اعمال 12

12 ¹اُسی زمانے میں ہیرودیس بادشاہ نے کلیسیا کے بعض لوگوں پر ہاتھ ڈالا، اِس ارادے سے کہ اُنہیں دُکھ دے۔ ²اُس نے یوحنا کے بھائی یعقوب کو تلوار سے قتل کروا دیا۔ ³جب اُس نے دیکھا کہ اِس سے یہودی خوش ہوتے ہیں، تو اُس نے پطرس کو بھی گرفتار کر لیا۔ یہ بےخمیری روٹی کے دنوں کی بات ہے۔ ⁴اُس نے اُسے پکڑ کر قید میں ڈالا اور پہرے کے لیے چار چار سپاہیوں کے چار دستوں کے حوالے کر دیا، اِس ارادے سے کہ عیدِ فسح کے بعد اُسے لوگوں کے سامنے لائے۔

⁵پس پطرس قید میں رکھا گیا، مگر کلیسیا اُس کے لیے ہمارے باپ سے دل و جان سے دعا کرتی رہی۔ ⁶جس رات ہیرودیس اُسے باہر لانے والا تھا، اُس سے پہلے پطرس دو سپاہیوں کے درمیان دو زنجیروں سے بندھا ہوا سو رہا تھا، اور دروازے کے سامنے پہرے دار قیدخانے کی نگہبانی کر رہے تھے۔ ⁷اچانک ہمارے باپ کا ایک فرشتہ اُس کے پاس آ کھڑا ہوا، اور کوٹھری روشنی سے بھر گئی۔ اُس نے پطرس کے پہلو پر ہاتھ مار کر اُسے جگایا اور کہا، ”جلدی اُٹھ۔“ اور زنجیریں اُس کے ہاتھوں سے گِر پڑیں۔ ⁸فرشتے نے اُس سے کہا، ”کمر باندھ اور اپنی جوتیاں پہن لے۔“ پطرس نے ویسا ہی کیا۔ پھر اُس نے کہا، ”اپنا چوغہ اوڑھ کر میرے پیچھے چلا آ۔“ ⁹پس پطرس نکل کر اُس کے پیچھے ہو لیا، اور نہ جانتا تھا کہ فرشتے کا یہ کام حقیقی ہے، بلکہ سمجھا کہ رویا دیکھ رہا ہے۔ ¹⁰وہ پہلے اور دوسرے پہرے سے گزر کر اُس لوہے کے پھاٹک تک پہنچے جو شہر کی طرف کھُلتا ہے، اور وہ اُن کے لیے آپ سے آپ کھُل گیا۔ وہ باہر نکلے اور ایک گلی طے کی، اور یکایک فرشتہ اُس سے جدا ہو گیا۔

¹¹تب پطرس ہوش میں آیا اور بولا، ”اب مجھے یقین سے معلوم ہو گیا کہ ہمارے باپ نے اپنا فرشتہ بھیج کر مجھے ہیرودیس کے ہاتھ سے اور یہودی قوم کی ساری اُمیدوں سے چھڑا لیا۔“ ¹²یہ سمجھ کر وہ مریم کے گھر گیا، جو یوحنا کی ماں تھی، جسے مرقس بھی کہتے ہیں، جہاں بہت سے لوگ جمع ہو کر دعا کر رہے تھے۔ ¹³جب پطرس نے پھاٹک کا دروازہ کھٹکھٹایا، تو رُدی نامی ایک لڑکی سُننے آئی۔ ¹⁴پطرس کی آواز پہچان کر وہ اِس قدر خوش ہوئی کہ پھاٹک کھولے بغیر دوڑ کر اندر گئی اور خبر دی کہ پطرس پھاٹک پر کھڑا ہے۔

¹⁵اُنہوں نے کہا، ”تُو دیوانی ہے۔“ مگر وہ زور دے کر کہتی رہی کہ یہ سچ ہے۔ تب اُنہوں نے کہا، ”یہ اُس کا فرشتہ ہوگا۔“ ¹⁶لیکن پطرس کھٹکھٹاتا ہی رہا، اور جب اُنہوں نے دروازہ کھول کر اُسے دیکھا تو حیران رہ گئے۔ ¹⁷اُس نے ہاتھ سے اشارہ کیا کہ خاموش رہیں، اور اُنہیں بتایا کہ کس طرح ہمارے باپ نے اُسے قیدخانے سے نکالا۔ پھر اُس نے کہا، ”یہ سب یعقوب اور بھائیوں کو بتا دینا۔“ اور نکل کر دوسری جگہ چلا گیا۔

¹⁸جب صبح ہوئی تو سپاہیوں میں بڑی کھلبلی مچ گئی کہ پطرس کا کیا ہوا۔ ¹⁹ہیرودیس نے اُس کی تلاش کی اور جب نہ پایا تو پہرے داروں سے پوچھ گچھ کر کے حکم دیا کہ اُنہیں قتل کر دیا جائے۔ پھر وہ یہودیہ سے قیصریہ کو چلا گیا اور وہیں رہنے لگا۔

ہمارا باپ ہیرودیس کو مار گراتا ہے

²⁰ہیرودیس صور اور صیدا کے لوگوں سے سخت ناراض تھا۔ وہ سب مل کر اُس کے پاس آئے، اور بادشاہ کے خاص خادم بلستس کو اپنی طرف کر کے صلح کے طالب ہوئے، کیونکہ اُن کے مُلک کی خوراک کا دارومدار بادشاہ کے مُلک پر تھا۔ ²¹مقررہ دن ہیرودیس نے شاہی لباس پہنا اور تخت پر بیٹھ کر اُن کے سامنے تقریر کی۔ ²²اور مجمع پکار پکار کر کہنے لگا، ”یہ کسی دیوتا کی آواز ہے، انسان کی نہیں!“ ²³اُسی دم ہمارے باپ کے ایک فرشتے نے اُسے مار گرایا، اِس لیے کہ اُس نے ہمارے باپ کی تمجید نہ کی، اور کیڑوں نے اُسے کھا لیا اور وہ مر گیا۔

²⁴لیکن ہمارے باپ کا کلام بڑھتا اور پھیلتا گیا۔ ²⁵برنباس اور ساؤل اپنی خدمت پوری کر کے یروشلیم سے لوٹے، اور یوحنا کو، جسے مرقس بھی کہتے ہیں، اپنے ساتھ لے گئے۔