ሐዋርያት ሥራ 14

14 ¹በኢቆንዮንም አብረው ወደ አይሁድ ምኵራብ ገብተው ተናገሩ፤ ከአይሁድና ከግሪኮች ብዙ ሕዝብ አመነ። ²ያላመኑት አይሁድ ግን አሕዛብን አነሣሥተው አእምሮአቸውን በወንድሞች ላይ መረዙ። ³ስለ ጌታም በግልጥ እየተናገሩ ብዙ ጊዜ ቈዩ፤ እርሱም በእጆቻቸው ምልክቶችንና ድንቆችን በማድረግ የጸጋውን ቃል አጸና። ⁴የከተማዪቱ ሕዝብ ግን ተከፈለ፤ አንዳንዶቹ ከአይሁድ፣ አንዳንዶቹም ከሐዋርያት ጋራ ሆኑ። ⁵አሕዛብና አይሁድ ከገዦቻቸው ጋራ ሊያንገላቷቸውና በድንጋይ ሊወግሯቸው በተነሡ ጊዜ፣ ⁶ይህን አውቀው ወደ ሊቃኦንያ ከተሞች፣ ወደ ልስጥራና ወደ ደርቤን፣ ወደ አካባቢውም አገር ሸሹ፤ ⁷በዚያም ወንጌልን መስበካቸውን ቀጠሉ።

አባታችን በልስጥራ ፈወሰ

⁸በልስጥራም እግሮቹ የተሰናከሉ፣ ከእናቱ ማኅፀን ጀምሮ አንካሳ የሆነ፣ ከቶ ተራምዶ የማያውቅ አንድ ሰው ተቀምጦ ነበር። ⁹ይህም ሰው ጳውሎስ ሲናገር ያዳምጥ ነበር፤ ጳውሎስም ትኵር ብሎ ተመለከተውና ይፈወስ ዘንድ እምነት እንዳለው አየ፤ ¹⁰በታላቅ ድምፅም፣ “ቀጥ ብለህ በእግሮችህ ቁም” አለው። ሰውየውም ብድግ ብሎ ተነሥቶ መራመድ ጀመረ። ¹¹ሕዝቡም ጳውሎስ ያደረገውን ባዩ ጊዜ በሊቃኦንያ ቋንቋ፣ “አማልክት በሰው አምሳል ወደ እኛ ወርደዋል!” እያሉ ጮኹ። ¹²በርናባስን ድያ፣ ጳውሎስንም ዋና ተናጋሪ ስለ ነበረ ሄርሜን ብለው ጠሩት። ¹³ቤተ መቅደሱ በከተማዪቱ ፊት ለፊት የነበረው የድያ ካህንም ከሕዝቡ ጋራ መሥዋዕት ሊያቀርብ ፈልጎ በሬዎችንና የአበባ ጒንጒኖችን ወደ በሮቹ አመጣ።

¹⁴ሐዋርያቱ በርናባስና ጳውሎስ ግን ይህን ሰምተው ልብሳቸውን ቀደው እየጮኹ ወደ ሕዝቡ መካከል ሮጡ፤ ¹⁵እንዲህም አሉ፤ “ሰዎች ሆይ፤ ይህን ለምን ታደርጋላችሁ? እኛ ደግሞ እንደ እናንተ ባሕርይ ያለን ሰዎች ነን። ከዚህ ከንቱ ነገር ተመልሳችሁ ወደ ሕያው አባት እንድትመለሱ የምሥራች እናበስራችኋለን፤ እርሱም ሰማይንና ምድርን፣ ባሕርንም በእነርሱ ውስጥ ያለውን ሁሉ የፈጠረ ነው። ¹⁶ባለፉት ትውልዶች አሕዛብን ሁሉ በየመንገዳቸው እንዲሄዱ ተዋቸው፤ ¹⁷ነገር ግን መልካም በማድረግ፣ ከሰማይ ዝናብንና ፍሬያማ ወቅቶችን በመስጠት፣ ልባችሁንም በምግብና በደስታ በመሙላት ራሱን ያለ ምስክር አልተወም።”

¹⁸በዚህ ቃልም እንኳ ሕዝቡ ለእነርሱ መሥዋዕት እንዳያቀርቡ በጭንቅ ከለከሏቸው። ¹⁹ነገር ግን ከአንጾኪያና ከኢቆንዮን አይሁድ መጥተው ሕዝቡን አባብለው ጳውሎስን በድንጋይ ወገሩት፤ የሞተም መስሏቸው ከከተማ ወደ ውጭ ጎተቱት። ²⁰ደቀ መዛሙርቱ ግን ከቦበት ጊዜ ተነሥቶ ወደ ከተማ ገባ። በማግሥቱም ከበርናባስ ጋራ ወደ ደርቤን ሄደ።

ደቀ መዛሙርትን ማበርታት

²¹በዚያችም ከተማ የምሥራቹን ሰብከው ብዙ ደቀ መዛሙርት ካደረጉ በኋላ ወደ ልስጥራ፣ ወደ ኢቆንዮንና ወደ አንጾኪያ ተመለሱ፤ ²²የደቀ መዛሙርቱን ነፍስ እያበረቱ በእምነት ጸንተው እንዲኖሩ መከሯቸው፤ ወደ አባታችን መንግሥት በብዙ መከራ ልንገባ ያስፈልገናል አሏቸው። ²³በእያንዳንዱም ቤተ ክርስቲያን ሽማግሌዎችን ከሾሙላቸውና በጾም ከጸለዩ በኋላ ላመኑበት ጌታ አደራ ሰጧቸው።

²⁴ከዚያም በጲስድያ አልፈው ወደ ጵንፍልያ መጡ። ²⁵በጴርጌንም ቃሉን ተናግረው ወደ አጣልያ ወረዱ፤ ²⁶ከዚያም ለፈጸሙት ሥራ ለአባታችን ጸጋ አደራ ተሰጥተው ወደ ነበሩባት ወደ አንጾኪያ በመርከብ ተጓዙ። ²⁷በደረሱም ጊዜ ቤተ ክርስቲያንን ሰብስበው አባታችን ከእነርሱ ጋራ ያደረገውን ሁሉ፣ ለአሕዛብም የእምነትን በር እንደ ከፈተ ነገሯቸው። ²⁸ከደቀ መዛሙርቱም ጋራ በዚያ ብዙ ጊዜ ቈዩ።