Ìṣe àwọn Aposteli 12

12 ¹Ní nǹkan bí àkókò náà, Herodu ọba kọlu àwọn kan tí wọ́n jẹ́ ti ìjọ, ó pète láti ṣe wọ́n níbi. ²Ó fi idà pa Jakọbu, arákùnrin Johanu. ³Nígbà tí ó rí i pé èyí wu àwọn Júù, Herodu tẹ̀síwájú láti mú Peteru pẹ̀lú, ní àwọn ọjọ́ àjọ Àkàrà Aláìwú. ⁴Ó mú un, ó sì sọ ọ́ sínú ọgbà ẹ̀wọ̀n, ó sì fi í lé ẹgbẹ́ ọmọ ogun mẹ́rin lọ́wọ́, tí ọ̀kọ̀ọ̀kan ní ọmọ ogun mẹ́rin, láti ṣọ́ ọ, ó pète láti mú un jáde fún àwọn ènìyàn lẹ́yìn àjọ Ìrékọjá.

⁵A sì fi Peteru pamọ́ sínú ọgbà ẹ̀wọ̀n, ṣùgbọ́n ìjọ gbàdúrà tagbáragbára sí Baba wa nítorí rẹ̀. ⁶Ní òru ọjọ́ náà, kí Herodu tó mú un jáde, Peteru ń sùn láàrin ọmọ ogun méjì, a fi ẹ̀wọ̀n méjì dè é; àwọn olùṣọ́ tí ó wà níwájú ìlẹ̀kùn sì ń ṣọ́ ọgbà ẹ̀wọ̀n náà. ⁷Lójijì, angẹli Baba wa dúró lẹ́gbẹ̀ẹ́ rẹ̀, ìmọ́lẹ̀ sì kún inú yàrá náà. Ó lu Peteru ní ìhà, ó jí i, ó sì wí pé, “Dìde kíákíá.” Ẹ̀wọ̀n náà sì bọ́ kúrò ní ọwọ́ rẹ̀. ⁸Angẹli náà sọ fún un pé, “Wọ aṣọ rẹ, kí o sì wọ bàtà rẹ.” Peteru sì ṣe bẹ́ẹ̀. Nígbà náà ni ó wí pé, “Da aṣọ àwọ̀lékè rẹ bo ara rẹ, kí o sì tẹ̀lé mi.” ⁹Peteru sì jáde, ó tẹ̀lé e, kò sì mọ̀ pé ohun tí angẹli náà ń ṣe jẹ́ òtítọ́—ó rò pé ó ń rí ìran. ¹⁰Nígbà tí wọ́n kọjá ibùdó olùṣọ́ àkọ́kọ́ àti èkejì, wọ́n dé ẹnu-ọ̀nà irin tí ó wọ ìlú, tí ó ṣí sílẹ̀ fún wọn fúnra rẹ̀. Wọ́n jáde, wọ́n rìn ní ìgboro kan, lójijì ni angẹli náà sì fi í sílẹ̀.

¹¹Nígbà náà ni ojú Peteru wálẹ̀, ó sì wí pé, “Nísinsìnyí mo mọ̀ dájúdájú pé: Baba wa rán angẹli rẹ̀, ó sì gbà mí sílẹ̀ kúrò lọ́wọ́ Herodu àti kúrò nínú ohun gbogbo tí àwọn ènìyàn Júù ń retí.” ¹²Nígbà tí ó woye èyí, ó lọ sí ilé Maria, ìyá Johanu tí a tún ń pè ní Marku, níbi tí ọ̀pọ̀lọpọ̀ ènìyàn péjọ sí, tí wọ́n ń gbàdúrà. ¹³Nígbà tí Peteru kàn ìlẹ̀kùn ẹnu-ọ̀nà, ọmọbìnrin ìránṣẹ́ kan tí orúkọ rẹ̀ ń jẹ́ Roda wá láti dáhùn. ¹⁴Nígbà tí ó dá ohùn Peteru mọ̀, ayọ̀ kún inú rẹ̀ tó bẹ́ẹ̀ tí ó fi sáré wọ ilé láìṣí ẹnu-ọ̀nà, ó ń kéde pé Peteru dúró níbẹ̀.

¹⁵Wọ́n wí pé, “Orí rẹ kò pé.” Ṣùgbọ́n ó tẹnu mọ́ ọn pé òtítọ́ ni. Nígbà náà ni wọ́n wí pé, “Angẹli rẹ̀ ni.” ¹⁶Ṣùgbọ́n Peteru ń bá a lọ ní kíkàn ìlẹ̀kùn, nígbà tí wọ́n sì ṣí ìlẹ̀kùn tí wọ́n rí i, ẹnu yà wọ́n. ¹⁷Ó fi ọwọ́ rẹ̀ ṣe àpẹẹrẹ pé kí wọ́n dákẹ́, ó sì ṣàlàyé bí Baba wa ṣe darí rẹ̀ jáde kúrò nínú ọgbà ẹ̀wọ̀n. Ó wí pé, “Ẹ sọ èyí fún Jakọbu àti àwọn arákùnrin àti arábìnrin,” lẹ́yìn náà ó lọ sí ibòmíràn.

¹⁸Nígbà tí ilẹ̀ mọ́, rúkèrúdò tí kò kéré sí láàrin àwọn ọmọ ogun nípa ohun tí ó ṣẹlẹ̀ sí Peteru. ¹⁹Herodu, lẹ́yìn tí ó wá a tí kò rí i, ó bi àwọn olùṣọ́ léèrè, ó sì pàṣẹ pé kí a pa wọ́n. Lẹ́yìn náà ó sọ̀kalẹ̀ láti Judea lọ sí Kesarea, ó sì dúró síbẹ̀.

Baba Wa Lù Herodu Bolẹ̀

²⁰Herodu bínú gidigidi sí àwọn ará Tire àti Sidoni. Wọ́n jọ wá sí ọ̀dọ̀ rẹ̀, nígbà tí wọ́n sì ti yí Blastu, ìjòyè ààfin ọba, lọ́kàn padà sí ẹ̀gbẹ́ wọn, wọ́n béèrè fún àlàáfíà, nítorí ilẹ̀ wọn gbára lé ilẹ̀ ọba fún oúnjẹ. ²¹Ní ọjọ́ tí a yàn, Herodu wọ aṣọ ọba, ó jókòó lórí ìtẹ́, ó sì sọ̀rọ̀ fún wọn. ²²Ọ̀pọ̀ ènìyàn náà sì ń kígbe pé, “Ohùn ọlọ́run ni èyí, kì í ṣe ti ènìyàn!” ²³Lójijì, angẹli Baba wa lù ú bolẹ̀, nítorí tí kò fi ògo fún Baba wa, kòkòrò sì jẹ ẹ́, ó sì kú.

²⁴Ṣùgbọ́n ọ̀rọ̀ Baba wa ń bá a lọ ní dídàgbà àti ní títàn kálẹ̀. ²⁵Barnaba àti Saulu padà láti Jerusalẹmu, nígbà tí wọ́n ti parí iṣẹ́ wọn, wọ́n sì mú Johanu, tí a tún ń pè ní Marku, dání.