት ኣብ ማእኸል ፍልስጥኤማውያን ተዓቚበ

ዳዊት ሳኦል ኣብ መወዳእታ ኸም ዝሕዞ ተኣሚኑ፥ ናብ ኣንኩስ ንጉስ ጌት ኰብሊሉ ፂቅላግ ተዋህቦ። ነቶም ደቡባውያን ህዝቢ ሓደጋ የውድቐሎም፥ ንነፍሲ ወከፍ ምስክር ይቐትል፥ ንኣንኩስ ድማ ንይሁዳ ይወግእ ከም ዘሎ ይነግሮ ነበረ። ኣንኩስ ብምሉእ ኣመኖ። ኣብዙይ ዝንኣድ ነገር የለን፥ እቲ ፅሑፍ ከዓ ኣግሂዱ ይነግሮ።

ምዕራፍ 27።

ዳዊት ድማ “ሓደ መዓልቲ ብኢድ ሳኦል ክጠፍእ እየ። ካብ ናብ ምድሪ ፍልስጥኤማውያን ቀልጢፈ ምምላጥስ ዝሕሸኒ የለን። ሽዑ ሳኦል ኣብ ኵሉ ወሰን እስራኤል ደጊም ኣይደልየንን እዩ፤ ካብ ኢዱውን ከምልጥ እየ” ኢሉ ብልቡ ሓሰበ። ዳዊት ድማ ተሲኡ ንሱን እቶም ምስኡ ዝነበሩ ሽዱሽተ ሚእቲ ሰባትን ናብ ኣንኩስ ወዲ ማዖክ ንጉስ ጌት ተሳገሩ። ዳዊት ድማ ንሱን ሰባቱን ነፍሲ ወከፍ ምስ ቤተ ሰቡ ኾይኖም፥ ምስ ኣንኩስ ኣብ ጌት ተቐመጠ፤ ዳዊት ከዓ ኣሒኖዓም በዓልቲ ኢይዝራኤልን እታ መበለት ናባል ዝነበረት ኣቢግያ በዓልቲ ቀርሜሎስን፥ እዘን ክልተ ኣንስቱ ምስኡ ነበራ። ዳዊት ናብ ጌት ከም ዝሃደመ ንሳኦል ምስ ነገርዎ ድማ፥ ደጊም ኣይደለዮን።

ዳዊት ድማ ንኣንኩስ ከምዙይ በሎ፦ “ኣብ ቅድሜኻ ሞገስ ረኺበ እንተ ኾይነ፥ ኣብ ሓንቲ ኻብ ከተማታት እታ ሃገር ዝቕመጠላ ቦታ ሃበኒ። ባርያኻ ምሳኻ ኣብ ከተማ ንጉስ ስለ ምንታይ ይቕመጥ?” በታ መዓልቲ እቲኣ ኣንኩስ ንፂቅላግ ሃቦ፤ ስለዙይ ፂቅላግ ክሳዕ ሎሚ መዓልቲ ናይ ነገስታት ይሁዳ ኾይኑ ኣሎ። ዳዊት ኣብ ምድሪ ፍልስጥኤማውያን ዝተቐመጠሉ ጊዜ ሓደ ዓመትን ኣርባዕተ ወርሕን ነበረ።

ዳዊትን ሰባቱን ድማ ደዪቦም ንገሹራውያንን ንጊርዛውያንን ንኣማሌቃውያንን ሓደጋ ኣውደቑሎም፤ እዚኣቶም ካብ ጥንቲ ጀሚሮም ኣብታ ምድሪ፥ ናብ ሹር ኣቢሎም ክሳዕ ምድሪ ግብፂ ይነብሩ ነበሩ እሞ። ዳዊት ነታ ምድሪ ኣብ ዝወቕዓላ ዂሉ ጊዜ፥ ሰብኣይ ኮነ ሰበይቲ ብህይወት ኣይሓድግን ነበረ፤ ኣባጊዕን ኣብዑርን ኣእዱግን ኣግማልን ክዳውንትን ወሲዱ ድማ ናብ ኣንኩስ ይምለስ ነበረ።

ኣንኩስ ድማ “ሎሚ ኣበይ ሓደጋ ኣውዲቕኩም?” ኢሉ ይጥይቖ ነበረ። ዳዊት ከዓ “ናብ ደቡብ ይሁዳ፥” “ናብ ደቡብ የራሕምኤላውያን፥” ወይ “ናብ ደቡብ ቄናውያን” ይብል ነበረ።

ዳዊት ድማ “ብዛዕባና ሐቢሮም ‘ዳዊት ከምዙይ ገበረ’ ከይብሉ” ኢሉ ስለ ዝሓሰበ፥ ናብ ጌት ዘምፅኦ ሰብኣይ ኮነ ሰበይቲ ብህይወት ኣይሓድግን ነበረ። እዙይ ከዓ ኣብ ምድሪ ፍልስጥኤማውያን ኣብ ዝተቐመጠሉ ዂሉ ጊዜ ልማዱ ነበረ።

ኣንኩስ ድማ “ኣብ ህዝቡ እስራኤል ፈፂሙ ፍንፉን ኮይኑ እዩ እሞ፥ ንዘለኣለም ባርያይ ክኸውን እዩ” ኢሉ ሐሲቡ ንዳዊት ኣመኖ።