Herodei lashong to dalabü
Herodei Jakob to haitikei hoba Peter to thüngdang to phokei. Nina seneibü Bou hangangbü cheei yangmen tuongtikei hoba koukhün himshuong shentikei; Peterei hao mangsang hapbü tegü thinei kümbei. Welaubü takshatdang ka sambü nyi cheei no langbautida dogo hao to lenkei. Herod, mühghaü dogo nyenkubü, haikei.
12 1Khübü chaloua Choba Herodei, haoen amauti shanga, lashong yo kabü atei to ik shaangkei. 2Haoei Johaneibü na Jakob to inei haitikei. 3Kho Jihudabü maang haibü hapan, Herodei Tokai ajinbü Wentek Lem chaloua Peter tokei lapla shaangkei. 4Haoei hao lapbei, thüngdang to phokei, hoba hao lomla shanga sepai müt saoeibü tan saoche la khümbo kukei; Püetbülem phaia hao mütshuong to leian anglabü dogo maangangkei.
5Peter kho thüngdang to phoan kikei, lausikei lashong mütshuongei hao shanga seneibü Bou to kaangkosekko welaukei. 6Kho langyang ka, Herodei hao leian anglep thedanga, Peter yangmen nyiei khühan, sepai müt nyi maang ka yepkei; hoba koukhün thedanga lombü shuongei thüngdang lomkei. 7Kheijinei seneibü Bou hangangbü che hao junga lokei, hoba ngesakbüei thüngdang shenkei. Haoei Peter phakshok to dakei, hao pientikei, hoba laukei, “Tongde meimeiashi.” Hoba yangmen khübü haoeibü phema ka tuongkei. 8Hangangbüei hao to laukei, “Kaibü hele leashi hoba kaibü nguok shembashi.” Hobaje Peterei kho tegü kümbei. Kheijinei haoei laukei, “Kaibü neisimei kaikushi hoba kü phai semashi.” 9Hibü Peter longan hao phai sembei, hoba hangangbüei kümbü shuong kho maimaitham kiteikei dogo ange; haoei mangsang che hapbei dogo dambei. 10Shaangbü hoba nyiboubü lomshang danjung paian, haoen sangnyu to hau namkaang bakou to loukei, kho bakou kho lolo haosi shanga ipbei. Haoen longkei, khongchi che paikei, hoba kheijinei hangangbüei hao apyokei.
11Kheijinei Peter maang to loukei hoba laukei, “Tat ngei maimaitham ngeakei; seneibü Bouei haoeibü hangangbü hautikei hoba Herodeibü ik ka hoba Jihuda mütshuongei haplep dogo dambü pendou ka ngo khümenkei.” 12Kho ngean, haoei Johan, tokei Marka dogo nyenbü, haonyu Marieibü chem to haukei, lanei mütshuong juong welauko takshatan kiteikei. 13Ladang Peterei bakou koukhün to komkei, Rhoda nyenbü sambüsaoei jongaila loukei. 14Petereibü ngüh shenan, saoei aeibou olinbü ka bakou aip, Peter khünei loa dogo lenla lapjung laangkei.
15Haoenei laukei, “No langet angda.” Lausikei saoei kho maimaitham kia dogo kaangkosekko laukei. Kheijinei haoenei laukei, “Haoeibü hangangbü ki.” 16Lausikei Peterei athakko komko kikei, hoba haoenei koukhün ipan hao hapbei, haoen maangpangkei. 17Haoei ikei küpjembo kila lenkei, hoba seneibü Bouei thüngdang ka hao leian angkei kho haoen to lenkei. Haoei laukei, “Ho ngüh Jakob hoba jaisinasi shuong to lenashi.” Kheijinei haoei lubü kao che to haukei.
18Ladang ngeyang loukei, Peter ai ong haüthükkei dogo sepai shuong yoa hanbü aying yaang longkei. 19Herodei hao laman ühüpdang lesi, lombü shuong to pheyokei hoba haoen haitila shanga ngühkhüm kukei. Kheijinei haoei Jihuda ka Kaisariaa hauan khünei kikei.
Seneibü Bouei Herod to dalabü
20Herodei Tair hoba Sidonbü to maangpokkei. Haoen maangpon hao jungto loukei, hoba Chobaeibü chem lombou Blastus senjung louan, haoen sangmai subüjakei, aishanga haoeneibü kaonyek Chobaeibü kaonyek ka shausiyung hapkei. 21Jih tükdea Herodei Choba hele leikei, setshanga setkei, hoba haoen to ngüh laukei. 22Hoba mütshuongei athakko uihinkei, “Ho mühghaü ngüh ki, müteibü aying!” 23Tongde seneibü Bou hangangbü cheei hao to dakei, aishanga haoei seneibü Bou to soneikangbü aku; hoba yangei hao shaukei hoba hao haikei.
24Lausikei seneibü Bou ngüh kho yemko hoba phinko athakko haukei. 25Barnea hoba Saul kho haoeneibü kümsilei kümkhümbei, hoba Johan, tokei Marka dogo nyenbü, hao yoa leian, Jerusalem ka ngaikei.
