Matendo ya Mitume 13

13 ¹Katika kanisa la Antiokia walikuwako manabii na waalimu: Barnaba, na Simeoni aitwaye Nigeri, na Lukio Mkirene, na Manaeni (aliyekuwa mwenzi wa Herode mfalme tangu utoto), na Sauli.

²Walipokuwa wakimwabudu Bwana wetu Yesu na kufunga, Roho Mtakatifu akasema, "Nitengeeni Barnaba na Sauli kwa kazi ile niliyowaitia."

³Ndipo, baada ya kufunga na kuomba, wakaweka mikono yao juu yao, wakawaacha waende zao.

Neno la Baba Lafika Kipro

⁴Basi, wakiwa wametumwa na Roho Mtakatifu, wakateremkia Seleukia, na kutoka huko wakasafiri kwa meli mpaka Kipro. ⁵Walipofika Salami, wakalihubiri neno la Baba yetu katika masinagogi ya Wayahudi. Nao walikuwa na Yohana kuwa msaidizi wao. ⁶Walipokwisha kupita kisiwa chote mpaka Pafo, wakamkuta mchawi mmoja Myahudi, nabii wa uongo, jina lake Bar-Yesu, ⁷aliyekuwa pamoja na liwali Sergio Paulo, mtu mwenye akili. Huyu akawaita Barnaba na Sauli, akitaka kulisikia neno la Baba yetu. ⁸Lakini Elima yule mchawi—maana ndiyo tafsiri ya jina lake—akawapinga, akitaka kumgeuza liwali aiache imani. ⁹Ndipo Sauli, ambaye pia aliitwa Paulo, akijaa Roho Mtakatifu, akamkazia macho, ¹⁰akasema, "Ewe mwana wa Ibilisi, adui wa haki yote, uliyejaa hila zote na madanganyo yote—je, hutaacha kuzipotosha njia zilizonyooka za Baba yetu? ¹¹Sasa, tazama, mkono wa Baba yetu u juu yako. Nawe utakuwa kipofu, usilione jua kwa muda." Mara ukampata ukungu na giza; akaenda huku na huku akipapasa, akitafuta mtu wa kumshika mkono kumwongoza.

¹²Yule liwali, alipoona lililotukia, akaamini, akishangaa kwa mafundisho ya Bwana wetu Yesu.

Habari za Baba Zatangazwa Antiokia

¹³Paulo na wenzake wakasafiri kwa meli kutoka Pafo wakafika Perga katika Pamfilia, lakini Yohana akawaacha, akarudi Yerusalemu. ¹⁴Nao kutoka Perga wakaendelea mpaka Antiokia ya Pisidia. Siku ya Sabato wakaingia sinagogini, wakaketi. ¹⁵Baada ya kusomwa kwa Torati na Manabii, wakuu wa sinagogi wakatuma ujumbe wakisema, "Ndugu, kama mna neno la kuwafariji watu, semeni."

¹⁶Paulo akasimama, akapunga mkono wake, akasema, "Enyi watu wa Israeli, nanyi mnaomcha Baba yetu, sikilizeni. ¹⁷Baba yetu, Baba wa watu hawa Israeli, aliwachagua baba zetu, akawakuza walipokuwa wakikaa katika nchi ya Misri, akawatoa humo kwa mkono ulioinuliwa. ¹⁸Naye kwa muda wa kama miaka arobaini akawavumilia jangwani. ¹⁹Baada ya kuyaangamiza mataifa saba katika nchi ya Kanaani, akawapa nchi yao iwe urithi. ²⁰Hayo yalichukua kama miaka mia nne na hamsini. Kisha akawapa waamuzi mpaka Samweli nabii. ²¹Baadaye wakaomba wapewe mfalme, naye Baba yetu akawapa Sauli mwana wa Kishi, mtu wa kabila la Benyamini, kwa muda wa miaka arobaini. ²²Alipokwisha kumwondoa, akamwinua Daudi awe mfalme wao, akashuhudia habari zake, akisema, 'Nimemwona Daudi mwana wa Yese, mtu anayeupendeza moyo wangu, atakayefanya yote nitakayo.' ²³Katika uzao wa mtu huyu, Baba yetu amemletea Israeli Mwokozi, yaani Yesu, kama alivyoahidi. ²⁴Kabla ya kuja kwake, Yohana alikuwa amehubiri ubatizo wa toba kwa watu wote wa Israeli. ²⁵Naye Yohana alipokuwa akimaliza mwendo wake, akasema, 'Mwanidhani mimi kuwa nani? Mimi siye. Lakini tazama, yuaja nyuma yangu mmoja ambaye sistahili kuzilegeza kamba za viatu vya miguu yake.'

²⁶"Ndugu, wana wa jamaa ya Ibrahimu, nanyi walio kati yenu mnaomcha Baba yetu: ujumbe huu wa wokovu umetumwa kwetu. ²⁷Kwa maana wenyeji wa Yerusalemu na wakuu wao hawakumtambua, wala hawakuyafahamu maneno ya manabii yanayosomwa kila Sabato—kwa kumhukumu, wakayatimiza maneno hayo hasa. ²⁸Ijapokuwa hawakuona sababu yo yote ya kumwua, walimwomba Pilato auawe. ²⁹Nao walipokwisha kuyatimiza yote yaliyoandikwa juu yake, wakamshusha kutoka mtini, wakamlaza kaburini. ³⁰Lakini Baba yetu akamfufua kutoka kwa wafu, ³¹naye kwa siku nyingi akawatokea wale waliokwea pamoja naye kutoka Galilaya mpaka Yerusalemu, ambao sasa ni mashahidi wake kwa watu. ³²Nasi twawaletea habari njema, ya kwamba ile ahadi Baba yetu aliyowaahidia baba zetu,

³³ametutimizia sisi, watoto wao, kwa kumfufua Yesu, kama ilivyoandikwa pia katika Zaburi ya pili: 'Wewe ndiwe Mwanangu; leo mimi nimekuzaa.'

³⁴Na kwa habari ya kule kumfufua kutoka kwa wafu, asirudi tena kuoza, alisema hivi, 'Nitawapa baraka takatifu na za hakika alizoahidiwa Daudi.' ³⁵Kwa sababu hiyo asema pia katika zaburi nyingine, 'Hutamwacha Mtakatifu wako aone uozo.' ³⁶Kwa maana Daudi, akiisha kulitumikia kusudi la Baba yetu katika kizazi chake, alilala, akawekwa pamoja na baba zake, akaona uozo, ³⁷lakini yeye aliyefufuliwa na Baba yetu hakuona uozo. ³⁸Basi, ndugu, jueni jambo hili—ya kwamba kwa huyu mtu msamaha wa dhambi unahubiriwa kwenu, ³⁹na kwa yeye, kila aaminiye anafunguliwa katika yote yale ambayo torati ya Musa isingeweza kuwafungua. ⁴⁰Angalieni, basi, lisije likawapata lile lililonenwa katika Manabii: ⁴¹'Tazameni, enyi wenye dharau, mkastaajabu na kupotea; kwa maana natenda kazi katika siku zenu, kazi ambayo hamtaiamini kabisa, hata mtu akiwaeleza.'"

⁴²Paulo na Barnaba walipokuwa wakitoka, watu wakawasihi wanene maneno haya tena Sabato iliyofuata. ⁴³Mkutano wa sinagogi ulipokwisha, Wayahudi wengi na waongofu watauwa wa dini ya Kiyahudi wakafuatana na Paulo na Barnaba, ambao walisema nao, wakawasihi wadumu katika neema ya Baba yetu.

⁴⁴Sabato iliyofuata mji karibu wote ukakusanyika kulisikia neno la Bwana wetu Yesu. ⁴⁵Lakini Wayahudi walipowaona makutano, wakajaa wivu, wakayapinga maneno ya Paulo, wakimtukana.

⁴⁶Paulo na Barnaba wakanena kwa ujasiri, wakasema, "Ilikuwa lazima neno la Baba yetu linenwe kwenu kwanza. Lakini kwa kuwa mnalikataa, mkijihukumu wenyewe kuwa hamstahili uzima wa milele, tazameni, twawageukia watu wa Mataifa.

⁴⁷Kwa maana ndivyo Baba yetu alivyotuamuru, 'Nimekuweka uwe nuru ya mataifa, upate kuuleta wokovu hata miisho ya dunia.'"

⁴⁸Watu wa Mataifa waliposikia hayo, wakafurahi, wakalitukuza neno la Bwana wetu Yesu; nao wote waliokuwa wamekusudiwa uzima wa milele wakaamini. ⁴⁹Na neno la Bwana wetu Yesu likaenea katika nchi ile yote. ⁵⁰Lakini Wayahudi wakawachochea wanawake wacha Mungu wenye cheo na wakuu wa mji, wakachochea mateso juu ya Paulo na Barnaba, wakawafukuza watoke katika mipaka yao. ⁵¹Nao wakawakung'utia mavumbi ya miguu yao, wakaenda Ikonio. ⁵²Na wale wanafunzi wakajaa furaha na Roho Mtakatifu.