Mabasa a Apoxtolo 13 FHB Father's Heart Bible™

13 ¹Mu mpingo wa ku Antiokiya mukhali aprofeta na apfundzisi: Barnaba, Simeau anacemerwa Nigere, Lusiyo wa ku Kirene, Manaeni (ule akhakula pabodzi na Herodhi ntongi kubulukira uwana wace), na Saulo.

²Mu ndzidzi ukhalambira iwo Mbuya wathu Yezu na kusala kudya, Nzimu Wakucena alonga kuti: “Ndisankhulireni Barnaba na Saulo, toera acite basa yakuti ndaacemera iwo.”

³Penepo, pakumala kusala kudya na kuphembera, aikha manja awo pa iwo mbaatuma.

Fala ya Baba Isafika ku Kipro

⁴Pidatumwa iwo na Nzimu Wakucena, atsika ku Seleukiya, buluka penepo aenda na ngalawa ku Kipro. ⁵Pidafika iwo ku Salami, apaliza fala ya Baba m'masinagoga a Ajuda. Akhali na Juwau ninga nyakuaphedza wawo. ⁶Pidapita iwo nsumbu wonsene mpaka ku Pafo, agumana nyang'anga Njuda, profeta wauthambi, wakuti akhacemerwa Bari-Yezu, ⁷wakuti akhali na ntongi wa dziko, Serjiyo Paulu, mamuna waluso. Iye acemeresa Barnaba na Saulo, thangwi akhafuna kubva fala ya Baba. ⁸Elima nyang'anga—ndi mabvekero a dzina yace—aakhondera, mbayesera kucinja ntima wa ntongi toera asiye kukhulupira. ⁹Mbwenye Saulo, wakuti akhacemerwambo Paulu, wakudzala na Nzimu Wakucena, amuyang'ana mwamphambvu, ¹⁰mbalonga kuti: “Iwe mwana wa Dyabo, nyamalwa wa kulungama konsene, wakudzala na manyengo na uthambi onsene—kodi cipo unasiya kupotonkhesa njira zakulungama za Baba? ¹¹Cincino ona: djanja ya Baba iri pa iwe. Unadzakhala wacimaso, wakukhonda kwanisa kuona dzuwa mu ndzidzi wakuti unadza.” Mwakucimbiza, citi na cidima zagwa pa iye; mbaphapha-phapha, mbasaka munthu toera amuphate pa djanja mbamutsogolera.

¹²Pidaona ntongi pidacitika, akhulupira, mbadzumatirwa na cipfundziso ca Mbuya wathu Yezu.

Mphangwa za Baba Zapalizwa ku Antiokiya

¹³Paulu na andzace akwira ngalawa kubulukira ku Pafo mbaenda ku Perga, ku Panfiliya, mbwenye Juwau aasiya mbabwerera ku Yerusalemi. ¹⁴Kubulukira ku Perga apitiriza ulendo mpaka ku Antiokiya, ku Pisidhiya. Pa ntsiku ya Sabudu apita m'sinagoga mbakhala pantsi. ¹⁵Pakumala kuleri Mwambo na Aprofeta, atsogoleri a sinagoga aatumira mphangwa: “Abale, mungakhala na fala yakuwangisa mbumba, longani.”

¹⁶Paulu alimira, akweza djanja, mbalonga kuti: “Amuna a Izarayeli, na imwe munagopa Baba, bverani. ¹⁷Baba wathu, Baba wa mbumba iyi ya Izarayeli, asankhula ambuya athu, mbaakulisa mu ndzidzi ukhakhala iwo ku dziko ya Edjipito, mbaabulusa na nyono wakukwezwa. ¹⁸Pontho mu pyaka pingasa makumanai, aapirira m'thando. ¹⁹Pakumala kufudza madziko manomwe ku Kanani, aapasa dziko yawo ninga unthaka. ²⁰Pyenepi pyatenga pyaka pingasa madzana manai na makumaxanu. Buluka penepo aapasa atongi mpaka pa ndzidzi wa Samueli profeta. ²¹Buluka penepo aphemba mambo, na Baba aapasa Saulo mwana wa Kixi, mamuna wa dzinza ya Benjamini, mu pyaka makumanai. ²²Pakumala kum'bulusa, alamusa Dhavidhi toera akhale mambo wawo, mbapereka umboni kuti: ‘Ndagumana Dhavidhi mwana wa Jese, mamuna wakubverana na ntima wanga, wakuti anacita pyonsene pinafuna Ine.’ ²³Kubulukira mu dzinza ya mamuna uyu, Baba abweresa kuna Izarayeli Mpulumusi, Yezu, ninga mudapikira Iye. ²⁴Mbadzati kubwera Iye, Juwau akhapaliza ubatizo wa kutcunyuka kuna mbumba yonsene ya Izarayeli. ²⁵Mu ndzidzi ukhamala Juwau basa yace, alonga kuti: ‘Musanyerezera kuti Ine ndine ani? Ine sine Iye tayu. Mbwenye onani, ali kubwera m'bodzi nduli mwanga—Ine nkhabe thema toera kusudzula nyang'ula za m'miyendo mwace.’

²⁶“Abale, ana a dzinza ya Abhrahamu, na ale anagopa Baba pakati panu: mphangwa iyi ya upulumuki yatumwa kuna ife. ²⁷Anthu a ku Yerusalemi na atsogoleri awo nee am'dziwa, nee abvesesa mafala a aprofeta analeriwa Sabudu iriyonsene—mu kuntonga, akwanirisa mafala anewo ene. ²⁸Maseze nee agumana thangwi toera iye aphiwe, aphemba Pilatu toera aphiwe. ²⁹Pakumala kucita pyonsene pidalembwa thangwi ya iye, am'bulusa pa muti mbam'bvumbika m'nthumbi. ³⁰Mbwenye Baba am'lamusa kwa anyakufa, ³¹mu ntsiku zizinji iye aonekera kuna ale adakwira pabodzi na iye kubulukira ku Galileya mpaka ku Yerusalemi, akuti cincino ndi mboni zace kuna mbumba. ³²Ife tisakubweserani mphangwa zadidi za pidapikira Baba kuna ambuya athu,

³³Iye apikwanirisa kuna ife, ana awo, mukulamusa Yezu, ninga mudalembwambo mu Masalmo yaciwiri: ‘Imwe ndimwe Mwana wanga; lero Ine ndakubalani.’

³⁴Natenepo, thangwi ya kuti am'lamusa kwa anyakufa, toera akhonde kubvunda pontho, alonga kuti: ‘Ndinakupasani nkhombo zakucena na zakukhonda pezeka zidapikirwa kuna Dhavidhi.’ ³⁵Na thangwi ineyi, alongambo mu Masalmo inango: ‘Imwe nkhabe kutawirisa Wakucena wanu aone kubvunda.’ ³⁶Thangwi Dhavidhi, pakumala kutumikira cifuno ca Baba mu ubalwa wace, agona, mbabvumbikwa pabodzi na ambuya ace, mbaona kubvunda, ³⁷mbwenye ule adalamuswa na Baba nee aona kubvunda. ³⁸Natenepo dziwani ipi, abale—kubulukira mwa mamuna uyu, kulekererwa kwa madawo kusapalizwa kuna imwe, ³⁹kubulukira mwa iye, munthu onsene anakhulupira asasudzulwa ku pinthu pyonsene pyakuti Mwambo wa Mozese nee ukhakwanisa kukusudzulani. ⁴⁰Natenepo, cenjerani, toera pidalongwa m'bukhu za Aprofeta pikhonde kucitika kuna imwe: ⁴¹‘Onani, imwe anyakunyoza, dzumani mbamala; thangwi Ine ndinacita basa mu ntsiku zanu, basa yakuti cipo munadzaikhulupira, maseze munthu angakupangani.’”

⁴²Pakhabuluka Paulu na Barnaba, anthu aaphemba toera alonge pontho pya pinthu pyenepi pa Sabudu inadza. ⁴³Mudamala msonkhano wa sinagoga, Ajuda azinji na anthu akulambira adacinja mbakhala Ajuda aatowera Paulu na Barnaba, wakuti alonga na iwo mbaawangisa toera apitirize mu kukoma ntima kwa Baba.

⁴⁴Pa Sabudu inadza, nzinda onsene mwakusaya pang'ono wagumanyikana toera kubva fala ya Mbuya wathu Yezu. ⁴⁵Ajuda pidaona iwo mbumba zizinji, adzala na njiru, mbapokanya mafala a Paulu, mbantukana.

⁴⁶Paulu na Barnaba alonga mwakukhonda gopa: “Fala ya Baba ikhafunika kulongwa kuna imwe pakutoma. Thangwi imwe musaikhonda, mbamusazitonga ekhene kuti nkhabe thema ya upulumuki wakukhonda kumala, onani—ife tisazungunukira kuna anthu a madziko anango.”

⁴⁷Thangwi Baba atipanga kuti: “Ine ndakuikhani ninga ceza kuna madziko, toera kubweresa upulumuki mpaka kunkhomo kwa dziko yapantsi.”

⁴⁸Pidabva iwo pyenepi, anthu a madziko akomerwa mbasimba fala ya Mbuya wathu Yezu; onsene adasankhulwa toera kukhala na upulumuki wakukhonda kumala akhulupira. ⁴⁹Na fala ya Mbuya wathu Yezu yabalalika mu cisa consene. ⁵⁰Mbwenye Ajuda awangisa akazi akulambira anadziwika na amuna akulu a nzinda, mbalamusa mazunzo kuna Paulu na Barnaba, mbaathamangisa mu cisa cawo. ⁵¹Natenepo apukuta pfumbi ya m'miyendo mwawo kuna iwo, mbaenda ku Ikoniyo. ⁵²Na anyakupfundza adzala na kutsandzaya na Nzimu Wakucena.