Kweekto Kwanda Daudi eng' Lugeet
Ki yan kiptainigap Philistiik koba Daudi eng' let, kobwaatei kole imuuchi koweekyigei icheek eng' kwenutap pooryeet si koweekyigei chamyetap mastanyi ne tai. Ki iweekyi Akis, ne iyani Daudi komugul, ineendet koba gaa, koteet; ki nereekyi Daudi, ago ki riip Kwandanyo ineendet komabore Israel.
29 1Ki iyum anyun Philistiik lugeekwak tugul eng' Apek, ago ki teech Israel ye tokyingei kondap peek eng' Jezreel. 2Ye ki bokte kiptainigap Philistiik eng' pogolwogik ak eliphuusyek, ko ki pa Daudi ak piikyik patai kobooto Akis.
3Ki teebe kiptainigap Philistiik kole, “Yaei nee Yahudichu yu?” Koleenji Akis icheek, “Daudi niito, otwogindetap Saulo laitoryatap Israel. Ki mi kobooto anee peetuusyechu, acha, kenyisyechu, ak komang'une peetuut ne ki punu ole ami kot koit nguno, ma anyoor lelutyet eng' ineendet.”
4Ago ki nereekyi kiptainigap Philistiik ineendet ak kole, “Iweekyi chiichooto koba ole ki igoochi. Mat koba lugeet kobooto acheek, si matun koweekyigei acheek eng' pooryeet. Amu egundoi ano koweekyigei chamyetap kiptaiyandennyi, ngo ma eng' metiinwegap piikyok? 5Tos ma niito Daudi ne ki tyenjini piik eng' ureryosyekwak kole, ‘Kibar Saulo eliphusyekyik, ago kobar Daudi tamanusyegap eliphuusyek’?”
6Ki guur anyun Akis Daudi ak koleenji, “Ko uu ye sabei Kamuktaindet ne Toroor, ii chiito ne po iman, ak kaboiboitu amache ibendi ak inyone kobooto anee eng' nganaseet. Amu ma anyoor lelutyet eng' inyee komang'une peetuut ne ki inyone ole ami kot koit nguno. Ago ma chamin kiptainichooto. 7Weekyigei anyun ak iwe eng' kaalyeet, si matun iyai kiy age tugul ne ma chamei kiptainigap Philistiik.”
8Ki le Daudi, “Ago nee ne kaayai? Nee ne kainyooru eng' anee otwogeng'ung' komang'une peetuut ne ki anyonu ole imi kot koit nguno, si matun abe abargei ak puunigap kiptaiyandennyu laitoryat?”
9Kowolji Akis Daudi kole, “Angen ale ii myee eng' anee ko uu malaikaiyatap Kamuktaindet. Ago kagole kiptainigap Philistiik, ‘Mat kotogosta kobooto acheek koba lugeet.’ 10Ng'eet anyun karon miising', inyee ak otwogigap kiptaiyandeng'ung' che ki bwa kobooto inyee; ong'eet karon ak owe ye kaeech.”
11Ki ng'eet anyun Daudi ak piikyik karon koweekyigei emetap Philistiik, kingo kagoeech; ago ki togosta Philistiik koba Jezreel.