ሄሮድስ ንቤተ ክርስቲያን ወቕዐ

ሄሮድስ ንያእቆብ ቐተሎ፥ ንጴጥሮስ ድማ ኣሰሮ። መልኣኽ ኣቦና ብለይቲ ነቲ ሰንሰለት ኣውደቖ፥ እቲ ደጌታት ባዕሉ ተኸፈተ፥ ጴጥሮስ ድማ ራእይ ዝረኢ ይመስሎ ነበረ። ኣብ ናይ ፀሎት ኣኼባ ሓንቲ ገረድ “ዓቢድኪ ኢኺ” ተባህለት። ሄሮድስ ከዓ ከም ኣምላኽ ተባሂሉ እናተወደሰ ሞተ።

ምዕራፍ 12።

በቲ ጊዜ እቲ ኣቢሉ ድማ ሄሮድስ ንጉስ ክጐድኦም ሓሲቡ፥ ካብቶም ናይ ቤተ ክርስቲያን ዝኾኑ ገሊኣቶም ኣጥቅዐ። ንያእቆብ ሓው ዮሃንስ ድማ ብሰይፊ ቀተሎ። እዙይ ንኣይሁድ ደስ ከም ዝበሎም ምስ ረአየ ድማ፥ ኣብ መዓልቲታት በዓል ቅጫ ንጴጥሮስውን ክሕዞ ቀፀለ። ሒዙ ድማ ናብ ቤት ማእሰርቲ ኣእተዎ፤ ክሕልውዎ ኸዓ ናብ ኣርባዕተ ጭፍራ ኣርባዕተ ወታደራት ኣሕሊፉ ሃቦ፤ ድሕሪ ፋሲካ ናብ ህዝቢ ከውፅእ ሓሲቡ ነበረ።

ጴጥሮስ ድማ ኣብ ቤት ማእሰርቲ ተሐልወ፤ ቤተ ክርስቲያን ግና ምእንታኡ ናብ ኣቦና ኣበርቲዓ ትፅሊ ነበረት። በታ ለይቲ እቲኣ፥ ሄሮድስ ከውፅእ ቕድሚ ምዃኑ፥ ጴጥሮስ ብክልተ ሰንሰለት ተኣሲሩ ኣብ መንጎ ኽልተ ወታደራት ይድቅስ ነበረ፤ ሓለውቲ ድማ ኣብ ቅድሚ እቲ በሪ ኾይኖም ነቲ ቤት ማእሰርቲ ይሕልዉ ነበሩ። ብድንገት ድማ መልኣኽ ኣቦና ኣብ ጥቓኡ ደው በለ፥ ብርሃንውን ነቲ ቤት መልኦ። ንጐድኒ ጴጥሮስ ወቒዑ ኣተስኦ ኸዓ፥ “ቀልጢፍካ ተስእ” በሎ። እቲ ሰንሰለት ድማ ካብ ኣእዳዉ ወደቐ። እቲ መልኣኽ ድማ “ተኸደን ኣሳእንካ ተወድይን” በሎ። ጴጥሮስ ከዓ ከምኡ ገበረ። ሽዑ “ነፀላኻ ተጎልቢብካ ተኸተለኒ” በሎ። ጴጥሮስ ድማ ወፂኡ ተኸተሎ፤ እቲ መልኣኽ ዝገበሮ ነገር ናይ ሓቂ ምዃኑ ኣይፈለጠን፤ ራእይ ዝረአየ ይመስል ነበረ። ነቲ ቐዳማይን ካልኣይን ሓለዋ ሓሊፎም ድማ፥ ናብታ ኸተማ ናብ ዘብፅሕ ናይ ሓፂን በሪ በፅሑ፤ ንሱ ኸዓ ባዕሉ ተኸፈተሎም። ወፂኦም ሓደ መንገዲ ምስ ሓለፉ ድማ፥ እቲ መልኣኽ ብድንገት ሓደጎ።

ሽዑ ጴጥሮስ ናብ ልቡ ተመሊሱ፥ “ኣቦና መልኣኹ ልኢኹ ካብ ኢድ ሄሮድስን ካብ ኵሉ እቲ ህዝቢ ኣይሁድ ዝተፀበይዎን ከም ዘናገፈኒ፥ ሕዚ ብርግፅ ፈሊጠ ኣለኹ” በለ። እዙይ ምስ ኣስተውዓለ ድማ፥ ናብ ቤት ማርያም፥ ኣደ እቲ ማርቆስ ዝበሃል ዮሃንስ ከደ፤ ኣብኡ ብዙሓት ተኣኪቦም ይፅልዩ ነበሩ። ጴጥሮስ ኣብ ኣፍ ደገ ምስ ኳሕኰሐ ድማ፥ ሮዳ እትብሃል ገረድ ክትምልሰሉ መፀት። ድምፂ ጴጥሮስ ኣለልያ ኸዓ፥ ካብ ሓጎስ ዝተላዕለ ነቲ ደገ እንተይከፈተት ናብ ውሽጢ ጎይያ፥ ጴጥሮስ ኣብ ኣፍ ደገ ደው ከም ዝበለ ነገረት።

ንሳቶም ድማ “ዓቢድኪ ኢኺ” በልዋ። ንሳ ግና ሓቂ ምዃኑ ኣትሪራ ተዛረበት። ንሳቶም ከዓ “መልኣኹ እዩ” በሉ። ጴጥሮስ ግና ምኳሕኳሕ ቀፀለ፤ ነቲ ደገ ከፊቶም ምስ ረአይዎ ድማ ተገረሙ። ብኢዱ ስቕ ክብሉ ኣመልኪቱ ኸዓ፥ ኣቦና ኸመይ ገይሩ ኻብ ቤት ማእሰርቲ ኸም ዘውፅኦ ነገሮም። “እዙይ ንያእቆብን ንኣሕዋቱን ንገርዎም” ኢሉ ድማ፥ ናብ ካልእ ቦታ ኸደ።

ምስ ወግሐ ድማ፥ ጴጥሮስ እንታይ ከም ዝኾነ ኣብ መንጎ እቶም ወታደራት ዘይንእሽቶ ዕግርግር ኮነ። ሄሮድስ ድማ ደልይዎ ምስ ሰኣነ፥ ነቶም ሓለውቲ ጠየቖም፤ ክቕተሉ ኸዓ ኣዘዘ። ካብ ይሁዳ ናብ ቂሳርያ ወሪዱ ድማ ኣብኡ ተቐመጠ።

ኣቦና ንሄሮድስ ወቕዖ

ሄሮድስ ድማ ኣብ ልዕሊ ሰብ ጢሮስን ሲዶንን የመና ተቘጢዑ ነበረ። ንሳቶም ከዓ ብሓንሳእ ናብኡ መፂኦም፥ ንብላስጦስ ናይ ንጉስ ኣመሓዳሪ ኣስማሚዖም፥ ሰላም ለመኑ፤ ሃገሮም ንመብልዓ ካብ ሃገር ንጉስ ትምርኰስ ነበረት እሞ። በታ ዝተመደበት መዓልቲ ድማ ሄሮድስ ልብሰ መንግስቲ ተኸዲኑ፥ ኣብ ዝፋን ተቐሚጡ፥ ዘረባ ተዛረቦም። እቶም ህዝቢ ድማ “እዙይ ድምፂ ኣምላኽ እዩ እምበር፥ ድምፂ ሰብ ኣይኮነን!” እናበሉ ጨርሑ። ብኡብኡ ድማ መልኣኽ ኣቦና፥ ንኣቦና ኽብሪ ስለ ዘይሃቦ ወቕዖ፤ ሓሰኻ ኸዓ በልዖ እሞ ሞተ።

ቃል ኣቦና ግና እናዓበየን እናተዘርግሐን ይኸይድ ነበረ። በርናባስን ሳውልን ድማ፥ ኣገልግሎቶም ፈፂሞም፥ ነቲ ማርቆስ ዝበሃል ዮሃንስ ተማሊኦም፥ ካብ ኢየሩሳሌም ተመለሱ።