Dhavidhi Asabisala Pakati pa Afilistiya

Pakudziwa kuti Sauli anadzamkwata ndzidzi unango, Dhavidhi athawira kuna Akixi wa ku Gati mbapaswa Zikilagi. Iye aphonya mitundu ya kumwera, apha mboni zonsene, mbauza Akixi kuti akhaphonya Yuda. Akixi amkhulupira kakamwe. Palibe cinthu cakutendeka pano, ndipo malemba alonga pyenepi mwakubveka.

Kapitulu 27.

Dhavidhi aganiza mu ntima mwace tenepa: “Ntsiku inango ndinamala kufudzwa na manja a Sauli. Nkhabe cinthu cadidi kuna ine kupiringana kuthawa mwakucimbiza ku dziko ya Afilistiya. Na tenepo Sauli analeka kundisaka m'mbuto zonsene za malire a Izarayeli, mbandipulumuka m'manja mwace.” Na tenepo Dhavidhi abuluka mbawambuka, iye na amuna magana matanthatu akhali na iye, mbaenda kuna Akixi mwana wa Maoki, mambo wa Gati. Dhavidhi akhakhala na Akixi ku Gati, iye na amuna ace, m'bodzi na m'bodzi na banja yace—Dhavidhi na akazi ace awiri, Ahinoami wa ku Djezireeli na Abhigayili wa ku Karmeli, nzice wa Nabhali. Sauli pidapangwa iye kuti Dhavidhi adathawira ku Gati, iye aleka kun'saka pontho.

Dhavidhi apanga Akixi tenepa: “Mungandikomera ntima, ndipaseni mbuto mu nzinda unango wa kumunda toera ndikhalemo. Thangwi yanji ntumiki wanu akhale na imwe mu nzinda wa umambo?” Pa ntsiku ineyi Akixi am'pasa Zikilagi; natenepa Zikilagi ndi wa amambo a Yuda mpaka lero. N'dzidzi onsene udakhala Dhavidhi mu dziko ya Afilistiya ukhali caka cibodzi na miyezi minai.

Dhavidhi na amuna ace akwira mbaenda kuphanga Agesuri, Agirizi na Amaleki, thangwi iwo akhakhala m'dziko ineyi kubulukira kale, kuelekera ku Suri mpaka ku dziko ya Edjitu. N'dzidzi onsene udamenya Dhavidhi dziko ineyi, nee asiya mamuna peno nkazi maso, mbakwata mabira, ng'ombe, maburu, ngamiya na nguwo, buluka penepo mbabwerera kuna Akixi.

Akixi akhabvundza tenepa: “Lero mwaphanga kupi?” Dhavidhi akhalonga: “Ku Negebe wa Yuda,” peno “ku Negebe wa Ayerameeli,” peno “ku Negebe wa Akeni.”

Dhavidhi nee asiya mamuna peno nkazi maso toera kuwaendesa ku Gati, mbaganiza tenepa: “Panango anatipanga, mbalonga: ‘Pyenepi ndi pidacita Dhavidhi.’” Umu ndi mukhacitira iye n'dzidzi onsene udakhala iye mu dziko ya Afilistiya.

Akixi akhan'nyindira Dhavidhi, mbaganiza tenepa: “Iye acita toera kuipirwa kakamwe na mbumba yace ya Izarayeli; iye anakhala ntumiki wanga kwenda na kwenda.”