Otsak 13

13 ¹Antiochli khalei churchli Barnabas, Niger da kaphoka Simeon, Cyrenewui Lucius, khamunga Herodwui ring katang khavāknao Manaen, kala Saul kaji marānbing eina ojābing leisai.

²Athumna Proho Jishuli khoruma kala khumkapam sāda leilakha, Manglā Katharana hānga, "Ina athumli hokhui kahai ot chiwui vang, iwui vang Barnabas eina Saulli phaishokhailu."

³Chieina, khumkapam kala seihā sākahaiwui thili, athumna aniwuitungli pāng parrorda chihovāhaowa.

Avāwui Tui Cyprusli Vākashung

⁴Manglā Katharana chihovā kahai anina Seleuciali vaida, chiwui thili marikhong tonglaga Cyprusli vāhaowa. ⁵Salamisli vākashung eina, athumna ithumwui Avāwui tui Jihudiwui synagoguebingli hāshoka. John chi aniwui ngachonkhamena. ⁶Yikuiram katonga Paphosli kānhailaga, athumna Bar-Jishu da kaho Jihudi mahei kathem eina shokta marān akha samphanga, ⁷a thangkhamei mi governor Sergius Paulli ngasopamsai. Ana ithumwui Avāwui tui shā khavai Barnabas eina Saulli hokhui. ⁸Mahei kathem Elymasna (chi awui aming kakhalatna) athumli ngakaishida, governorli shitkasangwui eina pākhaimi khavai khangarān sai. ⁹Kha Paulla kaphoka Saulna Manglā Kathara eina pemtinghaida ali panglāk eina yanga, ¹⁰kala hānga, "Na chipeewui naomayara, khamashung khangarong saikorawui yangkashe, mikhanam eina kapik katonga eina pemting kahai mi, na ithumwui Avāwui shongfa ngarong chi kahaikazata ngasaki chi katang mathāhailakla? ¹¹Ara yanglu: nawuili ithumwui Avāwui pāng lei. Na atam kaikhathang mik khangapeo ngasāda, zimik matheira." Chieina ngalāngda leichui eina tangkhamang awuitungli phanhaowa; ana kuimareida saza̱phāda, ali pāng eina thānvai khavai kachikathā phāzata.

¹²Shokkahai chi kathei tharan, governorna Proho Jishuwui tamkachithei chili matakhakhaoda shitsanga.

Avāwui Paokaphā Antiochli Hāshoka

¹³Paul eina awui ngasotnaobingna Paphoswui eina marikhong tonglaga Pamphylliawui Pergali vai, kha Johnna athumli nothāhailaga Jerusalemli latunga. ¹⁴Pergawui eina athumna Pisidiawui Antiochli vāzanga. Sabbaththang athumna synagogueli azangda pama. ¹⁵Ain eina Marānbingwui tui pākahaiwui thili, synagoguewui akhokabingna pao hāngchiphunda hānga, "Ivānaobing, nathumna mibingwui vang kasatkasang tui akha leiakha, hānglu."

¹⁶Paulna nganingda, apāng khayitlaga hānga, "Israelwui mibing, kala ithumwui Avāli khangacheebing, nganālu. ¹⁷Hi Israel mibingwui Avā, ithumwui Avāna ithumwui avā ngarāli kapangkhuida, Egypt ngaleili pamda leilakha athumli hakmei ngasaka, kala pāngthei pangkahai eina athumli thānshokmi. ¹⁸Kala zingkum hangmati shakha lamhāngli ana athumli ningtangda leimi. ¹⁹Canaanli yur shini sāshimānda, athumwui ngalei chi shimlui sāda athumli yara. ²⁰Hi saikora chi zingkum shāmati hangphangā sha̱khana. Chiwui thili Samuel marānwui atam eina tangda ana athumli bichar kasābing haimi. ²¹Chiwui thili athumna awunga akha poi, kala ithumwui Avāna Benjamin shangwui Kishwui nao Saulli zingkum hangmati athumli mi. ²²Ali huikhui kahaiwui thili, ana athumwui awunga sāda Davidli khāngmi, shākhi mida hānga: 'Ina iwui wuklung athishurwui mi akha, Jessewui nao Davidli phāhaira; ana iwui ningkachāng saikora sāra.' ²³Ithumwui Avāna ngashit kahai athishurda hi miwui ara̱-azā eina Israelli Huikhame Jishuli khuirai. ²⁴Jishu marāwui mangāli, Johnna Israel mi saikorali ningngateikhui ra̱hik chi pao hāshoka. ²⁵Johnna awui apong kup khavai sātharan, ana hānga, 'Ina khipā ngasāra da nathumna phaningkhala? I chi maningmana. Kha yanglu, iwui thili mi akha rāra; awui pheihop khalāmi khavai I matik machāmana.'

²⁶"Ichināngarā, Abrahamwui shimkhurwui naomayarabing, kala nathumwui ngachaili ithumwui Avāli khangachee mibing: hi huikhamiwui pao chi ithumli chihovā kahaina. ²⁷Jerusalemwui mibing kala athumwui akhavābingna ali matheimana, kala sabbaththang khachida pāhai marānbingwui tui chila matheirarmana. Ali danti mida athumna chi tuibing chi ungshung ngasaka. ²⁸Awui thiwui vang khayon akhala masamphanglala, athumna Pilateli ali shaothat khavai poi. ²⁹Awui pongli kapihai saikora chi kup kahaiwui thili, athumna ali thingwui eina khuiunglaga chikhur akhali chipam. ³⁰Kha ithumwui Avāna ali kathiwui eina ringshok ngasaka, ³¹ana ngashun kachungkha, Galileewui eina Jerusalemli ana ngasoda kahaibingli awui azak chitheimi; athum arui mibingwui mangāli awui shākhina. ³²Kala ithumwui Avāna ishāvā ngarāli ngashit kahai chi ithumna nathumli paokaphā sāda hāngmi.

³³Jishuli ringngasakta athumwui naomayarabing ithumwui vang ana hi ungshung ngasaka; Laa 2li hithada kapihai: 'Na iwui Naomayarana; aja ina nali pharai.'

³⁴Kala ali kathiwui eina ringngasakta, katang chikhurli mashuitā ngasakchingmara kaji pongli, ana hithada hānga, 'Davidli ngashit kahai kathara kala mangapatmana sokhamibing chi ina nathumli mira.' ³⁵Chiwui vang eina ana laa khangatei akhalila hānga: 'Nawui Katharapa chili chikhurli mashuitā ngasakmara.' ³⁶Kaja Davidna awui thotli ithumwui Avāwui kaphaning athishurda ot sākup kahai thili, piphuphaowa, awui avā ngarāli ngasoda chifahaowa, kala chikhur mashuitā theihaowa, ³⁷kha ithumwui Avāna ringngasakta mipā chiya chikhur mashuitā matheimana. ³⁸Chiwui vang eina ivānaongarā, hi theilu: mipā hiwui mangā eina morei pheomi chi nathumli hāshokmihaira, ³⁹Awui mangā eina shitkasanga mi kachiva̱li, Moseswui ain eina nathumli ningkhān ngasak matheikasā saikorawui eina ningkhān ngasakhaira. ⁴⁰Chiwui vang eina, marānbingwui chithili hānghaikasā chi nathumli mashok khavai ningngasharlu: ⁴¹'Yanglu, nathum mashātkatheibing, matakhak sāda shimānra; kaja ina nathumwui atamli ot akha sāda lei; chi kachikathāna nathumli hānglala nathumna katang mashitsangmara kaji otna.'"

⁴²Paul eina Barnabas kashok tharan, mibingna athumli akhama sabbaththang tui hibingwui pongli latluida matui khavai poi. ⁴³Synagoguewui kazip peikahai tharan, Jihudi kachungkha kala shitkasanga Jihudi onkahaibing kachungkhana Paul eina Barnabasli shura; anina athumli ngasoda tui matuilaga ithumwui Avāwui lukhamashanli leiching khavai kasatsanga.

⁴⁴Akhama sabbaththang keinung mi katonga shakha ithumwui Proho Jishuwui tui nganā khavai rākazipa. ⁴⁵Jihudibingna mi kachungkha chi theida, yuikashina pemtinghaowa, kala Paulwui tui chi ngakaikashi sāda, ali kachipat tui matui.

⁴⁶Paul eina Barnabasna pinglak eina matui: "Ithumwui Avāwui tui nathumli rida hāngphalungra kajina. Nathumna chi horhaida, nathum khalattali katang makhavai kharingwui vang makakā da bichar sāhai tharan, yanglu, ithumna Gentilebingli zanghaira."

⁴⁷Kaja ithumwui Avāna ithumli hāngchithei: "Okathui apam peichaoda huikhami khuikharā khavai, ina nali Gentilebingli kahor sākahaina."

⁴⁸Hi shālaga Gentilebing ringphāda ithumwui Proho Jishuwui tuili sochikata; katang makhavai kharingwui vang kapangkhui kahaibing saikorana shitsanga. ⁴⁹Kala ithumwui Proho Jishuwui tui china ngalei chi apam hupta ngayaovai. ⁵⁰Kha Jihudibingna shitkasanga kala kāshunglak kahaiya sha̱nao kala keinungwui akhavābingli thara̱sanglaga, Paul eina Barnabaswuitungli rekharek mathuk ngasaka, kala anili aramwui eina khuishokserhaowa. ⁵¹Chieina anina aniwui pheiwui chifa athumli khayitsanghaida, Iconiumli vai. ⁵²Kala sākhangatha̱bing khamathān kala Manglā Katharana pemtinghaowa.