Otsak 11

11 ¹Judeali khalei paokazatbing kala shitkasangabingna, Gentilebingnala ithumwui Avāwui tui khuisanghaira kaji theihaowa. ²Chieina Peter Jerusalemli kākahai eina, ahui rimkashokbing china ali panglāk eina yeta, ³hānga, "Nana ahui marimkashokbingwui azangda athumla phāshak phazāngaruma."

⁴Kha Peterna athumli maram chi apong apong eina hāngchithei: ⁵"Joppa keinungli seihā sāda leilakha, ili pingairisihaowa kala khamahā akha thei: kachon kahaka kathā ot akha achonmarei matili kazingram eina singlaga, iwuili chihokatā rāmahāmi." ⁶Chili yangtitta yangkakā tharan, aphei mati kakā sāyurbing, sākashe sāyur, phara̱-pharāyur, kala vānaoyurbing ina thei.

⁷Kala akhon akhana ili, 'Peter, ngakarthuilu; shaothatta shailu,' da hānga chi ina shā.

⁸Kha ina hānga, 'Maningphutmana, Proho; kaja makathar kala khamakhao ot akhala aja rāshungda ikhamorli masanglakranga.'

⁹Kha akhon china kazingram eina kakhaneshida hāngluishita, 'Ithumwui Avāna tharngasak kahai hili nana makatharana majipaimara.' ¹⁰Hithāda kathum shihailaga chi katonga kazingram khuikāluihaowa. ¹¹Chichangli Caesarea eina iwuili chihovā kahai mi kathum ithum apamsangwui shimli rāzanga. ¹²Manglāna ili athumla ngasoda vāda, khikha khangatei masā khavai hānga. Hi ivānao tharukbingnala ili ngasoda vai, kala ithum mipā chiwui shimli azanga.

¹³Ana ithumli awui shimli kazingrao akha nganingkasā theihai kaji hāngchithei, kala kazingrao china hānga: 'Joppali chihovāda Simon kahopa Peter chili ahokhui ngasaklu; ¹⁴ana nali tui khuirāra, chiwui mangā eina na kala nashi shimkhur katonga kahui samphangra.' ¹⁵Ina hāngchithei wukhananghaoda, rida ithumwuitungli tāshungda thāda, Manglā Kathara athumwuitungli tāshunga.

¹⁶Chieina ithumwui Proho Jishuna hāngkahai tui chi ina phaningunga: 'Johnna tara̱ eina ra̱hikmi, kha nathumli Manglā Kathara eina ra̱hikmira.' ¹⁷Ithumwui Avāna, Proho Jishu Khristali shitkasang kahai ithumli mihai lemmet ngaraikachā chi athumlila mihaiakha, ithumwui Avāli katong khavai ina khipā ngasāpairakhala?

¹⁸Hi shālaga athum vari eina pamda ithumwui Avāli sochikatta hānga, "Chieina ithumwui Avāna Gentilebinglila kharing samphang khavai ning ngatei mihaira."

Ithumwui Avāwui Shimkhur Antiochli Sokhami

¹⁹Stephenwui vang shokkahai rekakharekna ngapha̱ kahaibing china Phoenicia, Cyprus kala Antioch tāshunga vākānda, Jihudimāngli tui hānga. ²⁰Kha athumwui ngachaili Cyprus kala Cyrene eina raihai mi kaikhana Antiochli rāzangda Hellenistbinglila Proho Jishuwui pongli paokaphā hāngchithei. ^a a v20 Hellenist: Greek khamatuia mibing, hi pongli Gentilebing sāhaikapta lei. ²¹Ithumwui Proho Jishuwui pāngna athumli ngasomisai, kala mi kachungkhana shitsanghaoda Proholi latunga. ²²Jerusalemli khalei churchna hi kashā tharan Barnabasli Antiochli chihovāhaowa. ²³Ana chili vākashung eina ithumwui Avāwui lukhamashan theida ringphāda, saikorali wuklung pangda eina Proholi leiching khavai kasatsanga. ²⁴Kaja ana Manglā Kathara kala shitkasangna pemting kahai kaphā mi akhana, kala mi kachungkha Proholi ngarumsanghaowa.

²⁵Chieina Barnabasna Saulli angathingkhui khavai Tarsusli vāhaowa. ²⁶Ali samphangda ana ali Antiochli thānunga. Zingkum katong akha peida athumna church chili ngasoda kazip ngasaka kala mi kachungkhali tamchithei, kala Antiochli sākhangatha̱bingli rimeikapta "Khristian" da phokmi. ^b b v26 Khristian kaho aming chiwui kakhalata "Khristawui mibing" da; hi Jishuwui shurkazatbing awui ming eina rimeikapta phokmi kahaina.

²⁷Zimikshobing chili marānbing Jerusalemwui eina Antiochli rai. ²⁸Athumwui ngachaili Agabus kaho akhana nganingkāda, Manglāwui mangā eina okathui saikoratungli chāmrei khare rāra da marānmi. Hi Claudiusna awunga munglakha shokkahaina. ²⁹Sākhangatha̱bingna, mi kachiva̱na awui sākashap athishurda, Judeali leikasa ivānaobingli ngachon chihovā khavai tuitak khui. ³⁰Kala athumna chithada sāda, chi Barnabas eina Saulwui pāng eina ararnaobingli chihovai.