Iconiumli Pinglak eina Shākhi
Lystrali phei katek mi akha phitkarthuia, kala mibingna Barnabas eina Paul chi Zeus eina Hermes kazingram eina tākasang da phaninga. Anina kachon serkhāhaida, kharinga Avāli kaphokchithei. Zimiksho kaikha thili mibing chiwui china Paulli lunggui eina horthata, thihaira da phaningda horhaowa. Ana ngakarthuilaga zatluishitta.
14 1Iconiumli athumna Jihudiwui synagogueli ngasoda zangda matuihaowa, chieina Jihudibing eina Greekbing mi kachungkhana shitsanghaowa. 2Kha mashitkasanga Jihudibingna Gentilebingwui ning ngatha̱ngasakhaoda, vānaobingli makaphā phaning ngasaka. 3Athum apam chili sāngnā ngayurpamda, Prohowui vang pinglak eina matuida leihaowa; Prohona athumwui pāng eina machut kala matakhak kahai ot sāchitheida awui lukhamashan pao shāptitmi. 4Kha keinung chiwui mibing ngakai khangarok shokhaowa; kaikhana Jihudibingli ngaso, kaikhana paokazatbingli ngaso. 5Gentilebing eina Jihudibing athumwui khamungabingla ngasoda anili khalāng ot sā khavai kala lung eina horthat khavai ngamuikhui tharan, 6hi theida anina Lycaoniawui keinung Lystra eina Derbeli, kala kuikhamareili yāmserhaowa, 7kala apam chili athum paokaphā hāshokzata.
Lystrali Avāna Raimi
8Lystrali phei makaso, ashālakhawui eina phei katek kala katang mazatkharar mikumo akha pamsai. 9Ana Paulna matui chi nganāsai. Paulna ali yangtitlaga, ana raimi khavai shitkasang leikahai chi theihaoda, 10akhon panglāk eina hānga, "Nawui pheili khangatar ngakarthuilu." Chieina mipā china ngasonkai zata. 11Paulna kasā chi yarui china kathei tharan, Lycaonia tui eina panglāk eina vaoda, "Varebing mikumowui khangachā eina ithumli katāhaira!" da hānga. 12Athumna Barnabasli Zeus da hokhui, kala Paulli Hermes da hokhui, kaja ana matuikasa khareina. 13Keinung mangāli khalei Zeuswui khorumshimwui pāngmon china yarui eina ngasoda pha̱kaphayā sā khavai mukvā kala pārbing ngaveili khuirai.
14Kha hi kashā tharan, paokazatbing Barnabas eina Paulna aniwui kachon serkhāhaida, yarui ngachaili yongungda panglāk eina vaoda, 15hānga, "Mibing, khisāda nathumna hi sākhala? Inila nathumthāda khangachā ngaraichā mikumo akhana. Inina nathumli khamathā pao mili: hi aremabing horhaida kharinga Avāwuili ngalanlu, ana kazingram, okathui, yirei kala chili khalei ot saikora sākahaina. 16Achālakhawui thotbingli ana yur saikorali athum khalattawui apongli zat ngasakmi, 17chithālala ana akhalatta shākhi maleila mahorhaimana: kaphā sāda, kazing eina nathumli zingrot kala athei kachungkha matheiya kachāng mida, nathumwui ning kashakazā kala khamathānna pemngasaka."
18Tui hi eina tangda mi kachungkhana anili pha̱kaphayā masā khavai anina saklak eina khalaphaowa. 19Kha Antioch eina Iconiumwui eina kharā Jihudibing china rālaga, mi kachungkhali athumwui thili tāngasakhailaga, Paulli lunggui eina horthatlaga, ali thihaira da phaningda keinung chiwui eina shimenshoka. 20Sākhangatha̱bingna ali rākuinam tharan, ana ngakarthuida keinung chili zanga. Akhama kathā ana Barnabasla ngasoda Derbeli vāhaowa.
Sākhangatha̱bing Pangsang Ngasak
21Keinung chili paokaphā hāshokhailaga, sākhangatha̱ kachungkha sākhuilaga, anina Lystrali, Iconiumli, kala Antiochli latunga, 22sākhangatha̱bingwui manglāli pangsang ngasakda, shitkasanglungli leiching khavai athumli kasatsanga: ithumna kakhanang kachungkha kānhailaga ithumwui Avā wungramli zatphalungra. 23Church kachiva̱li athumwui vang ararbing kapangkhuihailaga, kakhum eina seihā sāda, athumna shitsang kahai Proholi athumli horsangmi.
24Chiwui thili athumna Pesidia makānlaga Pamphyliali vāshunga. 25Kala athumna Pergali tui hāshokhailaga, Attaliali tai, 26apam chiwui eina athumna marikhong tonglaga Antiochli vāhaowa, apam chili athumna sākuphaikahai ot chiwui vang ithumwui Avāwui lukhamashan pāngli horsangmikahaina. 27Athumna vākashung tharan, churchli kazipkhuilaga, ithumwui Avāna athumli shichinlaga sākahai saikora, kala ana Gentilebingli shitkasangwui khāmong shokahai chi hāngchithei. 28Kala athumna apam chili sākhangatha̱bingla ngasoda atam kasāngkha apamsanga.
