1 ಸಮುವೇಲನು 27 FHB Father's Heart Bible™

27 ¹ದಾವೀದನು ತನ್ನ ಮನಸ್ಸಿನಲ್ಲಿ, “ಒಂದು ದಿನ ಸೌಲನ ಕೈಯಿಂದ ನಾನು ನಾಶವಾಗುವೆನು. ಕೂಡಲೇ ಫಿಲಿಷ್ಟಿಯರ ದೇಶಕ್ಕೆ ತಪ್ಪಿಸಿಕೊಂಡು ಹೋಗುವುದಕ್ಕಿಂತ ಉತ್ತಮವಾದದ್ದು ನನಗೆ ಬೇರೊಂದಿಲ್ಲ. ಆಗ ಸೌಲನು ಇಸ್ರಾಯೇಲಿನ ಮೇರೆಗಳಲ್ಲಿ ಎಲ್ಲಿಯೂ ನನ್ನನ್ನು ಹುಡುಕುವುದನ್ನು ಬಿಟ್ಟುಬಿಡುವನು; ನಾನು ಅವನ ಕೈಯಿಂದ ತಪ್ಪಿಸಿಕೊಳ್ಳುವೆನು” ಎಂದು ಯೋಚಿಸಿದನು. ²ದಾವೀದನು ಹೊರಟು, ತನ್ನ ಸಂಗಡ ಇದ್ದ 600 ಜನರೊಂದಿಗೆ, ಗತ್‌ನ ಅರಸನೂ ಮಾವೋಕನ ಮಗನೂ ಆದ ಆಕೀಷನ ಬಳಿಗೆ ದಾಟಿಹೋದನು. ³ದಾವೀದನೂ ಅವನ ಜನರೂ ಪ್ರತಿಯೊಬ್ಬನು ತನ್ನ ಕುಟುಂಬದೊಡನೆ ಗತ್‌ನಲ್ಲಿ ಆಕೀಷನ ಬಳಿ ವಾಸಿಸಿದರು. ದಾವೀದನು ತನ್ನ ಇಬ್ಬರು ಹೆಂಡತಿಯರಾದ ಇಜ್ರೇಲಿನ ಅಹೀನೋವಮಳನ್ನೂ ನಾಬಾಲನ ವಿಧವೆಯಾದ ಕರ್ಮೆಲಿನ ಅಬೀಗೈಲಳನ್ನೂ ಕೂಡಿ ವಾಸಿಸಿದನು. ⁴ದಾವೀದನು ಗತ್‌ಗೆ ಓಡಿಹೋದನೆಂದು ಸೌಲನಿಗೆ ತಿಳಿದಾಗ, ಅವನು ಇನ್ನೆಂದಿಗೂ ಅವನನ್ನು ಹುಡುಕಲಿಲ್ಲ.

⁵ದಾವೀದನು ಆಕೀಷನಿಗೆ, “ನಿನ್ನ ದೃಷ್ಟಿಯಲ್ಲಿ ನನಗೆ ದಯೆ ದೊರೆತರೆ, ವಾಸಿಸುವುದಕ್ಕೆ ಗ್ರಾಮನಗರಗಳಲ್ಲಿ ಒಂದರಲ್ಲಿ ನನಗೆ ಸ್ಥಳ ಕೊಡು. ನಿನ್ನ ಸೇವಕನು ರಾಜಧಾನಿಯಲ್ಲಿ ನಿನ್ನ ಸಂಗಡ ಏಕೆ ವಾಸಿಸಬೇಕು?” ಎಂದನು. ⁶ಆ ದಿನ ಆಕೀಷನು ಅವನಿಗೆ ಚಿಕ್ಲಗ್ ಊರನ್ನು ಕೊಟ್ಟನು; ಆದ್ದರಿಂದ ಚಿಕ್ಲಗ್ ಇಂದಿನವರೆಗೂ ಯೆಹೂದದ ಅರಸರಿಗೆ ಸೇರಿದೆ. ⁷ದಾವೀದನು ಫಿಲಿಷ್ಟಿಯರ ದೇಶದಲ್ಲಿ ವಾಸಿಸಿದ ಕಾಲವು ಒಂದು ವರ್ಷ ನಾಲ್ಕು ತಿಂಗಳು ಆಗಿತ್ತು.

⁸ದಾವೀದನೂ ಅವನ ಜನರೂ ಹೊರಟುಹೋಗಿ ಗೆಷೂರ್ಯರ, ಗಿರ್ಜೀಯರ, ಅಮಾಲೇಕ್ಯರ ಮೇಲೆ ದಾಳಿಮಾಡಿದರು; ಏಕೆಂದರೆ ಇವರು ಪುರಾತನ ಕಾಲದಿಂದ ಶೂರಿನ ಕಡೆಗೂ ಐಗುಪ್ತ ದೇಶದವರೆಗೂ ಇದ್ದ ಆ ದೇಶದಲ್ಲಿ ವಾಸಿಸುತ್ತಿದ್ದರು. ⁹ದಾವೀದನು ಆ ದೇಶದ ಮೇಲೆ ದಾಳಿಮಾಡಿದಾಗೆಲ್ಲಾ, ಗಂಡಸರನ್ನಾಗಲಿ ಹೆಂಗಸರನ್ನಾಗಲಿ ಜೀವದಿಂದ ಉಳಿಸದೆ, ಕುರಿ, ದನ, ಕತ್ತೆ, ಒಂಟೆ, ಬಟ್ಟೆಗಳನ್ನು ತೆಗೆದುಕೊಂಡು, ಆಕೀಷನ ಬಳಿಗೆ ಹಿಂತಿರುಗಿದನು.

¹⁰ಆಕೀಷನು, “ಈ ದಿನ ನೀನು ಎಲ್ಲಿ ದಾಳಿಮಾಡಿದೆ?” ಎಂದು ಕೇಳುತ್ತಿದ್ದನು. ಅದಕ್ಕೆ ದಾವೀದನು, “ಯೆಹೂದದ ನೆಗೆವ್‌ನಲ್ಲಿ,” “ಯೆರಹ್ಮೇಲ್ಯರ ನೆಗೆವ್‌ನಲ್ಲಿ,” ಇಲ್ಲವೆ “ಕೇನ್ಯರ ನೆಗೆವ್‌ನಲ್ಲಿ” ಎಂದು ಹೇಳುತ್ತಿದ್ದನು.

¹¹ಗತ್‌ಗೆ ತರುವುದಕ್ಕೆ ದಾವೀದನು ಗಂಡಸರನ್ನಾಗಲಿ ಹೆಂಗಸರನ್ನಾಗಲಿ ಜೀವದಿಂದ ಉಳಿಸಲಿಲ್ಲ; ಏಕೆಂದರೆ, “‘ದಾವೀದನು ಹೀಗೆ ಮಾಡಿದನು’ ಎಂದು ಹೇಳಿ ಇವರು ನಮ್ಮ ವಿಷಯವಾಗಿ ತಿಳಿಸಿಬಿಟ್ಟಾರು” ಎಂದು ಅವನು ಯೋಚಿಸಿದನು. ಅವನು ಫಿಲಿಷ್ಟಿಯರ ದೇಶದಲ್ಲಿ ವಾಸಿಸಿದ ಕಾಲವೆಲ್ಲಾ ಇದೇ ಅವನ ರೂಢಿಯಾಗಿತ್ತು.

¹²ಆಕೀಷನು ದಾವೀದನನ್ನು ನಂಬಿದನು; “ಇವನು ತನ್ನ ಜನರಾದ ಇಸ್ರಾಯೇಲ್ಯರಿಗೆ ತನ್ನನ್ನು ಸಂಪೂರ್ಣವಾಗಿ ಅಸಹ್ಯಕರನಾಗಿ ಮಾಡಿಕೊಂಡಿದ್ದಾನೆ; ಇವನು ಸದಾಕಾಲ ನನ್ನ ಸೇವಕನಾಗಿರುವನು” ಎಂದು ಅವನು ಯೋಚಿಸಿದನು.