1 Samuel 27

27 ¹Naghunahuna si David, “Usa ka adlaw mahanaw ako pinaagi sa kamot ni Saul. Wala nay mas maayo alang kanako gawas sa paglayas dayon ngadto sa yuta sa mga Filistehanon. Unya mohunong si Saul sa pagpangita kanako bisan asa sa mga utlanan sa Israel, ug makalingkawas ako sa iyang kamot.” ²Milakaw si David ug mitabok, siya ug ang 600 ka tawo nga uban kaniya, ngadto kang Akis nga anak ni Maok, nga hari sa Gat. ³Mipuyo si David uban kang Akis sa Gat, siya ug ang iyang mga tawo, ang matag usa uban sa iyang panimalay—si David uban sa iyang duha ka asawa, si Ahinoam nga taga-Jezreel ug si Abigail nga taga-Carmel, ang balo ni Nabal. ⁴Sa dihang gisuginlan si Saul nga si David mikalagiw ngadto sa Gat, wala na siya mangita kaniya.

⁵Miingon si David kang Akis, “Kon nahimuot ka kanako, hatagi ako ug dapit sa usa sa mga lungsod sa kabanikanhan aron akong puy-an. Nganong magpuyo man ang imong sulugoon uban kanimo sa harianong siyudad?” ⁶Niadtong adlawa gihatag ni Akis kaniya ang Siklag; busa ang Siklag iya na sa mga hari sa Juda hangtod karon. ⁷Ang gidugayon nga si David mipuyo sa teritoryo sa mga Filistehanon maoy usa ka tuig ug upat ka bulan.

⁸Mitungas si David ug ang iyang mga tawo ug gisulong ang mga Gesurihanon, mga Girzihanon, ug mga Amalekanhon, kay sila nagpuyo niadtong yutaa sukad sa karaang panahon, paingon sa Shur ug hangtod sa yuta sa Ehipto. ⁹Sa matag higayon nga sulongon ni David ang yuta, walay lalaki o babaye nga iyang gibilin nga buhi, gikuha niya ang mga karnero, mga baka, mga asno, mga kamelyo, ug mga bisti, unya mibalik siya kang Akis.

¹⁰Mangutana si Akis, “Asa ka misulong karong adlawa?” Motubag si David, “Sa Negev sa Juda,” “sa Negev sa mga Jeramelihanon,” o “sa Negev sa mga Kenihanon.”

¹¹Walay lalaki o babaye nga gibilin ni David nga buhi aron dad-on ngadto sa Gat, kay naghunahuna siya, “Basin magsumbong sila batok kanato, nga mag-ingon, ‘Mao kini ang gibuhat ni David.’” Mao kini ang iyang nabatasan sa tibuok panahon nga siya mipuyo sa teritoryo sa mga Filistehanon.

¹²Misalig si Akis kang David, kay naghunahuna siya, “Gihimo niya ang iyang kaugalingon nga hilabihan ka dulumtanan ngadto sa iyang katawhan nga Israel; mahimo siyang akong sulugoon hangtod sa kahangtoran.”