ኣቦና ንኣህዛብ ይቕበሎም

ጴጥሮስ ምስ ዘይተገረዙ ሰባት ስለ ዝበልዐ ተነቕፈ፥ ስለዙይ ነቲ ራእይ ብተርታ መሊሱ ነገሮም — ኣቦና ኣፅርይዎም — እቲ ተቓውሞ ኸዓ ኣቋረፀ። ኣብ ኣንጾኪያ ኣመንቲ ንግሪካውያንውን ተዛረቡ። ባርናባስ ንሳውል ኣምፅኦ፥ ሓደ ዓመት መሃሩ፥ ስም ክርስትያን ድማ መጀመርታ ኣብኡ ተፀውዐ።

ምዕራፍ 11።

እቶም ኣብ ይሁዳ ዝነበሩ ሃዋርያትን ኣሕዋትን፥ ኣህዛብ ድማ ቃል ኣቦና ኸም ዝተቐበሉ ሰምዑ። ጴጥሮስ ናብ ኢየሩሳሌም ምስ ደየበ ኸዓ፥ እቶም ካብ ወገን ግርዘት ዝነበሩ ተቓወምዎ፥ ከምዙይ ድማ በልዎ፦ “ናብ ዘይተገረዙ ሰባት ኣቲኻ ምሳታቶም በሊዕኻ።”

ጴጥሮስ ግና ነቲ ነገር ብተርታ ኸምዙይ ኢሉ ኣብራሃሎም፦ ኣብ ከተማ ኢዮጴ ክፅሊ እንተለኹ፥ ተመሲጠ ራእይ ረአኹ፤ ከም ዓብዪ ሸማ ዝበለ ነገር፥ በርባዕተ መኣዝኑ ተኣሲሩ ኻብ ሰማይ ናባይ ወረደ። ኣፀቢቐ እንተ ጠመትክዎ ድማ፥ ኣርባዕተ መሓውር ዘለዎም እንስሳን ኣራዊትን ለመም ዝብሉን ኣዕዋፍ ሰማይን ረአኹ።

ድምፂ ድማ ‘ተንስእ ጴጥሮስ፤ ሕረድ ብላዕ’ ዝብለኒ ሰማዕኹ።

ኣነ ግና ‘ኦ ጐይታ፥ ኣይፋሉን፤ ርኹስ ወይ ዘይንፁህ ነገር ከቶ ናብ ኣፈይ ኣትዩ ኣይፈልጥን እዩ እሞ’ በልኩ።

እቲ ድምፂ ግና ኻብ ሰማይ ን ካልኣይ ጊዜ ‘ነቲ ኣቦና ዘንፅሆ ንስኻ ርኹስ ኣይትበሎ’ ኢሉ መለሰ። እዙይ ድማ ሰለስተ ጊዜ ኮነ፤ ኵሉ ኸዓ ናብ ሰማይ መሊሱ ተሳሕበ። ሽዑ ብኡብኡ ኻብ ቂሳርያ ናባይ ዝተልኣኹ ሰለስተ ሰብኡት፥ ናብታ ዝነበርና ቤት በፅሑ። መንፈስ ድማ ፍልልይ እንተይገበርኩ ምሳታቶም ክኸይድ ነገረኒ። እዞም ሽዱሽተ ኣሕዋት እዚኣቶምውን ምሳይ ከዱ፤ ናብ ቤት እቲ ሰብኣይ ድማ ኣቶና።

ንሱ ድማ ነቲ መልኣኽ ኣብ ቤቱ ደው ኢሉ ኸመይ ከም ዝረኣዮ ነገረና፤ እቲ መልኣኽ ከዓ ከምዙይ በሎ፦ ‘ናብ ኢዮጴ ልኢኽካ ነቲ ጴጥሮስ ተባሂሉ ዝፅዋዕ ስምኦን ኣምፅእ፤ ንሱ ኸዓ ንስኻን ኵሉ ቤተ ሰብካን እትድሕኑሉ ቃል ከምፅኣልካ እዩ።’ ክዛረብ ምስ ጀመርኩ፥ መንፈስ ቅዱስ ከምቲ ኣብ መጀመርታ ኣባና ዝወረደ፥ ኣባታቶም ወረደ።

ሽዑ እቲ ጐይታና ኢየሱስ ‘ዮሃንስ ብማይ ኣጥመቐ፥ ንስኻትኩም ግና ብመንፈስ ቅዱስ ክትጥመቑ ኢኹም’ ኢሉ ዝበሎ ቃል ዘከርኩ። እምበኣር ኣቦና ነቶም በቲ ጐይታ ኢየሱስ ክርስቶስ ዝኣመኑ ንዓና ዝሃበና ማዕረ ውህበት፥ ንኣኣቶምውን እንተ ሃቦም፥ ኣነ ንኣቦና ኽዓግቶ መን እየ?

እዙይ ምስ ሰምዑ ፀጥ በሉ፤ ንኣቦናውን እናኣመስገኑ ከምዙይ በሉ፦ “እምበኣር ኣቦና ንኣህዛብ ድማ ናብ ህይወት ዘብፅሕ ንስሃ ሂቡ።”

ስድራ ቤት ኣቦና ኣብ ኣንጾክያ ይዓቢ

እቶም ብምኽንያት እቲ ብስጢፋኖስ ዝተላዕለ ስደት ዝተበተኑ ድማ፥ ነቲ ቃል ንኣይሁድ ጥራሕ እምበር ንኻልእ ሰብ እንተይተዛረቡ፥ ክሳዕ ፌንቄን ቆጵሮስን ኣንጾክያን ተጓዓዙ። ካባታቶም ግና ገሊኦም፥ ካብ ቆጵሮስን ቀሬናን ዝመፁ ሰብኡት፥ ናብ ኣንጾክያ በፂሖም ነቶም ሄለናውያን ድማ፥ ብዛዕባ ጐይታ ኢየሱስ ወንጌል እናነገሩ ተዛረብዎም። ^a ኢድ ጐይታና ኢየሱስ ከዓ ምሳታቶም ነበረት፤ ብዙሓት ድማ ኣሚኖም ናብ ጐይታ ተመለሱ። እታ ኣብ ኢየሩሳሌም ዘላ ቤተ ክርስቲያን ድማ ብዛዕባ እዙይ ሰምዐት እሞ፥ ንበርናባስ ናብ ኣንጾክያ ለኣኸቶ። ንሱ ድማ ምስ በፅሐ ፀጋ ኣቦና ረአየ እሞ ተሓጐሰ፤ ኵሎም ብፅኑዕ ልቦም ኣብ ጐይታ ፀኒዖም ክነብሩ ኸዓ መዓዶም። ንሱ መንፈስ ቅዱስን እምነትን ዝመልኦ ሰናይ ሰብኣይ ነበረ እሞ፥ ብዙሕ ህዝቢ ናብ ጐይታ ተወሰኸ።

በርናባስ ድማ ንሳኦል ክደሊ ናብ ጠርሴስ ከደ፥ ምስ ረኸቦ ኸዓ ናብ ኣንጾክያ ኣምፅኦ። ምሉእ ዓመት ድማ ምስ ቤተ ክርስቲያን ተኣኪቦም ንብዙሕ ህዝቢ መሃሩ፤ እቶም ደቀ መዛሙርቲ ኸዓ ኣብ ኣንጾክያ ፈለማ “ክርስቲያን” ተባሂሎም ተፀውዑ። ^b

በተን መዓልቲታት እቲኣተን ድማ ነብያት ካብ ኢየሩሳሌም ናብ ኣንጾክያ ወረዱ። ካባታቶም ሓደ ኣጋቦስ ዝበሃል ተሲኡ፥ ብመንፈስ ከዓ ኣብ ኵላ ዓለም ዓብዪ ጥሜት ከም ዝመፅእ ተነበየ፤ እዙይ ድማ ብዘመን ቀላውዴዎስ ኮነ። እቶም ደቀ መዛሙርቲ ኸዓ፥ ነፍሲ ወከፍ ከከም ዓቕሙ፥ ነቶም ኣብ ይሁዳ ዝነብሩ ኣሕዋት ረዲኤት ክሰዱ ወሰኑ። ከምኡ ድማ ገበሩ፤ ብኢድ በርናባስን ሳውልን ኣቢሎም ናብቶም ዓበይቲ ለኣኽዎ።