1 USamuweli 27

27 ¹UDavide wacabanga wathi: “Ngolunye usuku ngiyakukhukhulwa yisandla sikaSawule. Akukho okungcono kimi kunokuba ngiphephele masinyane ezweni lamaFilisti. Khona-ke uSawule uyakuyeka ukungifuna kuyo yonke imikhawulo yakwa-Israyeli, ngiphunyuke esandleni sakhe.” ²UDavide wasuka wawela, yena namadoda angamakhulu ayisithupha ayenaye, waya ku-Akhishi indodana kaMahowoki, inkosi yaseGati. ³UDavide wahlala no-Akhishi eGati, yena namadoda akhe, kwaba yilowo nalowo nendlu yakhe—uDavide nabafazi bakhe bobabili, u-Ahinowamu waseJizreyeli no-Abhigayili waseKarmeli, umfelokazi kaNabali. ⁴Kwathi uSawule esetsheliwe ukuthi uDavide ubalekele eGati, akabe esamfuna.

⁵UDavide wathi ku-Akhishi: “Uma ngithole umusa emehlweni akho, mangiphiwe indawo komunye wemizi yasemaphandleni ukuba ngihlale kuwo. Ngani ukuba inceku yakho ihlale nawe emzini wobukhosi?” ⁶Ngalolo suku u-Akhishi wamnika iZikilagi; ngalokho iZikilagi iye yaba ngeyamakhosi akwaJuda kuze kube namuhla. ⁷Isikhathi uDavide asihlala ezweni lamaFilisti saba ngunyaka nezinyanga ezine.

⁸UDavide namadoda akhe benyuka bahlasela amaGeshuri, namaGirizi, nama-Amaleki, ngokuba laba babehlala kulelo zwe kwasendulo, ngasempumalanga eShuri kuze kufike ezweni laseGibhithe. ⁹Njalo lapho uDavide ehlasela izwe, wayengashiyi ndoda namfazi ophilayo, athathe izimvu, nezinkomo, nezimbongolo, namakamela, nezingubo, abuyele ku-Akhishi.

¹⁰U-Akhishi wayebuza athi: “Nihlasele kuphi namuhla?” UDavide wayethi: “ENegevu yakwaJuda,” noma “eNegevu yamaJerameli,” noma “eNegevu yamaKheni.”

¹¹UDavide wayengashiyi ndoda namfazi ophilayo ukuba amlethe eGati, ecabanga ethi: “Bangase basicebe, bathi: ‘Nakhu akwenzile uDavide.’” Lokhu kwaba ngumkhuba wakhe sonke isikhathi ahlala ngaso ezweni lamaFilisti.

¹²U-Akhishi wamethemba uDavide, ecabanga ethi: “Usezenze wanyanyeka nya kubantu bakubo kwa-Israyeli; uyakuba yinceku yami kuze kube phakade.”