1 Samuel 27

27 ¹Davidna phaninga, "Zimiksho akhali I Saulwui pāngli shimānra. Philistine ngaleili chichangli yāmshok kaji eina phamei iwui vang khikha maleimana. Chithāda Saulna Israelwui tharilungli apam kachi kachilikhala ili phākhavai ngareithuihaora, kala ina awui pāng eina yāmshokra." ²Davidna ngakarthuilaga, awui mi shātharuk ngasoda Gathwui awunga Maochwui naomayara Achishwuili kānhaowa. ³David eina awui mibing kachiva̱ kachichāwui shimkhurli ngasoda Gathli Achishli ngasoda pamsai. Davidla awui preiva̱ khani ngasoda pamsai; ani Jezreelwui Ahino-am eina Carmelwui Nabalwui rameiva̱ Abigailna. ⁴Davidna Gathli yāmhaira kaji Saulli hānga tharan, ana ali longa phākhavai masāthuwa.

⁵Davidna Achishli hānga, "Nana ili ngahānkhangai tharan, ram keinung akhali ili pamkhavaina akha khamilu. Khisāda narao I wungnaowui keinungli nali ngasoda pamrakhala?" ⁶Chithang Achishna ali Ziklag mihaowa; chieina Ziklag aja eina tangda Judahwui awungabingwui ngaleina. ⁷Davidna Philistine ngaleili pamkahai atam chi zingkum akha eina kachāng matina.

⁸Davidna awui mibingli ngasoda vālaga Geshurbing, Girzibing, kala Amaleknaobingli rai ngapon; kaja athum hi achālakhawui eina thuida Shurshong eina Egypt ngalei vāshungda chi ngaleili pamsai. ⁹Davidna ngalei chili ngarar kachida, ana mayarnao lah sha̱nao akhanidala ringkhangasakla, yao, sei, gadhā, ut, kala kashankachon khuilaga, Achishwuili latvai.

¹⁰Achishna hānga, "Aja nathum kali rai ngaponkhala?" Davidna hānga, "Judahwui Negeb," "Jerahmeelbingwui Negeb," lah "Kenbingwui Negeb."

¹¹Davidna Gathli khuirā khavai mayarnao lah sha̱nao akhanidala ringkhangasakla, ana phaninga, "Athumna ithumwui vang, 'Davidna hithāda sai' da unghānghaipaishina." Hi ana Philistine ngaleili pamkahai atam katonga awui khangachāyan china.

¹²Achishna Davidli shitsanga, ana phaninga, "Ana awui mibing Israelwui mangāli ningkachai khavai sāhaira; chieina ana katang mavaila iwui rao sāra."