၁ ရာ 27 FHB Father's Heart Bible™

27 ¹ဒါဝိဒ်က “တစ်နေ့သော်ငါသည် ရှောလု၏လက်ဖြင့် သုတ်သင်ပယ်ရှင်းခြင်းကိုခံရလိမ့်မည်။ ဖိလိတ္တိပြည်သို့ ချက်ချင်းထွက်ပြေးခြင်းထက်ပို၍ ကောင်းသောအရာ ငါ့အတွက်မရှိ။ ထိုအခါ ရှောလုသည် ဣသရေလနယ်မြေတစ်လျှောက်လုံး၌ ငါ့ကိုရှာဖွေခြင်းကို စွန့်လွှတ်သဖြင့် ငါသည်သူ၏လက်မှ လွတ်မြောက်လိမ့်မည်” ဟု တွေးတော၏။ ²ဒါဝိဒ်သည် မိမိနှင့်အတူပါသော လူခြောက်ရာတို့နှင့်အတူ ထ၍ ဂါသမင်းကြီး မောက၏သား အာခိရှထံသို့ ကူးသွား၏။ ³ဒါဝိဒ်သည် မိမိ၏လူများ၊ အသီးသီးမိမိတို့အိမ်ထောင်စုနှင့်တကွ ဂါသမြို့၌ အာခိရှနှင့်အတူနေ၏။ ဒါဝိဒ်မူကား ယေဇရေလမြို့သူ အဟိနောင်နှင့် နာဗလ၏မုဆိုးမဖြစ်သော ကရမေလမြို့သူ အဘိဂဲလ ဟူသောမယားနှစ်ဦးနှင့်အတူနေ၏။ ⁴ဒါဝိဒ်သည် ဂါသမြို့သို့ ထွက်ပြေးကြောင်း ရှောလုကြားသိသောအခါ သူသည် ဒါဝိဒ်ကို နောက်တစ်ဖန်မရှာဖွေတော့ပေ။

⁵ဒါဝိဒ်က အာခိရှအား “ကိုယ်တော်သည် အကျွန်ုပ်ကို မျက်နှာသာပေးတော်မူလျှင် နေစရာအတွက် ကျေးလက်မြို့တစ်မြို့၌ နေရာတစ်ခုကို အကျွန်ုပ်အားပေးတော်မူပါ။ ကိုယ်တော်၏ကျွန်သည် မင်းနေပြည်တော်၌ ကိုယ်တော်နှင့်အတူ အဘယ်ကြောင့်နေရပါမည်နည်း” ဟု လျှောက်၏။ ⁶ထိုနေ့၌ အာခိရှသည် ဇိကလတ်မြို့ကို ဒါဝိဒ်အားပေး၏။ ထို့ကြောင့် ဇိကလတ်မြို့သည် ယနေ့တိုင်အောင် ယုဒရှင်ဘုရင်တို့၏ ပိုင်နက်ဖြစ်လေ၏။ ⁷ဒါဝိဒ်သည် ဖိလိတ္တိပြည်နယ်မြေ၌ နေထိုင်သည့်ကာလသည် တစ်နှစ်နှင့်လေးလဖြစ်၏။

⁸ဒါဝိဒ်နှင့်သူ၏လူတို့သည် ချီတက်၍ ဂေရှုရလူ၊ ဂိရဇိလူနှင့် အာမလက်လူတို့ကို တိုက်ခိုက်လုယက်ကြ၏။ အကြောင်းမူကား ထိုသူတို့သည် ရှေးကာလကပင် ရှုရမြို့ဘက်မှ အဲဂုတ္တုပြည်တိုင်အောင် ထိုပြည်၌ နေထိုင်ခဲ့ကြသောကြောင့်ဖြစ်၏။ ⁹ဒါဝိဒ်သည် ထိုပြည်ကို တိုက်ခိုက်သည့်အခါတိုင်း ယောက်ျားဖြစ်စေ၊ မိန်းမဖြစ်စေ အသက်မချမ်းသာစေဘဲ သိုး၊ နွား၊ မြည်း၊ ကုလားအုတ်နှင့် အဝတ်အထည်တို့ကိုယူ၍ အာခိရှထံသို့ ပြန်လာ၏။

¹⁰အာခိရှက “ယနေ့အဘယ်အရပ်ကို တိုက်ခိုက်လုယက်ခဲ့သနည်း” ဟုမေးလေ့ရှိ၏။ ဒါဝိဒ်ကလည်း “ယုဒပြည်တောင်ပိုင်းကို” သို့မဟုတ် “ယေရမေလလူတို့၏တောင်ပိုင်းကို” သို့မဟုတ် “ကေနိလူတို့၏တောင်ပိုင်းကို” ဟုဆိုလေ့ရှိ၏။

¹¹ဒါဝိဒ်သည် “သူတို့သည် ‘ဒါဝိဒ်ဤသို့ပြုခဲ့သည်’ ဟုဆို၍ ငါတို့အကြောင်းကို သတင်းပို့ကြမည်” ဟုတွေး၍ ဂါသမြို့သို့ခေါ်ဆောင်ရန် ယောက်ျားဖြစ်စေ၊ မိန်းမဖြစ်စေ အသက်မချမ်းသာစေခဲ့ပေ။ ဤအမှုကား သူသည် ဖိလိတ္တိပြည်နယ်မြေ၌ နေထိုင်သမျှကာလပတ်လုံး ပြုမြဲဖြစ်၏။

¹²အာခိရှသည် “ဒါဝိဒ်သည် မိမိအမျိုးသား ဣသရေလလူတို့ရှေ့၌ မိမိကိုယ်ကို အလွန်စက်ဆုပ်ရွံရှာဖွယ်ဖြစ်စေပြီ။ သူသည်ငါ၏ကျွန် ထာဝစဉ်ဖြစ်လိမ့်မည်” ဟုတွေး၍ ဒါဝိဒ်ကိုယုံကြည်၏။