1 Samuẹli 27

27 ¹Dafidi rò nínú ara rẹ̀ pé, “Lọ́jọ́ kan, ọwọ́ Saulu yóò gbá mi lọ. Kò sí ohun tí ó dára fún mi ju kí n sá àsálà lẹ́sẹ̀kẹsẹ̀ sí ilẹ̀ àwọn Filistini. Nígbà náà ni Saulu yóò juwọ́ sílẹ̀ nínú wíwá mi káàkiri gbogbo agbègbè Israẹli, èmi yóò sì bọ́ lọ́wọ́ rẹ̀.” ²Dafidi sì dìde, ó sì rékọjá, òun àti ẹgbẹ̀ta ọkùnrin tí ó wà pẹ̀lú rẹ̀, sí ọ̀dọ̀ Akiṣi ọmọ Maoki, ọba Gati. ³Dafidi sì ń gbé pẹ̀lú Akiṣi ní Gati, òun àti àwọn ọkùnrin rẹ̀, olúkúlùkù pẹ̀lú ìdílé rẹ̀—Dafidi pẹ̀lú àwọn aya rẹ̀ méjèèjì, Ahinoamu ará Jesreeli àti Abigaili ará Karmeli, opó Nabali. ⁴Nígbà tí a sọ fún Saulu pé Dafidi ti sá lọ sí Gati, kò sì wá a mọ́.

⁵Dafidi sì wí fún Akiṣi pé, “Bí mo bá rí ojú rere lọ́dọ̀ yín, ẹ fún mi ní ibì kan ní ọ̀kan nínú àwọn ìlú ìgbèríko kí n lè máa gbé. Èéṣe tí ìránṣẹ́ yín yóò fi máa gbé pẹ̀lú yín ní ìlú ọba?” ⁶Ní ọjọ́ náà, Akiṣi fún un ní Siklagi; nítorí náà Siklagi ti jẹ́ ti àwọn ọba Juda títí di òní olónìí. ⁷Iye àkókò tí Dafidi gbé ní agbègbè àwọn Filistini jẹ́ ọdún kan àti oṣù mẹ́rin.

⁸Dafidi àti àwọn ọkùnrin rẹ̀ sì gòkè lọ, wọ́n sì kọlu àwọn ará Geṣuri, àwọn ará Girisi, àti àwọn ará Amaleki, nítorí àwọn ni ó ti ń gbé ilẹ̀ náà láti ìgbà àtijọ́, títí dé ọ̀nà Ṣuri àti dé ilẹ̀ Egipti. ⁹Nígbàkigbà tí Dafidi bá kọlu ilẹ̀ náà, kì í dá ọkùnrin tàbí obìnrin kankan sí láàyè, yóò sì kó àwọn àgùntàn, màlúù, kẹ́tẹ́kẹ́tẹ́, ìbakasẹ̀, àti aṣọ, yóò sì padà sí ọ̀dọ̀ Akiṣi.

¹⁰Akiṣi a sì máa béèrè pé, “Níbo ni o kọlù lónìí?” Dafidi a sì máa wí pé, “Negevu ti Juda,” “Negevu ti àwọn ará Jerahmeeli,” tàbí “Negevu ti àwọn ará Keni.”

¹¹Dafidi kì í dá ọkùnrin tàbí obìnrin kankan sí láàyè láti mú wá sí Gati, ó ń rò nínú ara rẹ̀ pé, “Wọ́n lè ròyìn wa, wí pé, ‘Èyí ni ohun tí Dafidi ṣe.’” Èyí ni ìṣe rẹ̀ ní gbogbo ìgbà tí ó gbé ní agbègbè àwọn Filistini.

¹²Akiṣi sì gba Dafidi gbọ́, ó ń rò pé, “Ó ti sọ ara rẹ̀ di ẹni ìkórìíra pátápátá lọ́dọ̀ àwọn ènìyàn rẹ̀ Israẹli; yóò sì jẹ́ ìránṣẹ́ mi láéláé.”