اول سموئيل 27 FHB Father's Heart Bible™

27 ¹داؤد په خپل زړۀ کښې ووئيل چې، ”يوه ورځ به زۀ د ساؤل په لاس هلاک شم. زما دپاره د دې نه ښۀ بل څۀ نشته چې زۀ سمدستى د فلستيانو ملک ته وتښتم. بيا به ساؤل د اِسرائيل په ټولو سرحدونو کښې زما د لټون نه لاس واخلى، او زۀ به د هغۀ د لاس نه خلاص شم.“ ²داؤد روان شو او هغه او هغه ۶۰۰ سړى چې ورسره وُو، د جات بادشاه اکيس د معوک زوئ ته لاړل. ³داؤد د اکيس سره په جات کښې اوسېدو، هغه او د هغۀ سړى، هر يو د خپل کور خلقو سره — داؤد د خپلو دوؤ ښځو سره، يزرعيلى اخينوعم او د کرمل ابيجيل، د نابال کونډه. ⁴کله چې ساؤل ته ووئيلے شو چې داؤد جات ته تښتېدلے دے، نو هغۀ بيا د هغۀ لټون ونۀ کړو.

⁵داؤد اکيس ته ووئيل چې، ”کۀ تۀ راباندې مهربان يې، نو د کلى ښارونو نه په يوه کښې راته د اوسېدو ځائ راکړه. ستا نوکر ولې د تا سره په شاهى ښار کښې اوسى؟“ ⁶هغه ورځ اکيس هغۀ ته صِقلاج ورکړو، نو صِقلاج تر نن ورځې پورې د يهوداه د بادشاهانو دے. ⁷هغه موده چې داؤد د فلستيانو په علاقه کښې اوسېدو، يو کال او څلور مياشتې وه.

⁸داؤد او د هغۀ سړى بره لاړل او په جشوريانو، جرزيانو او عمالِقيانو يې حمله وکړه، ځکه چې هغوئ د ډېر پخوا زمانې نه په هغه ملک کښې اوسېدل، د شور په لور او د مصر ملک ته. ⁹هر کله چې داؤد په هغه ملک حمله کوله، نو هغۀ به نۀ څوک سړے او نۀ ښځه ژوندۍ پرېښوله، ګډې، غواګانې، خرۀ، اوښان او کپړې به يې واخستلې، بيا به اکيس ته راستون شو.

¹⁰اکيس به تپوس کولو چې، ”نن دې چرته حمله وکړه؟“ داؤد به ووئيل چې، ”د يهوداه په نقب،“ ”د يرحميليانو په نقب،“ يا ”د قينيانو په نقب.“

¹¹داؤد به نۀ سړے او نۀ ښځه ژوندۍ پرېښوله چې جات ته يې راولى، ځکه چې هغۀ به فکر کولو چې، ”هسې نه چې دوئ زمونږ خلاف خبره وکړى او ووائى چې، ’داؤد داسې وکړل.‘“ دا د هغۀ دستور وو، تر هغه ټولې مودې پورې چې هغه د فلستيانو په علاقه کښې اوسېدو.

¹²اکيس په داؤد باور وکړو، ځکه چې هغۀ به فکر کولو چې، ”هغۀ ځان د خپلو خلقو اِسرائيليانو په نظر کښې بالکل نفرت وړ کړے دے، نو هغه به تل زما نوکر وى.“