Ikonia ka Limchühngaiko Aukabü Künbü
Lustra ka sokebü müt che saiyeian paila khangkei, hoba noknyühei Barnea si Paul kho Zeus hoba Hermes yeian longbü mühghaü shuong dogo thinei kümbei. Haosiei haoeneibü neisimei tetyoan, tokei langkei kibü Bou to chühenkei. Chalou atei phaia kho noknyühtham Paul to laangei tetan, hao haian dogo apyokei. Haoei pian hoba athakko haukei.
14 1Ikonia ka haoen liko Jihudabü sinagog to atkei hoba joyokei, kheijinei Jihudabü hoba Grikbü yoa müt juongnyu mailembei. 2Lausikei maialembü Jihudabüei Küksithang shuongeibü maangpon jaisinasi shuong khulimbo thungeiko amaiko yeitikei. 3Haoen longche kikei, Bunyubou shanga limchühngaiko joyokei, Bunyubouei haoeneibü ik danko tetsida hoba seikümseilei kümbei, hoba haoeibü onou ngühlang to aukabü kukei. 4Lausikei sangnyua janyinbü longkei; at shuong Jihudabü aeto sepeikei, at shuong youkoikjai shuong aeto sepeikei. 5Ladang Küksithang shuong hoba Jihudabü, haoeneibü leiyeibü shuong yoa, haoen to amaiko jungeila hoba laangei tetla meimeikei, 6kho ngekan, haoen Likaonia kaonyek sangnyu Lustra hoba Derbe, hoba kaijembo kibü kaonyek to lintikei, 7hoba khünei haoen Ngühlang Maibü songlenko kikei.
Lustra ka Bouei Maitibü
8Lustra ka müt che setkei, haoeibü you phei sibü, bukbü ka jaüan sokebü kikei, haoei ladangkei apai. 9Haoei Paulei joyobü ditko kikei. Paulei hao to tangko chühan haoei maitila mailem kia dogo hapbei, 10ngühlang kaangbüei laukei, “Nyi you to tangko loashi.” Hobaje müt khoei saiyeian paila khangkei. 11Ladang noknyühei Paulei kümbü hapbei, haoen Likaonia ngühei uihinkei, “Mühghaü shuong müteibü phatbüa sen jungto louyenkei!” 12Barnea to haoenei Zeus dogo laukei, hoba Paul to Hermes dogo laukei, aishanga hao joyoa aeibou kiteikei. 13Zeus ungshedbou, haoeibü chem sangnyu thedanga lokei, haoei masu pongsu hoba lali shuong bakhün to leian loukei, hoba noknyüh yoa lemla aeibou kiteikei.
14Lausikei kho ditan, youkoikjai Barnea si Paulei haoeneibü neisimei jitnyinkei hoba noknyüh maang to laangjung hauan uihinkei, 15hoba laukei, “Shuong, aila kanei ho kümda? Künkei kan tegü müt ki, kan yoa samenbü mü kikei. Künei kan jungto Ngühlang Maibü künbada: habü jim akibü shuong ka sepeinyu, müh, kaodak, yung, hoba khünei kibü ajanjan pendou yaübü langkei kibü Bou aeto longeiashi. 16Shangied meten shuonga haoei mütli pendou jembü lamnyu to haula kausakkei, 17khei yingasikei haoei himshuong aukabü ongkei aleilu: maibü kümbüei, khuthük ka dei hoba maihekbü jihsiphai shuong kan la kuko, kaneibü maangpon nyak hoba olinbüei shentikei.”
18Habü ngüh laubü shangakei, noknyüh haoen to lemla akümbo maisho shiletkei. 19Lausikei Antiok hoba Ikonia ka Jihudabü louan, noknyüh senjung louan, Paul to laangei tetkei, hoba hao haikei dogo damen sangnyu pühlam ka jungan apbei. 20Ladang eikshuongei hao kailepbei, haoei meimeian sangnyu to atkei. Nyibounyet haoei Barnea yoa Derbe to haukei.
Eikshuong Hau Kingaitibü
21Kho sangnyua Ngühlang Maibü songlenko hoba eik juongnyu yeitian phaia, haoen Lustra, Ikonia hoba Antiok to ngaikei, 22eikshuongeibü soushou hau kingaitiko, mailema jouko kila haoen to thungeikei; senei maangshat juong danko seneibü Bou Sangle to atla kila dogo lenkei. 23Lashong weko haoen shanga jaishou shuong phoan phaia, nyengko welauan, haoen mailembü Bunyubou la haoen kukei.
24Kheijinei haoen Pisidia danjung hauan Pamfilia to loukei. 25Haoen Perga ka ngüh joyoan phaia, Attalia to yanan haukei, 26khünei haoen Antiok to long-chema haukei, kaoen haoenei yeikhümbü denche shanga seneibü Bou onou la kuan apyobü kiteikei. 27Ladang haoen loukei, lashong nyuyoko, Bouei haoen yoa kümbü pendou, hoba haoei Küksithang shuong la mailembü kou ipbü shanga lenkei. 28Hoba haoen khünei eikshuong yoa longche kikei.
