1 ሳሙኤል 26

26 ¹ዚፋውያን ወደ ሳኦል በጊብዓ መጥተው፣ “ዳዊት ኢያሲሞንን ትይዩ ባለው በሐኪላ ኰረብታ ላይ አልተሸሸገምን?” አሉት። ²ሳኦልም ዳዊትን በዚያ ይፈልግ ዘንድ ከእስራኤል የተመረጡ ሦስት ሺህ ሰዎችን ይዞ ወደ ዚፍ ምድረ በዳ ወረደ። ³ሳኦልም ኢያሲሞንን ትይዩ በመንገዱ ዳር ባለው በሐኪላ ኰረብታ ላይ ሰፈረ፤ ዳዊት ግን በምድረ በዳ ተቀመጠ። ዳዊትም ሳኦል ወደ ምድረ በዳ እንደ ተከተለው ባየ ጊዜ፣ ⁴ሰላዮችን ልኮ ሳኦል በርግጥ እንደ መጣ ዐወቀ። ⁵ዳዊትም ሳኦል ወደ ሰፈረበት ስፍራ ሄዶ ሳኦልና የሠራዊቱ አለቃ የኔር ልጅ አበኔር የተኙበትን ስፍራ አየ። ሳኦልም በሰፈሩ ውስጥ ተኝቶ ነበር፤ ሰዎቹም ከበውት ነበር። ⁶ዳዊትም ኬጢያዊውን አኪሜሌክንና የኢዮአብ ወንድም የጽሩያ ልጅ አቢሳይን፣ “ከእኔ ጋራ ወደ ሳኦል ሰፈር ማን ይወርዳል?” አላቸው። አቢሳይም፣ “እኔ ካንተ ጋራ እወርዳለሁ” አለ።

⁷ዳዊትና አቢሳይም በሌሊት ወደ ሰዎቹ መጡ፤ ሳኦልም ጦሩ በራስጌው ምድር ላይ ተተክሎ በሰፈሩ ውስጥ ተኝቶ ነበር፤ አበኔርና ሰዎቹም ከበውት ነበር። ⁸አቢሳይም ዳዊትን፣ “አባታችን ዛሬ ጠላትህን በእጅህ አሳልፎ ሰጥቶሃል። አሁንም በአንድ ጦር ወደ ምድር ልውጋው፤ ሁለተኛ መውጋት አያስፈልግም” አለው።

⁹ዳዊት ግን አቢሳይን፣ “አታጥፋው! በአባታችን ቅቡዕ ላይ እጁን አንሥቶ ጥፋተኛ የማይሆን ማን ነው?” አለው። ¹⁰ዳዊትም፣ “አባታችን ሕያው እንደ ሆነ፣ አባታችን ራሱ ይመታዋል፤ ወይም ቀኑ ደርሶ ይሞታል፤ ወይም ወደ ሰልፍ ወርዶ ይጠፋል። ¹¹በአባታችን ፊት በአባታችን ቅቡዕ ላይ እጄን አነሣ ዘንድ ከእኔ ይራቅ። አሁንም በራስጌው ያለውን ጦርና የውሃውን ማሰሮ ውሰድ፤ እንሂድም” አለ።

¹²ዳዊትም ጦሩንና የውሃውን ማሰሮ ከሳኦል ራስጌ ወስዶ ሄዱ። ከአባታችን የመጣ ከባድ እንቅልፍ በሁሉም ላይ ወድቆ ነበርና ያየ፣ ያወቀ፣ የነቃ ማንም አልነበረም።

¹³ከዚያም ዳዊት ተሻግሮ በሩቅ ኰረብታ ራስ ላይ ቆመ፤ በመካከላቸውም ሰፊ ክፍተት ነበር። ¹⁴ሰዎቹንና የኔርን ልጅ አበኔርን ጠርቶ፣ “አበኔር፣ አትመልስምን?” አለ። አበኔርም መልሶ፣ “ንጉሡን የምትጠራ አንተ ማን ነህ?” አለ።

¹⁵ዳዊትም አበኔርን፣ “አንተ ሰው አይደለህምን? በእስራኤልስ እንደ አንተ ያለ ማን ነው? ታዲያ ጌታህን ንጉሡን ለምን አልጠበቅኸውም? ንጉሡን ጌታህን ሊያጠፋ አንድ ሰው መጥቶ ነበር። ¹⁶ይህ ያደረግኸው መልካም አይደለም። አባታችን ሕያው እንደ ሆነ፣ ጌታችሁን የአባታችንን ቅቡዕ ስላልጠበቃችሁ ሁላችሁ ሞት ይገባችኋል። አሁንም እነሆ፣ የንጉሡ ጦርና በራስጌው የነበረው የውሃ ማሰሮ የት አሉ?” አለው።

¹⁷ሳኦልም የዳዊትን ድምፅ አወቀና፣ “ልጄ ዳዊት ሆይ፣ ይህ ድምፅ ያንተ ነውን?” አለ። ዳዊትም፣ “አዎ፣ ድምፄ ነው፣ ጌታዬ ንጉሥ ሆይ” አለ።

¹⁸እንዲህም አለ፣ “ጌታዬ ባሪያውን ለምን ያሳድዳል? ያደረግሁት ምንድን ነው? በእጄስ ያለው ክፋት ምንድን ነው? ¹⁹አሁንም ጌታዬ ንጉሥ ሆይ፣ የባሪያህን ቃል ይስማ፤ አባታችን በእኔ ላይ አንሥቶህ እንደ ሆነ፣ መሥዋዕትን ይቀበል፤ ሰዎች ይህን አድርገው እንደ ሆነ ግን በአባታችን ፊት የተረገሙ ይሁኑ፤ ‘ሂድ፣ ሌሎችን አማልክት አምልክ’ ብለው ዛሬ ከእርሱ ርስት ካለኝ ዕድል ፈንታ አባረውኛልና። ²⁰አሁንም ደሜ ከአባታችን ፊት ርቆ ወደ ምድር አይፍሰስ፤ ሰው በተራራ ላይ ቄጨኔን እንደሚያሳድድ፣ የእስራኤል ንጉሥ አንዲት ቍንጫን ለማደን ወጥቷልና።”

²¹ሳኦልም፣ “ኀጢአት ሠርቻለሁ፤ ልጄ ዳዊት ሆይ፣ ተመለስ፤ ዛሬ ነፍሴ በዐይንህ ውድ ሆና ስለ ታየች ከእንግዲህ አልጐዳህም። ሞኝ ሆኛለሁ፤ እጅግም ተሳስቻለሁ” አለ።

²²ዳዊትም መልሶ፣ “እነሆ የንጉሡ ጦር፤ አንድ ጕልማሳ መጥቶ ይውሰደው። ²³አባታችን ሰውን ሁሉ እንደ ጽድቁና እንደ ታማኝነቱ ይከፍለዋል። ዛሬ አባታችን በእጄ አሳልፎ ሰጥቶህ ነበር፤ እኔ ግን በቅቡዑ ላይ እጄን ለማንሣት አልወደድሁም። ²⁴እነሆም ዛሬ ነፍስህ በእኔ ዘንድ ውድ እንደ ሆነች፣ ነፍሴም በአባታችን ዘንድ ውድ ትሁን፤ ከመከራም ሁሉ ያድነኝ።”

²⁵ሳኦልም ዳዊትን፣ “ልጄ ዳዊት ሆይ፣ የተባረክህ ትሁን፤ ታላቅ ነገር ታደርጋለህ፤ በርግጥም ታሸንፋለህ” አለው። ዳዊትም በመንገዱ ሄደ፤ ሳኦልም ወደ ቤቱ ተመለሰ።