Herodna Churchli Ngarara
Herodna Jamesli shaothata kala Peterli phātopli narhai. Ngayā ithumwui Avāwui kazingrao akhana chai chi tāngasaka, kala ngavei khalattana rakhaowa; Peterna mahākhami theida phaninga. Seihā sākazipli, rao ngalāva̱ akhali "Na mangkhama̱ thāhaira" da hānga. Mibingna vare da hokhui kahai Herod thihaowa.
12 1Atam chitharan Herod awungana churchwui mi kaikhali ngararda, athumli sākashi sākhavai phaninga. 2Ana Johnwui achinā Jamesli raighai eina shaothata. 3Hi Jihudibingli ningyāng ungngasakhaowa kaji theilaga, Herodna khawok makazang khamui atamli Peterlila tukkhuihaowa. 4Ana ali tukkhuida phātop shimli narpihaowa, kala ali mayon khavai shipai mati kaje shang matili mihaowa; makānkhami phanitwui thili ali mibingli shokngasak khavai phaninga.
5Peter phātop shimli leichingsai, kha churchna awui vang ithumwui Avāli ngashun ngayā mateila seihā sai. 6Chithang ngayā, Herodna ali shokngasak rida, chai khani eina khalapta Peter shipai khani chiwui ngachaili pihaowa; kala khamayonbingna khāmong mangāli phātop chili mayonpama. 7Kha yanglu, ithumwui Avāwui kazingrao akhana awui pheili nganinga, kala kahorna phātop shim chili pemtinghaowa. Ana Peterwui shaolaga amathotkhuida hānga, "Ngalāngda ngakarthuilu." Chai chi awui pāng eina tāhaowa. 8Kazingrao china ali hānga, "Kachon sangda nawui pheihop sangkhuilu." Peterna chithāda sai. Chieina ana hānga, "Nawui kachon khaluilaga ili shurlu." 9Chieina Peterna shokta ali shurthuwa; kazingrao chiwui otsak chi kachangkhat kaji matheila, ana mahākhami akha theida phaninga. 10Khare kala kakhane khamayon pam chili makānlaga, athumna keinung chiwui mari khāmong chili shoka; chiya khalattana athumwui vang shohaowa. Athumna shoklaga shongfa akha zatlakha, kazingrao chi kashuirak awui eina thuihaowa.
11Chieina Peterna a khalatta theiluida hānga, "Ara ina kachangkhat da thei: ithumwui Avāna awui kazingraoli chihovāda Herodwui pāng eina kala Jihudibingna phaningkasā saikorawui eina ili kanshokmi." 12Chi theilaga, ana Mark da hokahai John chiwui ava̱va̱ Marywui shimli vai, chili mi kachungkha kazipkhuida seihā sāsai. 13Peterna ngavei khāmong chili kakung tharan, Rhoda kaho rao ngalāva̱ akhana ngahānkā khavai rai. 14Peterwui akhon chi machutta, ana ringphāshunhaida khāmong marakla ngayongzangda, Peter chili nganinga da unghānga.
15"Na mangkhama̱ thāhaira," da athumna hānga. Kha ana kachangkhat da pinglak eina hānga. Chieina athumna, "Chi awui kazingraona" da hānga. 16Kha Peterna kakung leichinga, kala athumna khāmong shomilala ali theida matakhakhaowa. 17Apāng eina va̱ri leiranu da machutmida, ithumwui Avāna ali kathada phātop shim eina thānshoka kaji ana hāngchithei. "Hi Jamesli kala ivānaobingli hāngmilu" da hānglaga apam khangatei akhali vāhaowa.
18Ngathor kahai eina, Peterwui khi shokkahaikhala kaji pongli shipaibingwui ngachaili ngaunlop kateokhala maleimana. 19Herodna ali phāda masamkaphang eina, khamayonbing chili ngahānlaga athumli shaothat ngasak khavai kasoi. Chiwui thili ana Judeawui eina Caesareali tāda chili pamsanga.
Ithumwui Avāna Herodli Sāthata
20Herodna Tyre eina Sidonnaobingli malungvāthaowa. Athum katonga awuili ra̱vailaga, awungawui chamalā Blastusli ngahānngaihailaga, chingri kahai poi, kaja athumwui ngalei chi kashakazāwui vang awungawui ngaleili shaikapamsai. 21Tākam kahai zimiksholi Herodna wungnaowui sāri shaksālaga, wungpamkhongli pamda, athumli tui hānga. 22Kala yaruina, "Hi varewui kahāngna, miwui maningmana!" da panglāk eina vaozata. 23Ana ithumwui Avāli tekhamatei makhamiwui vang chithākhaleoda ithumwui Avāwui kazingrao akhana ali yapkārsanghaowa; kala kachaina ali zāda ana thihaowa.
24Kha ithumwui Avāwui tui chi mataisangda ngayaovamamāna. 25Barnabas eina Saulna aniwui ot chi sakuphaihailaga Mark kaho John chila hophunglaga Jerusalemwui eina latunga.
