Herod na Singlup ding Riangre Thang
Herod na James ding athat thangluga, Peter ding qwan in bi thang rwe. Uilu bi ani Pa om tambaan chonglang khatna chai ga bakut pina ta thangluga, inkhaan rwan ga bani raantoza lat swak rwe; Peter na maanna tamaannu mu ong rwe diga baning rwe. Kalumnu kadoinu bi, swak kamaisa khat ding nang kalo rwe diga rin thang rwe. Herod, rikrwang khate diga kou thangnu, thin rwe.
12 1Haba kaan khak bi, Herod krwang na singlup om mi nun lak pi riangre thang lang baningluga, bani ding kut pi thang rwe. 2Maanna John nao James ding thaanchak ga athat thang rwe. 3Haga Jihudi rwan ding pem thang rwe dinu Herod na muluga, Khai Sui maknu Uilu Balou lumik bi Peter ding le namnu lang khut rwe. 4Maanna bating namluga qwan in bi thang rwe, atiga rangkaan thang lang kraanmi mari ongnu pakun mari khou bating zathang pi rwe; balangbe Takan Swaknu Balou nung bi mi nun meithaan bi bating kai swak lang maan baning ngaake.
5Peter ding qwan in bi thang drwe; atiyeda singlupna bating lang ani Pa khou rakanga kalum rwe. 6Haba zingpha, Herod na bating kai swak maknu meithaan bi, Peter ga chai kani ga bang thangga kraanmi kani kalang bi inthi ong ngaake; atiga rangkaan rwanna inkhaan paan bi qwan in ding rangkaan thang ngaake. 7Barapka ani Pa om tambaan chonglang khat bating kim bi han ongluga, qwan in basung ramanuna sip rwe. Maanna Peter balang bi kabengga bating bathou thouluga rinne, “Rang takka thouro.” Atiga bakut pina chai ga ta thang rwe. 8Tambaan chonglangna bakhou rinne, “Napwan bathuluga naket pi sandal twang ngo.” Peter na hadanga to rwe. Habei ga maanna bakhou rinne, “Natalathu pui ga kazeiluga Ei nung suiro.” 9Atiga Peter se swakluga nung sui rwe, atiyeda tambaan chonglang om chwan bing ga batak takka towe dinu maanna thei mak ngaake; maanna inmang khat mu rwe diga baning ngaake. 10Kama le baninu rangkaan riak ga kaalatluga, namlian khou se dingnu thin inkhaan pui bi hung tang rwe, haba inkhaan pui ga barwei lang baraanto lat swak rwe. Barwei se swakluga lampui khat kaalatnu kaan bi, barapka tambaan chonglang ga bating khouna swak trwe.
11Habei ga Peter sung kale latluga rinne, “Atun ei batak takka theiye: ani Pa na Bating tambaan chonglang hungluga, Herod kut pina khatle Jihudi mi nun om baning ongnu bing khouna ating kan thang rwe.” 12Haga theiluga, maan Mark diga le kounu John banu, Mary in bi se rwe; habei ga mi khang puina som thouluga kalum ong ngaake. 13Peter na inkhaanmun bi han bachunu kaan bi, Rhoda diga kounu swak kamaisa reizuni pakhat katak lang hung rwe. 14Peter om khwan ding theiluga, maan karo tak thou briakpina, inkhaan lat swak makka rang takka basung la khutluga, Peter habei han ong amme diga rin rwe.
15Banina rinne, “Nang sung liam rwe.” Atiyeda maanna haga batak takka towe diga sung raang takka rin rwe. Atiga banina rinne, “Haga bating tambaan chonglang gaye.” 16Atiyeda Peter na inkhaan bachu dam damnu kaan bi, banina inkhaan lat swakluga bating munu kaan bi, bani ngaak liam rwe. 17Maanna bakut ga indao toga bani thiap thiap ong lang ni rwe. Atiga ani Pa na tatonu bating qwan in bina kai swak thang rwe dinu maanna bachu thang rwe. Maanna rinne, “Haga James le unao rwan khou rinno.” Atiga maan riak kama khat la se rwe.
18Khwaphong latnu kaan bi, Peter tato thang drwe dinu kraanmi nun lak pi kasao kabao lian thou thang ngaake. 19Herod na bating zongluga zong dou maknu kaan bi, rangkaan rwan khou chong ngailuga, bani ding athat thangro diga chongtan pi rwe. Atiga maan Judea bina Caesarea la ta thang seluga habei ga am ngaake.
Ani Pa na Herod ding Imphaang Thang
20Herod ga Tyre le Sidon rwan lang balung pwan tak ngaake. Bani bacham thangluga bating kim bi hungluga, krwang om in rangkaanpuba Blastus ding lou thang suiluga, dai bazaangnu lang ni rwe; balangbe bani taram ga thaisaak lang krwang om taram khou balumsa ngaake. 21Kathan ongnu lumik bi Herod na krwang pon bathuluga, takung riak pi dungluga, bani khou chong rin rwe. 22Atiga mi khangna pao dam damga rinne, “Haga ri zung om khwan gaye, misa om make!” 23Haba kahan bi ga, maanna ani Pa khou intonu kaan pi thang mak briakpina, ani Pa om tambaan chonglang khat na bating imphaang thang rwe; atiga maan tumaa na sanu kaan bi thi rwe.
24Atiyeda ani Pa om chong ga ngam lian thou rwe khatle khang thou rwe. 25Barnabas le Saul na bani om to thang loinu kaan bi, Mark diga le kounu John ding bani le diga louluga, Jerusalem bina han hung lat rwe.