ሐዋርያት ሥራ 12

12 ¹በዚያን ጊዜ ገደማ ንጉሡ ሄሮድስ ሊጐዳቸው አስቦ ከቤተ ክርስቲያን አንዳንዶቹን ለማሳደድ እጁን ዘረጋባቸው። ²የዮሐንስንም ወንድም ያዕቆብን በሰይፍ ገደለው። ³ይህም አይሁድን ደስ እንዳሰኛቸው አይቶ፣ በቂጣ በዓል ወራት ጴጥሮስንም ጭምር ለመያዝ ቀጠለ። ⁴ይዞም ወደ እስር ቤት አስገባው፤ ከፋሲካ በኋላ ወደ ሕዝቡ ሊያወጣው አስቦ፣ አራት አራት ወታደሮች ላሏቸው ለአራት የጥበቃ ክፍሎች እንዲጠብቁት አሳልፎ ሰጠው።

⁵ጴጥሮስም በእስር ቤት ይጠበቅ ነበር፤ ቤተ ክርስቲያን ግን ስለ እርሱ ወደ አባታችን አጥብቃ ትጸልይ ነበር። ⁶ሄሮድስም ሊያወጣው ባሰበበት በዚያች ሌሊት፣ ጴጥሮስ በሁለት ሰንሰለት ታስሮ በሁለት ወታደሮች መካከል ተኝቶ ነበር፤ ጠባቂዎችም በደጁ ፊት ሆነው እስር ቤቱን ይጠብቁ ነበር። ⁷ድንገትም የአባታችን መልአክ በአጠገቡ ቆመ፤ በእስር ቤቱም ውስጥ ብርሃን ሞላ። የጴጥሮስን ጎን መትቶ ቀሰቀሰውና፣ “ፈጥነህ ተነሥ” አለው። ሰንሰለቶቹም ከእጆቹ ወደቁ። ⁸መልአኩም፣ “ልበስ፤ ጫማህንም አድርግ” አለው። ጴጥሮስም እንዲሁ አደረገ። ከዚያም፣ “ልብስህን ደርበህ ተከተለኝ” አለው። ⁹ጴጥሮስም ወጥቶ ተከተለው፤ መልአኩ ያደረገው ነገር እውን መሆኑን ግን አላወቀም፤ ራእይ ያየ መስሎት ነበር። ¹⁰የመጀመሪያውንና ሁለተኛውን ጠባቂ አልፈው ወደ ከተማዋ ወደሚወስደው የብረት በር ደረሱ፤ በሩም በራሱ ተከፈተላቸው። ወጥተውም አንድ መንገድ ተጓዙ፤ ድንገትም መልአኩ ተለየው።

¹¹ጴጥሮስም ወደ ልቡ ተመልሶ፣ “አባታችን መልአኩን ልኮ ከሄሮድስ እጅ፣ የአይሁድ ሕዝብ ከጠበቁትም ሁሉ እንዳዳነኝ አሁን በርግጥ አወቅሁ” አለ። ¹²ይህንም አውቆ፣ ማርቆስ ወደ ተባለው ወደ ዮሐንስ እናት ወደ ማርያም ቤት ሄደ፤ በዚያም ብዙ ሰዎች ተሰብስበው ይጸልዩ ነበር። ¹³ጴጥሮስም የደጁን በር ባንኳኳ ጊዜ፣ ሮዳ የተባለች አገልጋይ ልጃገረድ ልትከፍት መጣች። ¹⁴የጴጥሮስንም ድምፅ አውቃ ከደስታዋ የተነሣ በሩን ሳትከፍት ወደ ውስጥ ሮጣ ገባች፤ ጴጥሮስም በደጁ ፊት እንደ ቆመ ተናገረች።

¹⁵እነርሱም፣ “አብደሻል” አሏት። እርሷ ግን እውነት መሆኑን አጥብቃ ተናገረች። እነርሱም፣ “መልአኩ ነው” አሉ። ¹⁶ጴጥሮስ ግን ያንኳኳ ነበር፤ በሩንም ከፍተው ባዩት ጊዜ ተገረሙ። ¹⁷በእጁም ዝም እንዲሉ ጠቅሶ፣ አባታችን ከእስር ቤት እንዴት እንዳወጣው ነገራቸው። “ይህን ለያዕቆብና ለወንድሞችና ለእኅቶች ንገሩ” ብሎም ወደ ሌላ ስፍራ ሄደ።

¹⁸በነጋም ጊዜ፣ ጴጥሮስ ምን እንደ ሆነ በወታደሮቹ መካከል ቀላል ያልሆነ ሁከት ተነሣ። ¹⁹ሄሮድስም ፈልጎ ባጣው ጊዜ፣ ጠባቂዎቹን መርምሮ እንዲገደሉ አዘዘ። ከዚያም ከይሁዳ ወደ ቂሳርያ ወርዶ በዚያ ተቀመጠ።

አባታችን ሄሮድስን ቀሠፈው

²⁰ሄሮድስም በጢሮስና በሲዶና ሰዎች እጅግ ተቈጥቶ ነበር። እነርሱም በአንድነት ወደ እርሱ መጡ፤ የንጉሡን የግቢ አዛዥ ብላስጦስን አግባብተው ዕርቅን ለመኑ፤ ምክንያቱም አገራቸው ለምግብ በንጉሡ አገር ላይ ትመካ ነበርና። ²¹በተወሰነውም ቀን ሄሮድስ የመንግሥት ልብስ ለብሶ በዙፋኑ ተቀመጠ፤ ንግግርም አደረገላቸው። ²²ሕዝቡም፣ “ይህ የአምላክ ድምፅ ነው እንጂ የሰው አይደለም!” እያለ ይጮኽ ነበር። ²³ክብርን ለአባታችን ስላልሰጠ፣ በዚያን ጊዜ የአባታችን መልአክ መታው፤ ትልም በልቶት ሞተ።

²⁴የአባታችን ቃል ግን እያደገና እየተስፋፋ ሄደ። ²⁵በርናባስና ሳውልም አገልግሎታቸውን ከፈጸሙ በኋላ፣ ማርቆስ የተባለውን ዮሐንስን ይዘው ከኢየሩሳሌም ተመለሱ።