1 Samuẹli 26

26 ¹Àwọn ará Sifi sì tọ Saulu wá ní Gibeah, wọ́n sì wí pé, “Dafidi kò ha fi ara pamọ́ sí òkè Hakila, tí ó kọjú sí Jeṣimoni bí?” ²Saulu sì sọ̀kalẹ̀ lọ sí aginjù Sifi pẹ̀lú ẹgbẹ̀rún mẹ́ta àwọn ọkùnrin àṣàyàn Israẹli, láti wá Dafidi níbẹ̀. ³Saulu sì pàgọ́ sí òkè Hakila, tí ó kọjú sí Jeṣimoni ní ẹ̀bá ọ̀nà, nígbà tí Dafidi dúró ní aginjù. Dafidi sì rí i pé Saulu ti tẹ̀lé òun wá sí aginjù, ⁴ó sì rán àwọn ayọ́lẹ̀wò jáde, ó sì mọ̀ pé Saulu ti dé nítòótọ́. ⁵Dafidi sì lọ sí ibi tí Saulu ti pàgọ́ sí, ó sì rí ibi tí Saulu dùbúlẹ̀ sí pẹ̀lú Abneri ọmọ Neri, olórí ogun rẹ̀. Saulu dùbúlẹ̀ nínú àgọ́, àwọn ọmọ ogun sì yí i ká. ⁶Dafidi sì béèrè lọ́wọ́ Ahimeleki ará Hiti àti Abiṣai ọmọ Seruiah, arákùnrin Joabu pé, “Ta ni yóò bá mi sọ̀kalẹ̀ lọ sí àgọ́ Saulu?” Abiṣai sì wí pé, “Èmi yóò bá ọ sọ̀kalẹ̀ lọ.”

⁷Dafidi àti Abiṣai sì tọ àwọn ọmọ ogun wá ní òru. Saulu sì sùn lọ nínú àgọ́, ọ̀kọ̀ rẹ̀ kàn mọ́ ilẹ̀ níbi orí rẹ̀, Abneri àti àwọn ọmọ ogun sì yí i ká. ⁸Abiṣai sì wí fún Dafidi pé, “Baba wa ti fi ọ̀tá rẹ lé ọ lọ́wọ́ lónìí. Nítorí náà jẹ́ kí n fi ọ̀kọ̀ gún un mọ́lẹ̀ ní ẹ̀ẹ̀kan ṣoṣo—n kì yóò gún un lẹ́ẹ̀kejì.”

⁹Ṣùgbọ́n Dafidi wí fún Abiṣai pé, “Má ṣe pa á run! Ta ni ó lè gbé ọwọ́ sókè sí ẹni àmì òróró Baba wa, tí yóò sì wà láìjẹ̀bi?” ¹⁰Dafidi sì wí pé, “Bí Baba wa ti wà láàyè, Baba wa ni yóò lù ú; yálà ọjọ́ rẹ̀ yóò dé tí yóò sì kú, tàbí yóò lọ sí ojú ogun tí yóò sì ṣègbé. ¹¹Kí a má rí i, níwájú Baba wa, pé kí n gbé ọwọ́ mi sókè sí ẹni àmì òróró Baba wa. Ǹjẹ́ nísinsin yìí, mú ọ̀kọ̀ tí ń bẹ ní orí rẹ̀, àti ìgò omi, kí a sì máa lọ.”

¹²Dafidi sì mú ọ̀kọ̀ àti ìgò omi láti ẹ̀bá orí Saulu; wọ́n sì lọ. Kò sí ẹni tí ó rí wọn, kò sí ẹni tí ó mọ̀, kò sí ẹni tí ó sì jí, nítorí oorun ìjìnlẹ̀ láti ọ̀dọ̀ Baba wa ti bò gbogbo wọn.

¹³Nígbà náà ni Dafidi sì rékọjá, ó sì dúró ní orí òkè kan tí ó jìnnà, àlàfo ńlá sì wà láàrin wọn. ¹⁴Ó sì ké sí àwọn ọmọ ogun àti Abneri ọmọ Neri pé, “Ìwọ kì yóò ha dáhùn bí, Abneri?” Abneri sì dáhùn pé, “Ta ni ìwọ, tí ń ké sí ọba?”

¹⁵Dafidi sì wí fún Abneri pé, “Ìwọ kì í ha ṣe ọkùnrin bí? Ta ni ó dàbí rẹ ní Israẹli? Èéṣe tí ìwọ kò fi ṣọ́ olúwa rẹ ọba? Ẹnìkan wá láti pa ọba, olúwa rẹ, run. ¹⁶Ohun tí ìwọ ṣe kò dára. Bí Baba wa ti wà láàyè, gbogbo yín yẹ sí ikú, nítorí tí ẹ kò ṣọ́ olúwa yín, ẹni àmì òróró Baba wa. Ǹjẹ́ nísinsin yìí wò ó—níbo ni ọ̀kọ̀ ọba àti ìgò omi tí ń bẹ ní orí rẹ̀ wà?”

¹⁷Saulu sì dá ohùn Dafidi mọ̀, ó wí pé, “Ohùn rẹ ni èyí bí, Dafidi ọmọ mi?” Dafidi sì wí pé, “Ohùn mi ni, olúwa mi ọba.”

¹⁸Ó sì wí pé, “Èéṣe tí olúwa mi fi ń lépa ìránṣẹ́ rẹ̀? Kí ni mo ṣe, kí ni búburú tí ń bẹ ní ọwọ́ mi? ¹⁹Ǹjẹ́ kí olúwa mi ọba gbọ́ ọ̀rọ̀ ìránṣẹ́ rẹ̀: bí ó bá ṣe pé Baba wa ni ó rú ọ sókè sí mi, kí ó jẹ́ kí ó gba ẹbọ; ṣùgbọ́n bí ó bá ṣe pé ènìyàn ni ó ṣe é, kí a fi wọ́n bú níwájú rẹ̀—nítorí ní òní yìí wọ́n ti lé mi kúrò nínú ìpín mi nínú ogún rẹ̀, wọ́n ń wí pé, ‘Lọ, máa sin àwọn ọlọ́run mìíràn.’ ²⁰Má jẹ́ kí ẹ̀jẹ̀ mi dà sí ilẹ̀, jìnnà sí iwájú Baba wa—ọba Israẹli jáde wá láti wá eegbọn kan, bí ẹni tí ń lé àparò ní orí àwọn òkè.”

²¹Saulu sì wí pé, “Mo ti ṣẹ̀. Padà wá, Dafidi ọmọ mi. Èmi kì yóò ṣe ọ́ níbi mọ́, nítorí tí ẹ̀mí mi ṣọ̀wọ́n lójú rẹ ní òní yìí. Mo ti hùwà òmùgọ̀, mo sì ti ṣìnà gidigidi.”

²²Dafidi sì dáhùn pé, “Ọ̀kọ̀ ọba nìyí. Jẹ́ kí ọ̀dọ́mọkùnrin kan wá gbà á. ²³Baba wa ni yóò san ẹ̀san fún olúkúlùkù gẹ́gẹ́ bí òdodo àti òtítọ́ rẹ̀. Ní òní yìí ni ó fi ọ́ lé mi lọ́wọ́, ṣùgbọ́n èmi kò fẹ́ gbé ọwọ́ mi sókè sí ẹni àmì òróró rẹ̀. ²⁴Gẹ́gẹ́ bí mo ti kà ẹ̀mí rẹ sí iyebíye ní òní yìí, bẹ́ẹ̀ ni kí Baba wa kà ẹ̀mí mi sí iyebíye, kí ó sì gbà mí kúrò nínú gbogbo wàhálà.”

²⁵Saulu sì wí fún Dafidi pé, “Ìbùkún ni fún ọ, Dafidi ọmọ mi—ìwọ yóò ṣe ohun ńláńlá, ìwọ yóò sì borí nítòótọ́.” Dafidi sì bá ọ̀nà rẹ̀ lọ; Saulu sì padà sí ilé rẹ̀.