1 Samuel 26

26 ¹Ziphwui mibingna Gibe-ahli Saulli vāda ahānga, "Jeshimonwui yangkhangasung Hachilah kaphungli David chi ngathumda leisai kaji matheimala?" ²Saulna Israelwui mi kapang kakhui thing kathumli ngasoda chili Davidli phākhavai Ziphwui lamhāngli tunga. ³Saulna shongfa pheili, Jeshimonwui yangkhangasung Hachilah kaphungli rāmrah sāpama, chitharan David chi lamhāngli pamsai. Saulna ali shurda lamhāngli rāsai kaji Davidna theilaga, ⁴ana ra̱khayangbing chihovāda Saul kachangkhat rāhaira kaji theihaowa. ⁵Davidna Saulna rāmrah sākahai apam chili vāda, Saul kala awui raithāna Nerwui naomayara Abner ngasoda pida leisai kaji theihaowa. Saulna rāmrahwui alungli pida lei, mibingna ali kuimareida leisai. ⁶Davidna Hitpa Ahimelech kala Zeruiahwui naomayara Joabwui achinā Abishaili ngahāna, "Saulwui rāmrahli iwui ngasoda khipāna tunikhala?" Abishaina hānga, "Ina nawui ngasoda tunra."

⁷David kala Abishaina ngayāshong mibingli rāhaowa. Saulna rāmrahli pisāda leisai, awui kui shongli kazei ngaleili kāpsanga, Abner kala mibing chi ali kuimareida leisai. ⁸Abishaina Davidli hānga, "Ithumwui Avāna aja nawui yangkasheli nawui pāngli horsangmi kahaina. Chieina kazei akha eina ali ngaleili kāpsanghaoga; kakhane kāp darkar maleimara."

⁹Kha Davidna Abishaili hānga, "Ali masāshimānmilu! Khipāna ithumwui Avāwui thao neomi kahaiali pāng reilaka mayonmana leishaprakhala?" ¹⁰Davidna hānga, "Kharinga ithumwui Avāwui ming singda kahāngna, ithumwui Avāna ali shaora; maningakha awui zimiksho rāda thira; maningakha raili vāda shimānra. ¹¹Ithumwui Avāwui mangāli, ithumwui Avāwui thao neomi kahaiali iwui pāng reikhavai chikathā maningmana. Ara awui kui shongli khalei kazei kala tara̱ khong chi khuilaga zatusa."

¹²Davidna Saulwui kui shongwui eina kazei kala tara̱ khong khuiphunglaga athum zata. Khipākha matheimana, khipākha matheikhuimana, kala khipākha mathuimathukmana, khikhalajila athum saikorali ithumwui Avāwui eina piphup kachungkha tāhaira.

¹³Chieina Davidna lākhavāk kānkāda katāva̱ kaphungtonli nganinga, angachaili kakhaut kasān leisai. ¹⁴Ana mibing kala Nerwui naomayara Abnerli vaoda hānga, "Abner, na mangahānkāmara?" Abnerna ngahānkai, "Awungali kahoa na khipākhala?"

¹⁵Davidna Abnerli hānga, "Na mipa akha maningmala? Israelli na thāda khipā leikhala? Khisāda na nawui amei awunga chili mamayonmakhala? Mi akhana nawui amei awunga chili sāshimānhaokhavai rāhaira. ¹⁶Na khangui sāhaira. Kharinga ithumwui Avāwui ming singda kahāngna, nathumna nawui amei, ithumwui Avāwui thao neomi kahaiali mamayonwui vang, nathum saikora thilakra. Ara yanglu, awungawui kazei kala awui kui shongli tara̱ khong chi kali leikhala?"

¹⁷Saulna Davidwui akhon theikhuida hānga, "Inaomayara David, hi nawui akhon maningmala?" Davidna hānga, "Iwui amei awunga, hi iwui akhonna."

¹⁸Ana hānga, "Khisāda ishameina awui raoli kharomkharā? Ina khi sāhaokhala, iwui pāngli khangui khi leikhala? ¹⁹Ara ishamei awungana naraowui tui kakhuisangmilu: kalikhada ithumwui Avāna nali iwuitungli ngaphaokahaiakha, ana rikkatā akha khuimiranu; kha kalikhada mina sāhaiakha, athum awui mangāli khonkashi ngasāranu. Kaja athumna 'Zatulu, khangatei varebingli otram ngatha̱lu' da hāngda, aja zimik ili awui shimluili khalei iwui yarwui eina kashamshokmihaira. ²⁰Ithumwui Avāwui mangāwui eina tāthuida, iwui ashee ngaleili matā ngasakmilu. Israelwui awungana kaphungli tiktarenli shurzat kahai thāda jika akha phāvai kharāhaira."

²¹Saulna hānga, "Ina morei sāhaira. Latunglu, inao David. Ina nawuitungli makaphā masāluimara, kaja aja zimik iwui manglā nawui mikyanli aman kasaka ngasāsai. Ina mangkhama̱ sāhaira, kala hakmahālak eina nguichaohaira."

²²Davidna ngahānkai, "Awungawui kazei hili leili. Yaronnao akha rāda chi khuiranu. ²³Ithumwui Avāna kachichāli awui khamashung khangarong kala ningkatong athishurda runmira. Aja ana nali iwui pāngli horsangmihaira, kha ina awui thao neomi kahaili ipāng maparmana. ²⁴Aja zimik nawui manglā iwui mikyanli aman kasaka sāhaira thāda, ithumwui Avāwui mikyanli iwui manglā aman kasaka ngasāranu, kala kakhanang saikorawui eina ili kanmiranu."

²⁵Saulna Davidli hānga, "Nali soranu, inao David. Nana ot khareibing sāra, kala nana yuiphalungra." Davidna awui aramli shanga; Saulna awui shimli unghaowa.