1 சாமுவேல் 27

27 ¹தாவீது தன் மனதிலே: “ஒருநாள் நான் சவுலின் கையினால் அழிக்கப்பட்டுப்போவேன். பெலிஸ்தரின் தேசத்திற்கு உடனே தப்பியோடிப்போவதைத் தவிர எனக்கு நல்லது வேறொன்றுமில்லை. அப்பொழுது இஸ்ரவேலின் எல்லைகளில் எங்கும் என்னைத் தேடுவதை சவுல் கைவிடுவான்; நான் அவன் கைக்குத் தப்பிப்பேன்” என்று நினைத்தான். ²தாவீது புறப்பட்டு, தன்னோடிருந்த அறுநூறு பேரோடுங்கூட, காத் ஊரின் ராஜாவாகிய மாகோகின் மகன் ஆகீசினிடத்திற்குக் கடந்துபோனான். ³தாவீதும் அவனுடைய மனுஷரும் அவரவர் தங்கள் குடும்பத்தோடே காத் ஊரிலே ஆகீசினிடத்தில் தங்கியிருந்தார்கள்; தாவீது தன் இரண்டு மனைவிகளாகிய யெஸ்ரயேல் ஊராளாகிய அகினோவாமோடும், நாபாலின் விதவையாகிய கர்மேல் ஊராளாகிய அபிகாயிலோடும் இருந்தான். ⁴தாவீது காத் ஊருக்கு ஓடிப்போனான் என்று சவுலுக்கு அறிவிக்கப்பட்டபோது, அவன் இனி அவனைத் தேடவில்லை.

⁵தாவீது ஆகீசை நோக்கி: “உம்முடைய கண்களில் எனக்குத் தயவு கிடைத்ததானால், நாட்டுப்புற ஊர்களில் ஒன்றில் நான் குடியிருக்க எனக்கு ஒரு இடம் தாரும்; உம்முடைய அடியான் உம்மோடேகூட ராஜதானி நகரத்தில் ஏன் குடியிருக்கவேண்டும்?” என்றான். ⁶அந்நாளில் ஆகீஸ் அவனுக்கு சிக்லாகைக் கொடுத்தான்; ஆகையால் சிக்லாக் இந்நாள்வரைக்கும் யூதாவின் ராஜாக்களுக்கு உரியதாயிற்று. ⁷தாவீது பெலிஸ்தரின் தேசத்தில் குடியிருந்த காலம் ஒரு வருஷமும் நான்கு மாதமுமாயிருந்தது.

⁸தாவீதும் அவன் மனுஷரும் போய், கேசூரியரையும், கிர்சியரையும், அமலேக்கியரையும் மேல்கொண்டு தாக்கினார்கள்; ஏனெனில் அவர்கள் சூருக்குப்போகிற வழியில் எகிப்து தேசம்வரைக்கும் பூர்வகாலமுதல் அந்தத் தேசத்தில் குடியிருந்தவர்கள். ⁹தாவீது அந்தத் தேசத்தைத் தாக்கும்போதெல்லாம், ஆண்களையாகிலும் பெண்களையாகிலும் உயிரோடே வைக்காமல், ஆடுமாடுகளையும், கழுதைகளையும், ஒட்டகங்களையும், வஸ்திரங்களையும் எடுத்துக்கொண்டு, ஆகீசினிடத்திற்குத் திரும்பிவருவான்.

¹⁰“இன்று எந்த இடத்தில் தாக்குதல் நடத்தினீர்கள்?” என்று ஆகீஸ் கேட்பான்; அதற்குத் தாவீது: “யூதாவின் தென்திசையிலே” என்றும், “யெராமியேலரின் தென்திசையிலே” என்றும், “கேனியரின் தென்திசையிலே” என்றும் சொல்லுவான்.

¹¹“இவர்கள் நம்மைக்குறித்து: ‘தாவீது இப்படிச் செய்தான்’ என்று அறிவித்துவிடுவார்களே” என்று நினைத்து, காத் ஊருக்குக் கொண்டுவரும்படி தாவீது ஆண்களையாகிலும் பெண்களையாகிலும் உயிரோடே வைக்கவில்லை; அவன் பெலிஸ்தரின் தேசத்தில் குடியிருந்த காலமெல்லாம் இதுவே அவனுடைய வழக்கமாயிருந்தது.

¹²“இவன் தன் ஜனமாகிய இஸ்ரவேலருக்கு முற்றிலும் அருவருப்பானான்; ஆகையால் இவன் என்றைக்கும் என் அடியானாயிருப்பான்” என்று நினைத்து, ஆகீஸ் தாவீதை நம்பினான்.