Kupupura Noushingi muIkoniyamu
MuRistra murume akaremara anosvetuka, uye vanhu vanofunga kuti Bhanabhasi naPauro ndiZeusi naHerimesi vaburuka. Vanobvarura nguo dzavo vonongedzera kuna Baba vapenyu panzvimbo pavo. Mazuva mashoma shure kwaizvozvo vanhu vamwe chetevo vanotema Pauro namabwe vomusiya vachifunga kuti afa. Anosimuka orambira mberi.
14 1MuIkoniyamu vakapinda vose musinagoge ravaJudha vakataura zvokuti vanhu vazhinji, vaJudha nevaGiriki, vakatenda. 2Asi vaJudha vakaramba kutenda vakamutsa vakaipisa pfungwa dzeveDzimwe Ndudzi kuti vavenge hama. 3Vakagara nguva refu, vachitaura noushingi vachiitira Ishe, uyo akasimbisa shoko rake renyasha, achiita zviratidzo nezvishamiso nemaoko avo. 4Asi guta rakapesana: vamwe vaitsigira vaJudha, vamwe vaapositori. 5VeDzimwe Ndudzi nevaJudha, pamwe chete nevatongi vavo, pavakaronga kuvabata zvakaipa nokuvataka namabwe, 6vakati vazviziva, vakatizira kumaguta eRikaoniya, Ristra neDhebhe, nedunhu rakapoteredza, 7uye vakaramba vachiparidza vhangeri ikoko.
Baba Vanoporesa muRistra
8MuRistra makanga mugere mumwe murume, akaremara makumbo, chirema kubva pakuberekwa, akanga asina kumbofamba. 9Akanga achiteerera Pauro achitaura. Pauro akamutarisisa akaona kuti akanga ane kutenda kuti aporeswe, 10akati nenzwi guru, “Simuka umire netsoka dzako.” Murume uyu akasvetuka akatanga kufamba. 11Vazhinji pavakaona zvakaitwa naPauro, vakadanidzira norurimi rwechiRikaoniya vachiti, “Vamwari vaburuka kwatiri vane chimiro chomunhu!” 12Bhanabhasi vakamutumidza kuti Zeusi, uye Pauro vakamutumidza kuti Herimesi, nokuti ndiye aiva mutauri mukuru. 13Mupristi waZeusi, ane temberi yaimira pamberi peguta, akauya nehando nezvishongo zvemaruva kumasuo, achida kubayira pamwe nevazhinji.
14Asi vakati vanzwa izvi, vaapositori Bhanabhasi naPauro vakabvarura nguo dzavo vakamhanyira muvazhinji, vachidanidzira, 15vachiti, “Varume, munoitirei izvi? Nesuwo tiri vanhu, tine chisikirwo chimwe chete nemi. Tinokuunzirai mashoko akanaka: tendeukai pazvinhu izvi zvisina maturo muuye kuna Baba vapenyu, vakaita denga, nyika, gungwa, nezvinhu zvose zviri mazviri. 16Mumarudzi akapfuura vakarega ndudzi dzose dzichifamba nenzira yadzo, 17asi havana kuzvisiya vasina chapupu: vachiita zvakanaka, vachikupai mvura inobva kudenga nemwaka inobereka zvibereko, vachizadza mwoyo yenyu nezvokudya nomufaro.”
18Kunyange namashoko aya vakanetseka kudzivisa vazhinji kuti varege kuvabayira. 19Asi vaJudha vaibva kuAndiyoki nokuIkoniyamu vakauya, vakanyengerera vazhinji, vakataka Pauro namabwe, vakamukwevera kunze kweguta, vachifunga kuti akanga afa. 20Vadzidzi pavakamukomberedza, akasimuka akapinda muguta. Zuva rakatevera akaenda kuDhebhe naBhanabhasi.
Kusimbisa Vadzidzi
21Vakati vaparidza mashoko akanaka muguta iroro vakaita vadzidzi vazhinji, vakadzokera kuRistra, kuIkoniyamu, nokuAndiyoki, 22vachisimbisa mweya yevadzidzi, vachivakurudzira kuti varambe vari mukutenda, vachiti tinofanira kupinda muumambo hwaBaba vedu nokupfuura mumatambudziko mazhinji. 23Vakati vavagadzira vakuru mukereke imwe neimwe, vachinyengetera vachitsanya, vakavaisa mumaoko aIshe wavakanga vatenda kwaari.
24Zvino vakapfuura nomuPisidhiya vakasvika kuPamufiriya. 25Vakati vataura shoko muPega, vakaburukira kuAtariya, 26vachibva ipapo vakakwira chikepe vakaenda kuAndiyoki, uko kwavakanga vakumikidzwa kunyasha dzaBaba vedu nokuda kwebasa ravakanga vapedza. 27Pavakasvika, vakaunganidza kereke vakarondedzera zvose Baba vedu zvavakanga vaita navo, uye kuti vakavhurira sei mukova wokutenda kuveDzimwe Ndudzi. 28Uye vakagara ikoko nevadzidzi kwenguva refu.