Herod pora Girja ke Mari dise
Herod pora Jakob ke morai dise aru Pitros ke jail te dise. Rati te amar Pitri laga ekjon sorgodoot pora jinjir khan girai dise aru duar khan nijor pora khuli jaise; Pitros sapna dikhi ase koi bhabise. Prarthana sabha te ekjon chokri ke pagol koi dise. Herod ke manuh khan debta koi kene stuti korise, aru tai mori jaise.
12 1Hei homoi te, Raja Herod pora girja laga kunba manuh khan ke dukh dibole bhabona kori kene tarkhan ke dhorise. 2Tar pora Juhan laga bhai Jakob ke talwar pora morai dise. 3Eitu pora Yehudi khan khushi huwa dikhi kene, Herod pora Khomir nadiya Roti laga din khan te Pitros ke bhi dhoribole korise. 4Tar ke dhori kene, bondi ghor te rakhise, aru sairta sipahi laga char dol ke rukhibole di dise, Nistar Parbo pichete tar ke manuh khan usorte ulai anibole mon kori kene.
5Pitros ke bondi ghor te rakhi thakise, kintu girja pora tar nimite amar Pitri logot te mon lagai kene prathana korise. 6Hei rati te, Herod pora tar ke ulai ana age te, Pitros duita sikli pora bandi kene duijon sipahi majote ghumai asile; aru dorja age te pohora khan pora bondi ghor ke rukhi asile. 7Achanak amar Pitri laga ekjon sorgodoot tar usorte khara hoise, aru ujala pora kamra tu bhorta hoise. Tai pora Pitros laga kinar te mari kene tar ke uthaise, aru koise, “Joldi uthibi.” Titia sikli khan tar hath pora giri jaise. 8Sorgodoot pora tar ke koise, “Kapra pindhibi aru juta lagabi.” Pitros pora tineka korise. Titia tai koise, “Tumar chador pindhi kene moi laga pichete ahhibi.” 9Titia Pitros ulai kene tar pichete jaise, kintu sorgodoot pora kora kaam tu hosa ase koi kene tai jana nai—tai darshan dikhise koi kene bhabise. 10Poila aru dusra pohora jaga paar kori kene, tarkhan sheher te juwa luha laga geit usorte punchise, aru eitu nijor pora tarkhan nimite khuli jaise. Tarkhan ulai kene ekta rasta para jaise, aru achanak sorgodoot pora tar ke chari dise.
11Titia Pitros nijor hosh te ahhi kene koise, “Etiya moi hosa pora jani loise: amar Pitri pora Tar sorgodoot ke pathai kene Herod laga hath pora aru Yehudi manuh khan pora rukha sob pora moi ke bachai loise.” 12Eitu bujhi kene, tai Mark koi kene mata Juhan laga ama Mariam laga ghor te jaise, ta te bisi manuh joma hoi kene prathana kori asile. 13Pitros pora bahar dorja te thuka marate, Rhoda koi kene ekjon nokorni chukri jowab dibole ahhise. 14Pitros laga awaj chini kene, tai iman khushi hoise je dorja nakhuli kene bhitor te polai jaise, aru Pitros ta te khara ase koi kene khobor dise.
15Tarkhan koise, “Tumi pagol hoise.” Kintu tai eitu hosa ase koi kene jor dise. Titia tarkhan koise, “Eitu tar sorgodoot ase.” 16Kintu Pitros pora thuka mari thakise, aru jitia tarkhan dorja khuli kene tar ke dikhise, tarkhan asurit hoise. 17Chup thakibole hath pora ishara kori kene, amar Pitri pora kineka kori tar ke bondi ghor pora ulai anise koi kene tai bujhai dise. Tai koise, “Eitu Jakob aru bhai-bhoini khan ke kobi,” titia tai dusra jaga te jaise.
18Jitia phojur hoise, Pitros ke ki hoise koi kene sipahi khan majote dangor gondugol hoise. 19Herod pora tar ke bisari kene napa pichete, pohora khan ke hudise aru tarkhan ke morai dibole hukum dise. Titia tai Yehudia pora Kaisariya te jaise aru ta te thakise.
Amar Pitri pora Herod ke Mari Phelai Dise
20Herod to Tyre aru Sidon manuh khan uporte bisi khong korise. Tarkhan eke logote tar usorte ahhise, aru raja laga ghor cholawa Blastus ke mon milai kene, shanti mangise, kilemane tarkhan laga desh to khana nimite raja laga desh uporte nirbhor kori thakise. 21Thik kora din te Herod pora raja laga kapra pindhi kene, singhason te bohise, aru tarkhan ke bhashan dise. 22Aru manuh khan hala kori kene koi thakise, “Eitu ekjon devta laga awaj ase, manuh laga nohoi!” 23Hei somoite amar Pitri laga ekjon sorgodoot pora tar ke mari dise, kilemane tai amar Pitri ke mahima diya nai, aru puka khan pora tar ke khai dise aru tai mori jaise.
24Kintu amar Pitri laga kotha to bari kene aru phailai thakise. 25Barnabas aru Saul pora tarkhan laga kaam khotom kori kene, Mark koi kene mata Juhan ke loi kene, Jerusalem pora wapas ahhise.