அப்போஸ்தலர் 14

14 ¹இக்கோனியாவில் அவர்கள் ஒன்றாய் யூதருடைய ஜெபஆலயத்திற்குள் பிரவேசித்து, யூதரிலும் கிரேக்கரிலும் ஏராளமான மக்கள் விசுவாசிக்கத்தக்கதாகப் பேசினார்கள். ²ஆனால் விசுவாசிக்க மறுத்த யூதர்கள் புறஜாதியாருடைய மனதைக் கிளறிவிட்டு, சகோதரருக்கு விரோதமாக அவர்களை விஷமப்படுத்தினார்கள். ³அவர்கள் நெடுநேரம் தங்கியிருந்து, கர்த்தருக்காகத் தைரியமாய்ப் பேசினார்கள்; அவரோ தமது கிருபையின் வார்த்தையை உறுதிப்படுத்தி, அவர்களுடைய கைகளினால் அடையாளங்களையும் அற்புதங்களையும் செய்யச்செய்தார். ⁴ஆனால் நகரம் பிரிந்தது: சிலர் யூதர் பக்கமும், சிலர் அப்போஸ்தலர் பக்கமும் சேர்ந்தார்கள். ⁵புறஜாதியாரும் யூதரும் தங்கள் அதிகாரிகளோடு சேர்ந்து, அவர்களைத் துன்பப்படுத்திக் கல்லெறியும்படி முயற்சித்தபோது, ⁶இதை உணர்ந்து, அவர்கள் லிக்கவோனியா நாட்டு நகரங்களாகிய லீஸ்திராவுக்கும் தெர்பைக்கும், சுற்றியிருந்த பகுதிக்கும் ஓடிப்போய், ⁷அங்கே சுவிசேஷத்தைப் பிரசங்கித்துக்கொண்டிருந்தார்கள்.

லீஸ்திராவில் பிதா சுகமளிக்கிறார்

⁸லீஸ்திராவில் ஒரு மனிதன் உட்கார்ந்திருந்தான்; அவன் கால்கள் ஊனமுற்று, பிறவியிலேயே சப்பாணியாயிருந்தான், ஒருபோதும் நடந்ததில்லை. ⁹இவன் பவுல் பேசுகிறதைக் கேட்டுக்கொண்டிருந்தான். பவுல் அவனை உற்றுப்பார்த்து, சுகமாகும்படியான விசுவாசம் அவனுக்கு உண்டென்று கண்டு, ¹⁰உரத்த சத்தமாய், “உன் கால்களை ஊன்றி நிமிர்ந்து நில்” என்றான். அந்த மனிதன் குதித்தெழுந்து நடக்கத் தொடங்கினான். ¹¹பவுல் செய்ததைக் கூட்டங்கள் கண்டபோது, லிக்கவோனிய பாஷையில், “தேவர்கள் மனித ரூபமாய் நம்மிடத்தில் இறங்கிவந்திருக்கிறார்கள்!” என்று சத்தமிட்டார்கள். ¹²பர்னபாவை ஜீயு என்றும், பவுல் முக்கிய பேச்சாளனாயிருந்தபடியால் அவனை எர்மே என்றும் அழைத்தார்கள். ¹³நகரத்திற்கு முன்பாக ஆலயமிருந்த ஜீயுவினுடைய ஆசாரியன், கூட்டங்களோடு பலியிட விரும்பி, காளைகளையும் மாலைகளையும் வாசல்களண்டைக்குக் கொண்டுவந்தான்.

¹⁴ஆனால் இதைக் கேள்விப்பட்டபோது, அப்போஸ்தலராகிய பர்னபாவும் பவுலும் தங்கள் வஸ்திரங்களைக் கிழித்துக்கொண்டு, கூட்டத்திற்குள் ஓடி, சத்தமிட்டு, ¹⁵“மனிதர்களே, இதை ஏன் செய்கிறீர்கள்? நாங்களும் உங்களைப்போன்ற சுபாவமுள்ள மனிதர்கள்தான். இந்த வீணானவைகளை விட்டு, வானத்தையும், பூமியையும், கடலையும், அவைகளிலுள்ள யாவற்றையும் உண்டாக்கின ஜீவனுள்ள பிதாவிடத்தில் திரும்பும்படி உங்களுக்குச் சுவிசேஷத்தை அறிவிக்கிறோம். ¹⁶கடந்துபோன தலைமுறைகளில், அவர் எல்லா ஜாதிகளையும் தங்கள் சுயவழிகளில் நடக்கவிட்டார். ¹⁷ஆயினும் அவர் தம்மைச் சாட்சியில்லாமல் விட்டுவைக்கவில்லை: நன்மைசெய்து, வானத்திலிருந்து மழைகளையும் செழிப்பான பருவங்களையும் உங்களுக்குத் தந்து, உங்கள் இருதயங்களை உணவினாலும் சந்தோஷத்தினாலும் நிரப்பினார்” என்று சொன்னார்கள்.

¹⁸இந்த வார்த்தைகளைச் சொல்லியும், தங்களுக்குப் பலியிடாதபடி கூட்டங்களை மிகக்கஷ்டத்தோடே தடுத்தார்கள். ¹⁹ஆனால் அந்தியோகியாவிலிருந்தும் இக்கோனியாவிலிருந்தும் யூதர்கள் வந்து, கூட்டங்களைத் தங்கள் பக்கமாய்த் திருப்பி, பவுலைக் கல்லெறிந்து, அவன் மரித்துப்போனான் என்று எண்ணி, அவனை நகரத்திற்கு வெளியே இழுத்துப்போட்டார்கள். ²⁰சீஷர்கள் அவனைச் சூழ்ந்து நிற்கையில், அவன் எழுந்து நகரத்திற்குள் போனான். மறுநாள் அவன் பர்னபாவோடு தெர்பைக்குப் புறப்பட்டுப்போனான்.

சீஷர்களைப் பலப்படுத்துதல்

²¹அந்த நகரத்தில் சுவிசேஷத்தைப் பிரசங்கித்து, அநேகரைச் சீஷராக்கினபின்பு, அவர்கள் லீஸ்திராவுக்கும் இக்கோனியாவுக்கும் அந்தியோகியாவுக்கும் திரும்பிவந்து, ²²சீஷர்களுடைய ஆத்துமாக்களைப் பலப்படுத்தி, விசுவாசத்தில் நிலைத்திருக்கும்படி அவர்களை உற்சாகப்படுத்தி, “அநேக உபத்திரவங்களின் வழியாய் நாம் எங்கள் பிதாவின் ராஜ்யத்தில் பிரவேசிக்கவேண்டும்” என்றார்கள். ²³ஒவ்வொரு சபையிலும் அவர்களுக்கு மூப்பர்களை நியமித்து, உபவாசத்தோடே ஜெபம்பண்ணி, அவர்கள் விசுவாசித்திருந்த கர்த்தருக்கு அவர்களை ஒப்புவித்தார்கள்.

²⁴பின்பு அவர்கள் பிசீதியா நாட்டைக் கடந்து, பம்பிலியாவுக்கு வந்தார்கள். ²⁵பெர்கே பட்டணத்தில் வசனத்தைச் சொன்னபின்பு, அத்தலியாவுக்கு இறங்கிப்போய், ²⁶அங்கிருந்து அந்தியோகியாவுக்குக் கப்பலேறிப்போனார்கள்; அவர்கள் நிறைவேற்றின அந்தக் கிரியைக்காக அங்கே எங்கள் பிதாவின் கிருபைக்கு ஒப்புவிக்கப்பட்டிருந்தார்கள். ²⁷அவர்கள் வந்துசேர்ந்தபோது, சபையைக் கூடிவரச்செய்து, எங்கள் பிதா தங்களோடிருந்து செய்த யாவற்றையும், புறஜாதியாருக்கு விசுவாசத்தின் கதவை அவர் எப்படித் திறந்தார் என்பதையும் விவரித்துச் சொன்னார்கள். ²⁸பின்பு அவர்கள் அங்கே சீஷர்களோடு நெடுநாள் தங்கியிருந்தார்கள்.