ሐዋርያት ሥራ 13

13 ¹በአንጾኪያ ቤተ ክርስቲያን ነቢያትና አስተማሪዎች ነበሩ፤ እነርሱም በርናባስ፣ ኔጌር የተባለው ስምዖን፣ የቀሬናው ሉክዮስ፣ (ከአራተኛው ክፍል ገዥ ከሄሮድስ ጋራ አብሮ ያደገው) ማናኤንና ሳኦል ነበሩ።

²ጌታችንን ኢየሱስን እያመለኩና እየጦሙ ሳሉ፣ መንፈስ ቅዱስ፣ “ለጠራኋቸው ሥራ በርናባስንና ሳኦልን ለዩልኝ” አለ።

³ከዚያም ከጦሙና ከጸለዩ በኋላ፣ እጆቻቸውን ጫኑባቸውና ሰደዷቸው።

የአባታችን ቃል ቆጵሮስ ደረሰ

⁴በመንፈስ ቅዱስ ተልከው ወደ ሴሌውቅያ ወረዱ፤ ከዚያም በመርከብ ወደ ቆጵሮስ ተጓዙ። ⁵ሰላሚስ በደረሱ ጊዜ፣ የአባታችንን ቃል በአይሁድ ምኵራቦች ሰበኩ። ዮሐንስም ረዳታቸው ሆኖ ነበር። ⁶ደሴቲቱን ሁሉ አልፈው እስከ ጳፉስ በደረሱ ጊዜ፣ በርያሱስ የተባለ አይሁዳዊ ጠንቋይና ሐሰተኛ ነቢይ አገኙ፤ ⁷እርሱም አስተዋይ ሰው ከሆነው ከአገረ ገዡ ከሴርግዮስ ጳውሎስ ጋራ ነበር። አገረ ገዡም የአባታችንን ቃል ለመስማት ፈልጎ በርናባስንና ሳኦልን አስጠራ። ⁸ጠንቋዩ ኤልማስ — የስሙ ትርጓሜ ይህ ነውና — አገረ ገዡን ከእምነት ለማዘንበል እየሞከረ ተቃወማቸው። ⁹ጳውሎስ የተባለው ሳኦል ግን መንፈስ ቅዱስ ሞልቶበት ትኵር ብሎ ተመለከተውና ¹⁰እንዲህ አለው፤ “አንተ የዲያብሎስ ልጅ፣ የጽድቅ ሁሉ ጠላት፣ በተንኰልና በክፋት ሁሉ የተሞላህ፣ የአባታችንን ቅን መንገዶች ከማጣመም ከቶ አትቦዝንምን? ¹¹አሁንም እነሆ፣ የአባታችን እጅ በአንተ ላይ ናት። ዕውር ትሆናለህ፤ ለጊዜውም ፀሐይን ማየት አትችልም።” ወዲያውም ጭጋግና ጨለማ ወደቀበት፤ በእጅ የሚመራውን ሰው እየፈለገ ይዳክር ጀመር።

¹²አገረ ገዡም የሆነውን አይቶ አመነ፤ በጌታችን በኢየሱስ ትምህርትም ተደነቀ።

የአባታችን ታሪክ በአንጾኪያ ተሰበከ

¹³ጳውሎስና ባልንጀሮቹ ከጳፉስ በመርከብ ተነሥተው ወደ ጵንፍልያዋ ጴርጌ መጡ፤ ዮሐንስ ግን ተዋቸውና ወደ ኢየሩሳሌም ተመለሰ። ¹⁴ከጴርጌም አልፈው ወደ ጲስድያዋ አንጾኪያ ሄዱ። በሰንበት ቀንም ወደ ምኵራብ ገብተው ተቀመጡ። ¹⁵ከሕግና ከነቢያት ንባብ በኋላ፣ የምኵራቡ አለቆች፣ “ወንድሞች ሆይ፣ ለሕዝቡ የምትናገሩት የማበረታቻ ቃል ካላችሁ ተናገሩ” ብለው ላኩባቸው።

¹⁶ጳውሎስም ተነሥቶ በእጁ ጠቅሶ እንዲህ አለ፤ “የእስራኤል ሰዎች፣ አባታችንንም የምትፈሩ ሆይ፣ ስሙ። ¹⁷የዚህ የእስራኤል ሕዝብ አባት የሆነው አባታችን አባቶቻችንን መረጠ፤ በግብፅ ምድር ተቀምጠው ሳሉ አበዛቸው፤ በተዘረጋ ክንድም አወጣቸው። ¹⁸አርባ ዓመትም ያህል በምድረ በዳ ታገሣቸው። ¹⁹በከነዓን ምድር ሰባት ሕዝቦችን ካጠፋ በኋላ፣ ምድራቸውን ርስት አድርጎ ሰጣቸው። ²⁰ይህም አራት መቶ ኀምሳ ዓመት ያህል ፈጀ። ከዚያም እስከ ነቢዩ ሳሙኤል ድረስ መሳፍንት ሰጣቸው። ²¹ከዚያም ንጉሥ ለመኑ፤ አባታችንም የብንያምን ነገድ ሰው የሆነውን የቂስን ልጅ ሳኦልን ለአርባ ዓመት ሰጣቸው። ²²እርሱንም ካስወገደ በኋላ፣ ዳዊትን ንጉሥ አድርጎ አስነሣላቸው፤ ስለ እርሱም፣ ‘የእሴይን ልጅ ዳዊትን እንደ ልቤ የሆነ ሰው፣ ፈቃዴን ሁሉ የሚፈጽም ሰው አገኘሁ’ ሲል መሰከረ። ²³አባታችንም እንደ ተስፋው ከዚህ ሰው ዘር አዳኝን ኢየሱስን ለእስራኤል አመጣ። ²⁴እርሱ ከመምጣቱም በፊት፣ ዮሐንስ ለእስራኤል ሕዝብ ሁሉ የንስሓን ጥምቀት ሰብኮ ነበር። ²⁵ዮሐንስም ሩጫውን እየጨረሰ ሳለ፣ ‘እኔ ማን እንደ ሆንሁ ይመስላችኋል? እኔ እርሱ አይደለሁም። ነገር ግን እነሆ፣ ከእኔ በኋላ የሚመጣ አለ፤ የእግሩን ጫማ መፍታት እንኳ አይገባኝም’ አለ።

²⁶“ወንድሞች ሆይ፣ የአብርሃም ትውልድ ልጆች፣ ከእናንተም መካከል አባታችንን የምትፈሩ ሆይ፣ ይህ የድነት መልእክት ለእኛ ተልኮአል። ²⁷የኢየሩሳሌም ሰዎችና አለቆቻቸው እርሱን አላወቁትም፤ በየሰንበቱም የሚነበቡትን የነቢያት ቃሎች አልተረዱም፤ እርሱን በመኰነን ይህንኑ ቃል ፈጸሙ። ²⁸የሚያስገድለውን ምክንያት ባያገኙበትም፣ እንዲገደል ጲላጦስን ለመኑ። ²⁹ስለ እርሱ የተጻፈውን ሁሉ ከፈጸሙ በኋላ፣ ከዕንጨቱ አውርደው በመቃብር አኖሩት። ³⁰አባታችን ግን ከሙታን አስነሣው፤ ³¹ከገሊላ ወደ ኢየሩሳሌም አብረውት ለወጡትም ብዙ ቀን ታየ፤ እነርሱም አሁን ለሕዝቡ ምስክሮቹ ናቸው። ³²እኛም አባታችን ለአባቶቻችን የሰጠውን ተስፋ የምስራች እናበስራችኋለን፤

³³ኢየሱስን በማስነሣት ይህን ለእኛ ለልጆቻቸው ፈጽሞታልና፤ በሁለተኛው መዝሙር ደግሞ፣ ‘አንተ ልጄ ነህ፤ እኔ ዛሬ ወልጄሃለሁ’ ተብሎ እንደ ተጻፈ።

³⁴ከሙታንም እንዳስነሣው፣ ከእንግዲህም ወደ መበስበስ እንዳይመለስ፣ ‘ለዳዊት የተሰጠውን ቅዱስና የተረጋገጠ በረከት እሰጥሃለሁ’ አለ። ³⁵ስለዚህም በሌላ መዝሙር፣ ‘ቅዱስህ መበስበስን እንዲያይ አትተውም’ ይላል። ³⁶ዳዊት በራሱ ትውልድ የአባታችንን ፈቃድ ካገለገለ በኋላ አንቀላፋ፤ ከአባቶቹም ጋራ ተቀበረ፤ መበስበስንም አየ፤ ³⁷አባታችን ያስነሣው ግን መበስበስን አላየም። ³⁸እንግዲህ ወንድሞች ሆይ፣ ይህን እወቁ፤ በዚህ ሰው በኩል የኀጢአት ይቅርታ ይሰበክላችኋል፤ ³⁹በእርሱም የሚያምን ሁሉ የሙሴ ሕግ ነጻ ሊያወጣችሁ ካልቻለው ነገር ሁሉ ነጻ ይወጣል። ⁴⁰እንግዲህ በነቢያት የተነገረው በእናንተ ላይ እንዳይደርስ ተጠንቀቁ፤ ⁴¹‘እናንተ ተሳላቂዎች ሆይ፣ እዩ፤ ተደነቁ፤ ጥፉም፤ እኔ በዘመናችሁ ሥራ እሠራለሁና፤ ማንም ቢነግራችሁ እንኳ ከቶ የማታምኑትን ሥራ።’”

⁴²ጳውሎስና በርናባስም ሲወጡ፣ ሕዝቡ በሚቀጥለው ሰንበት ስለ እነዚህ ነገሮች ደግመው እንዲነግሯቸው ለመኗቸው። ⁴³የምኵራቡም ስብሰባ በተፈታ ጊዜ፣ ብዙ አይሁድና ወደ አይሁድ እምነት የገቡ ፈሪሃ አምላክ ያላቸው ሰዎች ጳውሎስንና በርናባስን ተከተሉ፤ እነርሱም አነጋገሯቸውና በአባታችን ጸጋ ጸንተው እንዲኖሩ አበረታቷቸው።

⁴⁴በሚቀጥለው ሰንበትም የጌታችንን የኢየሱስን ቃል ለመስማት መላው ከተማ ማለት ይቻላል ተሰበሰበ። ⁴⁵አይሁድ ግን ሕዝቡን ባዩ ጊዜ ቅናት ሞላባቸው፤ እየተሳደቡም የጳውሎስን ቃል ተቃወሙ።

⁴⁶ጳውሎስና በርናባስ በድፍረት እንዲህ አሉ፤ “የአባታችን ቃል በመጀመሪያ ለእናንተ ሊነገር ይገባ ነበር። እናንተ ግን ስለ ናቃችሁት፣ ራሳችሁን ለዘላለም ሕይወት የማይገባ አድርጋችሁ ስለ ፈረዳችሁ፣ እነሆ ወደ አሕዛብ እንዞራለን።”

⁴⁷አባታችን እንዲህ ብሎ አዝዞናልና፤ “እስከ ምድር ዳርቻ ድረስ ድነትን ታደርስ ዘንድ ለአሕዛብ ብርሃን አድርጌሃለሁ።”

⁴⁸አሕዛብም ይህን በሰሙ ጊዜ ደስ አላቸው፤ የጌታችንንም የኢየሱስን ቃል አከበሩ፤ ለዘላለም ሕይወትም የተመደቡ ሁሉ አመኑ። ⁴⁹የጌታችንም የኢየሱስ ቃል በአገሩ ሁሉ ተስፋፋ። ⁵⁰አይሁድ ግን ፈሪሃ አምላክ ያላቸውን የተከበሩ ሴቶችንና የከተማዋን ታላላቅ ሰዎች አነሣሡ፤ በጳውሎስና በበርናባስም ላይ ስደትን አስነሡ፤ ከአገራቸውም አስወጧቸው። ⁵¹እነርሱም የእግራቸውን ትቢያ አራገፉባቸውና ወደ ኢቆንዮን ሄዱ። ⁵²ደቀ መዛሙርቱም ደስታና መንፈስ ቅዱስ ሞሉባቸው።