Amar Pitri pora Porjati khan ke Grohon Kore

Khatna nakora manuh logote khai kene Peter ke dosh dise, karone tai darshan to ek-ek kori kene aru bhi koise — amar Pitri pora tarkhan ke sudh korise — aru bhirodh rukise. Antioch te biswasi khan Grik manuh khan logote bhi kotha koise. Barnabas pora Saul ke anise, tarkhan ek saal sikhaise, aru Khristan naam otu jaga te poila diya hoise.

Adhyay 11.

Judea te thaka prerit khan aru bhai khan pora, Porjati khan bhi amar Pitri laga kotha grohon korise koi kene hunise. Titia jitia Peter Jerusalem te uthi kene jaise, sunnot kora dol khan pora tar ke ninda korise, koise, “Tumi sunnot nohua manuh khan laga ghor te jaise aru tarkhan logot te khana khaise.”

Kintu Peter pora tarkhan ke shuru pora loi kene sob kotha bujai dise: Moi Joppa sheher te prathana kori thaka somoite, bhabona te harai kene ekta darshan dikhise: sorgo pora charta kona dhori kene namai diya ekta dangor kapor nisina jinis, moi logot te ahhi ponchise. Eitu bhal kori sai kene, moi char theng thaka janwar khan, jongoli janwar khan, matite rengi juwa jinis khan, aru chiriya khan dikhise.

Aru ekta awaj moi ke kowa hunise, ‘Uthibi, Peter; morai kene khabi.’

Kintu moi koise, ‘Kitia bhi nohobo, Prabhu; kilemane napobitro nohoile letera eku jinis moi laga mukh te kitia bhi homai kene juwa nai.’

Kintu awaj tu sorgo pora duisra bar jawab dise, ‘Amar Pitri pora ki sapha kori dise, eitu ke letera nakobi.’ Eitu tinbar hoise, aru sob tu arubi sorgo te tani loise. Thik etiya somoite, Caesarea pora moi logot te pathai diya tinjon manuh, amikhan thaka ghor te ahhi ponchise. Atma pora moi ke, eku alag na bhabi kene tarkhan logot te jabole koise. Ei choyjon bhai khan bhi moi logot te jaise, aru amikhan hei manuh laga ghor te homaise.

Tar pora amikhan ke koise, tar ghor te ekjon sorgoduth khara hoi kene koi thaka tai kineka dikhise, ‘Joppa te manuh pathai kene Peter koi kene mata Simon ke anibi; tai tumi ke kotha ekta kobo, jun pora tumi aru tumar ghor laga sob manuh poritran pabo.’ Jitia moi kotha kobole shuru korise, shuru te amikhan uporte aha nisina, Pobitro Atma tarkhan uporte giri ahhise.

Tetiya amar Prabhu Jisu pora ki koise, eitu moi mon te ahhise: ‘John pora pani pora baptizma dise, kintu tumikhan Pobitro Atma pora baptizma pabo.’ Jodi amar Pitri pora, Prabhu Jisu Khrista ke biswas kora amikhan ke diya nisina ekdurup uphar tarkhan ke bhi dise, tene hole amar Pitri laga rasta rukhabole moi kun ase?

Eitu huni kene, tarkhan chup hoi jaise aru amar Pitri ke mohima dise, koise, “Tene hole amar Pitri pora Porjati khan ke bhi jivon te loi juwa mon-ghura kora dibole dise.”

Antioch te Amar Pitri laga Poribar Bari Jai

Stephen laga karone aha dukh-digdar pora chitari juwa manuh khan Phoenicia, Cyprus, aru Antioch tak jaise, kintu Yehudi khan ke chara aru kun ke bhi kotha kowa nai. Kintu tarkhan majote kunba, Cyprus aru Cyrene pora aha manuh khan, Antioch te ponchise aru Prabhu Jisu laga bhal khobor koi kene Hellenist khan ke bhi kotha koise. ^a Amar Prabhu Jisu laga hath tarkhan logot te thakise, aru bisi manuh biswas kori kene Prabhu phale ghuri ahhise. Jerusalem te thaka mondoli pora eitu kotha hunise aru Barnabas ke Antioch tak pathai dise. Ta te ponchi kene, tai amar Pitri laga anugrah dikhise aru khushi hoise, aru sob ke tan mon pora Prabhu logot te mon dikena thaki thakibole utsah dise. Kilemane tai ekjon bhal manuh thakise, Pobitro Atma aru biswas pora bhorta thakise, aru bisi dangor jamat Prabhu logot te mili jaise.

Titia Barnabas Saul ke bisaribole Tarsus te jaise, tai ke pai kene, Antioch te loi anise. Pura ekta saal tak tarkhan mondoli logot te joma hoi kene bisi dangor jamat ke sikhai dise, aru Antioch te chella khan ke sob pora age Khristan koi kene matise. ^b

Hei din khan te kunba bhabobadi khan Jerusalem pora Antioch te ahhise. Tarkhan majote ekjon, Agabus koi kene mata, tai khara hoise aru Atma pora eneka janai dise je pura prithibi uporte ekta dangor akal ahhibo—aru eitu Claudius laga din khan te hoise. Titia chella khan pora, jonkoi tai laga sakti hisab te, Judea te thaka bhai khan ke modot pathai dibole thik korise. Aru tarkhan eneka korise, Barnabas aru Saul laga hath pora mondoli laga bura khan ke pathai dise.