ଆମ୍ଭମାନଙ୍କ ପିତା ଅଣଯିହୂଦୀମାନଙ୍କୁ ଗ୍ରହଣ କରନ୍ତି

ଅସୁନ୍ନତ ଲୋକଙ୍କ ସହ ଖାଇଥିବାରୁ ପିତରଙ୍କୁ ସମାଲୋଚନା କରାଯାଏ, ତେଣୁ ସେ ଦର୍ଶନଟି ପାଦକୁ ପାଦ ପୁଣି କହନ୍ତି — ଆମ ପିତା ସେମାନଙ୍କୁ ଶୁଚି କରିଛନ୍ତି — ଆଉ ଆପତ୍ତି ବନ୍ଦ ହୁଏ। ଆନ୍ତିୟଖିଆରେ ବିଶ୍ୱାସୀମାନେ ଗ୍ରୀକ୍‌ମାନଙ୍କୁ ମଧ୍ୟ କହନ୍ତି। ବର୍ଣ୍ଣବା ଶାଉଲଙ୍କୁ ଆଣନ୍ତି, ସେମାନେ ଏକ ବର୍ଷ ଶିକ୍ଷା ଦିଅନ୍ତି, ଆଉ ସେଠାରେ ଖ୍ରୀଷ୍ଟିୟାନ ନାମଟି ଜନ୍ମ ନିଏ।

ଅଧ୍ୟାୟ 11।

ଅଣଯିହୂଦୀମାନେ ମଧ୍ୟ ଆମ୍ଭମାନଙ୍କ ପିତାଙ୍କ ବାକ୍ୟ ଗ୍ରହଣ କରିଅଛନ୍ତି ବୋଲି ଯିହୂଦା ପ୍ରଦେଶରେ ଥିବା ପ୍ରେରିତ ଓ ଭାଇମାନେ ଶୁଣିଲେ। ଅତଏବ ପିତର ଯିରୂଶାଲମକୁ ଯିବା ପରେ ସୁନ୍ନତ ଦଳର ଲୋକମାନେ ତାହାଙ୍କ ବିରୁଦ୍ଧରେ ବାଦାନୁବାଦ କଲେ, “ଆପଣ ଅସୁନ୍ନତ ଲୋକମାନଙ୍କ ଗୃହକୁ ଯାଇ ସେମାନଙ୍କ ସହିତ ଭୋଜନ କଲେ” ବୋଲି ସେମାନେ କହିଲେ।

କିନ୍ତୁ ପିତର ସେମାନଙ୍କୁ ଆଦ୍ୟରୁ କ୍ରମାନୁସାରେ ବୁଝାଇ କହିଲେ, ମୁଁ ଯାଫୋ ନଗରରେ ପ୍ରାର୍ଥନା କରୁଥିବା ସମୟରେ ଭାବ ବିଭୋର ହୋଇ ଗୋଟିଏ ଦର୍ଶନ ଦେଖିଲି; ଏକ ବୃହତ୍ ଚାଦର ପରି ପାତ୍ର ଚାରି କଡ଼ ଦ୍ଵାରା ସ୍ଵର୍ଗରୁ ଓହ୍ଲାଇ ଦିଆଯାଇ ମୋʼ ନିକଟରେ ଆସି ପହଞ୍ଚିଲା। ମୁଁ ସେଥିପ୍ରତି ଏକାଗ୍ର ଦୃଷ୍ଟିରେ ଚାହିଁ ଚାରିଗୋଡ଼ିଆ ପଶୁ, ବନ୍ୟ ଜନ୍ତୁ, ସରୀସୃପ ଓ ଆକାଶର ପକ୍ଷୀ ଦେଖିଲି।

ପୁଣି, “ପିତର, ଉଠ; ବଧ କରି ଭୋଜନ କର” ବୋଲି ମୋତେ କହୁଥିବା ଗୋଟିଏ ସ୍ଵର ମୁଁ ଶୁଣିଲି।

କିନ୍ତୁ ମୁଁ କହିଲି, “ପ୍ରଭୁ, ଏପରି କଥା କେବେ ହେଉ ନାହିଁ; କାରଣ କୌଣସି ଅପବିତ୍ର ବା ଅଶୁଚି ଦ୍ରବ୍ୟ ମୋʼ ମୁଖରେ କେବେ ପ୍ରବେଶ କରି ନାହିଁ।”

କିନ୍ତୁ ସେହି ସ୍ଵର ଦ୍ଵିତୀୟ ଥର ସ୍ଵର୍ଗରୁ ଉତ୍ତର ଦେଲା, “ଆମ୍ଭମାନଙ୍କ ପିତା ଯାହା ଶୁଚି କରିଅଛନ୍ତି, ତାହା ତୁମ୍ଭେ ଅପବିତ୍ର ବୋଲି କୁହ ନାହିଁ।” ଏହା ତିନି ଥର ହେଲା, ଆଉ ସମସ୍ତ ବସ୍ତୁ ପୁନର୍ବାର ସ୍ଵର୍ଗକୁ ଉଠାଇ ନିଆଗଲା। ସେହିକ୍ଷଣି କାଇସରିଆରୁ ମୋʼ ନିକଟକୁ ପ୍ରେରିତ ତିନିଜଣ ଲୋକ, ଆମ୍ଭେମାନେ ଯେଉଁ ଗୃହରେ ରହୁଥିଲୁ, ସେଠାରେ ଆସି ଉପସ୍ଥିତ ହେଲେ। କୌଣସି ପ୍ରଭେଦ ନ କରି ସେମାନଙ୍କ ସହିତ ଯିବା ନିମନ୍ତେ ଆତ୍ମା ମୋତେ କହିଲେ। ଆଉ ଏହି ଛଅ ଜଣ ଭାଇ ମଧ୍ୟ ମୋʼ ସହିତ ଗଲେ, ପୁଣି ଆମ୍ଭେମାନେ ସେହି ବ୍ୟକ୍ତିଙ୍କ ଗୃହରେ ପ୍ରବେଶ କଲୁ।

ସେ ଆପଣା ଗୃହରେ ଜଣେ ଦୂତଙ୍କୁ ଠିଆ ହୋଇ ଏହା କହୁଥିବା କିପରି ଦେଖିଥିଲେ, ତାହା ଆମ୍ଭମାନଙ୍କୁ ଜଣାଇଲେ, “ଯାଫୋକୁ ଲୋକ ପଠାଇ ପିତର ନାମରେ ପରିଚିତ ଶିମୋନଙ୍କୁ ଡାକି ଆଣ; ସେ ତୁମ୍ଭକୁ ଏପରି ବାକ୍ୟ କହିବେ, ଯାହା ଦ୍ଵାରା ତୁମ୍ଭେ ଓ ତୁମ୍ଭ ସମସ୍ତ ପରିବାର ପରିତ୍ରାଣ ପ୍ରାପ୍ତ ହେବ।” ଯେତେବେଳେ ମୁଁ କହିବାକୁ ଆରମ୍ଭ କଲି, ସେତେବେଳେ ପ୍ରଥମେ ଆମ୍ଭମାନଙ୍କ ଉପରେ ଯେପରି, ସେମାନଙ୍କ ଉପରେ ମଧ୍ୟ ସେପରି ପବିତ୍ର ଆତ୍ମା ଅବତରଣ କଲେ।

ସେତେବେଳେ ଆମ୍ଭମାନଙ୍କ ପ୍ରଭୁ ଯୀଶୁ ଯାହା କହିଥିଲେ, ତାହା ମୋତେ ମନେ ପଡ଼ିଲା, “ଯୋହନ ଜଳରେ ବାପ୍ତିସ୍ମ ଦେଲେ ସତ, କିନ୍ତୁ ତୁମ୍ଭେମାନେ ପବିତ୍ର ଆତ୍ମାରେ ବାପ୍ତିଜିତ ହେବ।” ଅତଏବ ପ୍ରଭୁ ଯୀଶୁ ଖ୍ରୀଷ୍ଟଙ୍କଠାରେ ବିଶ୍ଵାସ କରିଥିବା ଆମ୍ଭମାନଙ୍କୁ ଆମ୍ଭମାନଙ୍କ ପିତା ଯେଉଁ ଦାନ ଦେଲେ, ସେହି ସମାନ ଦାନ ଯଦି ସେ ସେମାନଙ୍କୁ ଦେଲେ, ତେବେ ଆମ୍ଭମାନଙ୍କ ପିତାଙ୍କୁ ବାଧା ଦେବା ପାଇଁ ମୁଁ କିଏ?

ଏହା ଶୁଣି ସେମାନେ ନୀରବ ହେଲେ, ପୁଣି, “ତେବେ ଆମ୍ଭମାନଙ୍କ ପିତା ଅଣଯିହୂଦୀମାନଙ୍କୁ ମଧ୍ୟ ଜୀବନଦାୟକ ମନପରିବର୍ତ୍ତନ ଦାନ କରିଅଛନ୍ତି” ବୋଲି କହି ଆମ୍ଭମାନଙ୍କ ପିତାଙ୍କ ପ୍ରଶଂସା କଲେ।

ଆନ୍ତିୟଖିଆରେ ଆମ୍ଭମାନଙ୍କ ପିତାଙ୍କ ପରିବାର ବୃଦ୍ଧି ପାଏ

ସ୍ତିଫାନଙ୍କ ବିଷୟରେ ଘଟିଥିବା ତାଡ଼ନା ଦ୍ଵାରା ଛିନ୍ନଭିନ୍ନ ହୋଇଥିବା ଲୋକମାନେ ଫୈନୀକିଆ, କୁପ୍ର ଓ ଆନ୍ତିୟଖିଆ ପର୍ଯ୍ୟନ୍ତ ଭ୍ରମଣ କଲେ, ଆଉ କେବଳ ଯିହୂଦୀମାନଙ୍କ ବିନା ଅନ୍ୟ କାହାକୁ ବାକ୍ୟ କହିଲେ ନାହିଁ। କିନ୍ତୁ ସେମାନଙ୍କ ମଧ୍ୟରୁ କେତେକ, ଅର୍ଥାତ୍ କୁପ୍ର ଓ କୁରୀଣୀର ଲୋକମାନେ, ଆନ୍ତିୟଖିଆରେ ପହଞ୍ଚି ଗ୍ରୀକ୍‌ଭାଷୀମାନଙ୍କୁ ମଧ୍ୟ ପ୍ରଭୁ ଯୀଶୁଙ୍କ ବିଷୟକ ସୁସମାଚାର ଜଣାଇ କଥା କହିଲେ। ^a ଆମ୍ଭମାନଙ୍କ ପ୍ରଭୁ ଯୀଶୁଙ୍କ ହସ୍ତ ସେମାନଙ୍କ ସହିତ ଥିଲା, ଆଉ ଅନେକ ଲୋକ ବିଶ୍ଵାସ କରି ପ୍ରଭୁଙ୍କ ପ୍ରତି ଫେରିଲେ। ଏ ବିଷୟର ସମ୍ବାଦ ଯିରୂଶାଲମରେ ଥିବା ମଣ୍ଡଳୀ ଶୁଣି ବର୍ଣ୍ଣବାଙ୍କୁ ଆନ୍ତିୟଖିଆକୁ ପଠାଇଲା। ସେ ସେଠାରେ ପହଞ୍ଚି ଆମ୍ଭମାନଙ୍କ ପିତାଙ୍କ ଅନୁଗ୍ରହ ଦେଖି ଆନନ୍ଦିତ ହେଲେ, ଆଉ ସମସ୍ତଙ୍କୁ ଦୃଢ଼ ଚିତ୍ତରେ ପ୍ରଭୁଙ୍କ ପ୍ରତି ଅନୁରକ୍ତ ରହିବା ନିମନ୍ତେ ଉତ୍ସାହିତ କଲେ। କାରଣ ସେ ଜଣେ ସତ୍‌ଲୋକ ଥିଲେ, ପବିତ୍ର ଆତ୍ମାରେ ଓ ବିଶ୍ଵାସରେ ପରିପୂର୍ଣ୍ଣ ଥିଲେ, ପୁଣି ବହୁସଂଖ୍ୟକ ଲୋକ ପ୍ରଭୁଙ୍କ ସହିତ ଯୋଗ ଦେଲେ।

ଅତଏବ ବର୍ଣ୍ଣବା ଶାଉଲଙ୍କୁ ଖୋଜିବା ନିମନ୍ତେ ତାର୍ଷକୁ ଗଲେ, ଆଉ ତାହାଙ୍କୁ ପାଇ ଆନ୍ତିୟଖିଆକୁ ନେଇ ଆସିଲେ। ସେମାନେ ସମ୍ପୂର୍ଣ୍ଣ ଏକ ବର୍ଷ ପର୍ଯ୍ୟନ୍ତ ମଣ୍ଡଳୀ ସହିତ ସମବେତ ହୋଇ ବହୁସଂଖ୍ୟକ ଲୋକଙ୍କୁ ଶିକ୍ଷା ଦେଲେ, ପୁଣି ଆନ୍ତିୟଖିଆରେ ଶିଷ୍ୟମାନେ ପ୍ରଥମେ ଖ୍ରୀଷ୍ଟିୟାନ ବୋଲି ଡକାଗଲେ। ^b

ସେହି ସମୟରେ କେତେକ ଭାବବାଦୀ ଯିରୂଶାଲମରୁ ଆନ୍ତିୟଖିଆକୁ ଓହ୍ଲାଇ ଆସିଲେ। ସେମାନଙ୍କ ମଧ୍ୟରୁ ଆଗାବ ନାମକ ଜଣେ ଠିଆ ହୋଇ ଆତ୍ମାଙ୍କ ଦ୍ଵାରା ଭବିଷ୍ୟଦ୍‌ବାକ୍ୟ କହିଲେ ଯେ, ସମଗ୍ର ଜଗତ ଉପରେ ଏକ ମହାଦୁର୍ଭିକ୍ଷ ଘଟିବ — ତାହା କ୍ଲାଉଦିୟଙ୍କ ସମୟରେ ଘଟିଲା। ସେଥିରେ ଶିଷ୍ୟମାନେ, ପ୍ରତ୍ୟେକେ ଆପଣା ଆପଣା ସାମର୍ଥ୍ୟ ଅନୁସାରେ, ଯିହୂଦା ପ୍ରଦେଶରେ ବାସ କରୁଥିବା ଭାଇମାନଙ୍କ ନିକଟକୁ ସାହାଯ୍ୟ ପଠାଇବା ପାଇଁ ସ୍ଥିର କଲେ। ଆଉ ସେମାନେ ସେହିପରି କଲେ, ବର୍ଣ୍ଣବା ଓ ଶାଉଲଙ୍କ ଦ୍ଵାରା ତାହା ପ୍ରାଚୀନମାନଙ୍କ ନିକଟକୁ ପଠାଇଦେଲେ।