ሐዋርያት ሥራ 11

11 ¹ሐዋርያትና በይሁዳ የነበሩ ወንድሞች አሕዛብ ደግሞ የአባታችንን ቃል እንደ ተቀበሉ ሰሙ። ²ጴጥሮስም ወደ ኢየሩሳሌም በወጣ ጊዜ፣ ከተገረዙት ወገን የሆኑት ተቃወሙት፤ ³እንዲህ እያሉ፤ “ወደ ያልተገረዙ ሰዎች ገብተህ ከእነርሱ ጋራ በላህ።”

⁴ጴጥሮስ ግን ነገሩን በቅደም ተከተል እንዲህ ብሎ አስረዳቸው፤ ⁵በኢዮጴ ከተማ ስጸልይ መንፈሴ ተመስጦ ራእይ አየሁ፤ እንደ ትልቅ ሸማ የሆነ ነገር በአራቱ ማዕዘኖቹ ተይዞ ከሰማይ ወርዶ ወደ እኔ ደረሰ። ⁶ተመልክቼ ባየሁትም ጊዜ የአራት እግር እንስሳትን፣ የዱር አራዊትን፣ ተሳቢዎችንና የሰማይ ወፎችን አየሁ።

⁷ድምፅም፣ ‘ጴጥሮስ ሆይ፣ ተነሥተህ አርደህ ብላ’ ሲለኝ ሰማሁ።

⁸እኔ ግን፣ ‘ጌታ ሆይ፣ ከቶ አይሆንም፤ ርኩስ ወይም የረከሰ ነገር ከቶ ወደ አፌ ገብቶ አያውቅምና’ አልሁ።

⁹ድምፁም ዳግመኛ ከሰማይ መልሶ፣ ‘አባታችን ያነጻውን አንተ ርኩስ አትበል’ አለ። ¹⁰ይህም ሦስት ጊዜ ሆነ፤ ሁሉም እንደ ገና ተመልሶ ወደ ሰማይ ተነሣ። ¹¹ወዲያውም ከቂሳርያ ወደ እኔ የተላኩ ሦስት ሰዎች ባረፍንበት ቤት ደረሱ። ¹²መንፈስም ምንም ልዩነት ሳላደርግ ከእነርሱ ጋራ እንድሄድ ነገረኝ። እነዚህ ስድስቱ ወንድሞች ደግሞ ከእኔ ጋራ ሄዱ፤ ወደዚያም ሰው ቤት ገባን።

¹³እርሱም መልአኩን በቤቱ ቆሞ እንዲህ ሲል እንዳየ ነገረን፤ ‘ወደ ኢዮጴ ልከህ ጴጥሮስ የሚባለውን ስምዖንን አስመጣ፤ ¹⁴አንተና ቤተ ሰብህ ሁሉ የምትድኑበትን ቃል ይነግርሃል።’ ¹⁵መናገር በጀመርሁም ጊዜ መንፈስ ቅዱስ በመጀመሪያ በእኛ ላይ እንደ ወረደ በእነርሱ ላይ ወረደ።

¹⁶የዚያን ጊዜም ጌታችን ኢየሱስ ያለውን ቃል አስታወስሁ፤ ‘ዮሐንስ በውሃ አጠመቀ፣ እናንተ ግን በመንፈስ ቅዱስ ትጠመቃላችሁ።’ ¹⁷እንግዲህ አባታችን በጌታ ኢየሱስ ክርስቶስ ላመንን ለእኛ የሰጠንን ስጦታ ለእነርሱም ደግሞ ከሰጣቸው፣ አባታችንን ልከለክል እኔ ማን ነኝ?

¹⁸ይህንም በሰሙ ጊዜ ዝም አሉ፤ አባታችንንም እያመሰገኑ፣ “እንግዲያውስ አባታችን ለአሕዛብ ደግሞ ወደ ሕይወት የሚያደርስ ንስሐን ሰጥቷል” አሉ።

የአባታችን ቤተ ሰብ በአንጾኪያ አደገ

¹⁹በእስጢፋኖስ ምክንያት በተነሣው ስደት የተበተኑት እስከ ፊንቄ፣ ቆጵሮስና አንጾኪያ ድረስ ተጓዙ፤ ቃሉንም ለአይሁድ ብቻ እንጂ ለማንም አልተናገሩም። ²⁰ከእነርሱ ግን አንዳንዶቹ፣ የቆጵሮስና የቀሬና ሰዎች፣ ወደ አንጾኪያ ደርሰው ለሄሌናውያን ደግሞ ተናገሩ፤ ስለ ጌታ ኢየሱስ ወንጌልን አበሠሩ። ^a a v20 ሄሌናውያን፦ ግሪክኛ ተናጋሪ ሰዎች ናቸው፤ በዚህ ስፍራ ምናልባት አሕዛብ ናቸው። ²¹የጌታችን ኢየሱስ እጅ ከእነርሱ ጋራ ነበረ፤ ብዙ ሰዎችም አምነው ወደ ጌታ ዘወር አሉ። ²²በኢየሩሳሌም የነበረችው ቤተ ክርስቲያን ይህን ሰምታ በርናባስን ወደ አንጾኪያ ላከች። ²³በደረሰም ጊዜ የአባታችንን ጸጋ አይቶ ደስ አለው፤ ሁሉም በጸና ልብ ለጌታ ተለይተው እንዲኖሩ መከራቸው። ²⁴መንፈስ ቅዱስና እምነት የሞላበት በጎ ሰው ነበረና፤ ብዙ ሕዝብም ወደ ጌታ ተጨመረ።

²⁵በርናባስም ሳውልን ለመፈለግ ወደ ጠርሴስ ሄደ፤ ²⁶ባገኘውም ጊዜ ወደ አንጾኪያ አመጣው። ዓመት ሙሉም ከቤተ ክርስቲያን ጋራ እየተሰበሰቡ ብዙ ሕዝብ አስተማሩ፤ ደቀ መዛሙርቱም መጀመሪያ በአንጾኪያ ክርስቲያን ተባሉ። ^b b v26 ክርስቲያን የሚለው ስም “የክርስቶስ የሆኑ” ማለት ነው፤ የኢየሱስ ተከታዮች በስሙ ሲጠሩ ይህ የመጀመሪያው ነበር።

²⁷በእነዚያ ቀናት ነቢያት ከኢየሩሳሌም ወደ አንጾኪያ ወረዱ። ²⁸ከእነርሱም አጋቦስ የሚባል አንዱ ተነሥቶ በዓለም ሁሉ ላይ ታላቅ ራብ እንደሚሆን በመንፈስ ተናገረ፤ ይህም በቀላውዴዎስ ዘመን ሆነ። ²⁹ደቀ መዛሙርቱም እያንዳንዳቸው እንደ ዐቅማቸው በይሁዳ ለሚኖሩ ወንድሞች እርዳታ ለመላክ ወሰኑ። ³⁰እንዲሁም አደረጉ፤ በበርናባስና በሳውል እጅ ለሽማግሌዎች ላኩት።