ኣብ ኢቆንዮን ብትብዓት ምምስካር

ኣብ ልስጥራ ሓደ ሓንካስ ሰብኣይ ነጢሩ ተሲኡ፥ እቲ ህዝቢ ድማ ባርናባስን ጳውሎስን ድያን ሄርሜስን ወሪዶም ኢሉ ወሰነ። ንሳቶም ክዳውንቶም ቀዲዶም ናብቲ ህያው ኣቦ ኣመልከቱ። ድሕሪ ቑሩብ መዓልቲ እቲ ህዝቢ ባዕሉ ንጳውሎስ ብእምኒ ቐጥቀጦ፥ ከም ዝሞተ ጌሩ ኸዓ ሓደጎ። ንሱ ግና ተሲኡ ቐፀለ።

ምዕራፍ 14።

ኣብ ኢቆንዮን ድማ ብሓንሳእ ናብ ቤተ ፀሎት ኣይሁድ ኣተዉ፤ ብዙሓት ኣይሁድን ግሪካውያንን ክሳዕ ዝኣምኑ ከዓ ተዛረቡ። እቶም ክኣምኑ ዝኣበዩ ኣይሁድ ግና፥ ንልቢ ኣህዛብ ኣለዓዒሎም ኣብ ልዕሊ እቶም ኣሕዋት ኣመረርዎም። ንሳቶም ድማ ብዛዕባ ጐይታ ብትብዓት እናተዛረቡ ብዙሕ ጊዜ ፀንሑ፤ እቲ ጐይታ ኸዓ ብኢዶም ምልክትን ተኣምራትን እናገበረ፥ ነቲ ናይ ፀጋ ቓሉ ኣፅንዐ። እታ ኸተማ ግና ተፈላለየት፤ ገሊኦም ምስ ኣይሁድ፥ ገሊኦም ድማ ምስ ሃዋርያት ኮኑ። እቶም ኣህዛብን ኣይሁድን ምስ መኳንንቶም ኮይኖም፥ ክግፍዕዎምን ብእምኒ ክቕጥቅጥዎምን ምስ ተላዓሉ፥ እዙይ ፈሊጦም ናብተን ናይ ሊቃኦንያ ኸተማታት፥ ልስጥራን ደርቤን፥ ናብ ከባቢአንውን ሃደሙ፤ ኣብኡ ድማ ወንጌል ይሰብኩ ነበሩ።

ኣቦ ኣብ ልስጥራ የሕዊ

ኣብ ልስጥራ ኣእጋሩ ዝሰኣነ፥ ካብ ከርሲ ኣዲኡ ሓንካስ ኮይኑ ዝተወልደ፥ ከቶ ተመላሊሱ ዘይፈልጥ ሓደ ሰብኣይ ተቐሚጡ ነበረ። ንሱ ድማ ጳውሎስ ክዛረብ እንተሎ ይሰምዕ ነበረ። ጳውሎስ ከዓ ኣትኲሩ ጠሚትዎ፥ ክሓዊ እምነት ከም ዘለዎ ረአየ፤ ብዓብዪ ድምፂ ድማ “ብኣእጋርካ ትኵል ኢልካ ደው በል” በሎ። እቲ ሰብኣይ ከዓ ነጢሩ ተንሲኡ ክመላለስ ጀመረ። እቶም ህዝቢ እቲ ጳውሎስ ዝገበሮ ምስ ረአዩ፥ ብቛንቋ ሊቃኦንያ ዓው ኢሎም “ኣማልኽቲ ብመልክዕ ሰብ ናባና ወሪዶም” በሉ። ንበርናባስ ድማ ድያ ኢሎም ፀውዕዎ፤ ንጳውሎስ ከዓ ንሱ እቲ ቀንዲ ተዛራባይ ስለ ዝነበረ ሄርሜስ ኢሎም ፀውዕዎ። እቲ ኣብ ቅድሚ እታ ኸተማ ቤተ መቕደሱ ዝነበረ ካህን ድያ ድማ፥ ምስቶም ህዝቢ ኽስውእ ስለ ዝደለየ፥ ኣብዑርን ዕንባባን ናብ ደጌታት ኣምፅአ።

እቶም ሃዋርያት በርናባስን ጳውሎስን ግና እዙይ ምስ ሰምዑ፥ ክዳውንቶም ቀዲዶም ዓው እናበሉ ናብ ማእኸል እቲ ህዝቢ ጐየዩ፤ ከምዙይ ድማ በሉ፦ “ኣቱም ሰባት፥ ስለ ምንታይ እዙይ ትገብሩ ኣለኹም? ንሕናውን ከማኹም ዝኾነ ባህርይ ዘለና ሰባት ኢና። ካብዘን ከንቱ ነገራት ናብቲ ሰማይን ምድርን ባሕርን ኣብኣቶም ዘሎ ኵሉን ዝፈጠረ ህያው ኣቦ ክትምለሱ፥ ብስራት ነበስረኩም ኣለና። ንሱ ኣብቲ ዝሓለፈ ወለዶታት፥ ንዅሎም ኣህዛብ በብመንገዶም ክኸዱ ሓደጎም፤ ኮይኑ ግና፥ ፅቡቕ እናገበረ፥ ካብ ሰማይ ዝናምን ፈረይቲ ወቕቲታትን እናሃበኩም፥ ልብኹም ብመግብን ብሓጐስን እናመልአ፥ ርእሱ ብዘይ ምስክር ኣይሓደገን።”

በዝ ዘረባ እዙይ እኳ፥ ነቶም ህዝቢ ከይስውኡሎም ፀጊሞም ገንሕዎም። ካብ ኣንፆክያን ካብ ኢቆንዮንን ዝመፁ ኣይሁድ ግና፥ ነቶም ህዝቢ ኣእሚኖም፥ ንጳውሎስ ብእምኒ ቐጥቂጦም፥ ሞይቱ መሲልዎም ናብ ወፃኢ እታ ኸተማ ጎተትዎ። እቶም ደቀ መዛሙርቲ ኸቢቦሞ እንተለዉ ግና፥ ተሲኡ ናብ እታ ኸተማ ኣተወ። ንፅባሒቱ ድማ ምስ በርናባስ ናብ ደርቤ ኸደ።

ንደቀ መዛሙርቲ ምብርታዕ

ኣብታ ኸተማ እቲኣ ወንጌል ሰቢኾም፥ ብዙሓት ደቀ መዛሙርቲ ምስ ገበሩ፥ ናብ ልስጥራን ኢቆንዮንን ኣንፆክያን ተመለሱ፤ ነፍሲ እቶም ደቀ መዛሙርቲ እናኣበርትዑ፥ ኣብ እምነት ክፀንዑ ኸዓ እናማሕፀንዎም፥ “ናብ መንግስቲ ኣቦና ብብዙሕ መከራ ኽንኣቱ ይግብአና እዩ” በልዎም። ኣብ ነፍሲ ወከፍ ቤተ ክርስቲያን ድማ ሽማግለታት መዚዞሙሎም፥ ብፆም ፀሊዮም፥ ነቲ ዝኣመኑሉ ጐይታ ኣማሕፀንዎም።

ብፒስድያ ኣቢሎም ድማ ናብ ጵንፍልያ መፁ። ኣብ ጴርጌ ድማ ቓል ተዛሪቦም ናብ ኣጣልያ ወረዱ፤ ካብኡ ኸዓ ናብ ኣንፆክያ ብመርከብ ተጓዓዙ፤ ኣብኣ ድማ ነቲ ዝወድእዎ ዕዮ ናብ ፀጋ ኣቦና ተማሕፂኖም ነበሩ። ምስ በፅሑ ድማ ነታ ቤተ ክርስቲያን ኣኪቦም፥ ኣቦና ምስኣቶም ኮይኑ ዝገበሮ ዅሉን፥ ንኣህዛብ ከመይ ገይሩ ኣፍ ደገ እምነት ከም ዝኸፈተሎምን ነገርዎም። ኣብኡ ድማ ምስ እቶም ደቀ መዛሙርቲ ብዙሕ ጊዜ ፀንሑ።